ەلباسى بيىل «قازاقستان رەسپۋبليكاسىنىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويعانى بەلگىلى. بيلىك تارماقتارى اراسىنداعى وكىلەتتىكتەردى قايتا ءبولۋ بويىنشا اتا زاڭعا ەنگىزىلگەن وزگەرىستەر پارلامەنتتىڭ ءرولىن ايتارلىقتاي كۇشەيتتى. پرەزيدەنت ءوزىنىڭ زاڭ شىعارۋشى وكىلەتتىگىن بەرگەننەن كەيىن, بيلىكتىڭ بۇل تارماعى ەندى زاڭ شىعارۋشى قىزمەتتى جۇزەگە اسىراتىن ەمەس, زاڭ شىعارۋشى بيلىك رەتىندە تۇجىرىمدالدى. كونستيتۋتسياداعى وزگەرىستەرگە سايكەس, ۇكىمەت پارلامەنتكە ءوزىنىڭ شەشىمدەرى تۋرالى, نەگىزگى باعىتتارى تۋرالى بايانداپ وتىرادى. ەگەر ەسەپتى تىڭداۋ قورىتىندىلارى بويىنشا ۇكىمەت مۇشەسى رەسپۋبليكا زاڭدارىن ورىنداماعان جاعدايدا پالاتا دەپۋتاتتارى جالپى سانىنىڭ كەمىندە ۇشتەن ەكىسىنىڭ كوپشىلىك داۋىسىمەن ونى قىزمەتتەن بوساتۋ تۋرالى ەل پرەزيدەنتىنە ءوتىنىش جاساۋعا قۇزىرەتتى. مۇنداي جاعدايدا ەل پرەزيدەنتى ۇكىمەت مۇشەسىن قىزمەتىنەن بوساتادى. بۇل – پارلامەنتتىڭ جاۋاپكەرشىلىگى ارتقانىن ايعاقتايتىن جايت. مەملەكەتتىڭ باسقارۋ نىسانىنىڭ پرەزيدەنتتىكتەن پرەزيدەنتتىك-پارلامەنتتىك رەسپۋبليكاعا وزگەرۋى, مەملەكەت باسشىسىنىڭ بىرقاتار وكىلەتتىگىن ەل پارلامەنتىنە بەرۋى, سەنات دەپۋتاتتارىنىڭ سانى پرەزيدەنت كۆوتاسى ەسەبىنەن 7-دەن 15-كە دەيىن كوبەيتىلۋى پارلامەنتتىڭ ورنى مەن ءرولىنىڭ تۇبەگەيلى نىعايۋىنا باسىمدىق بەرىلگەنىن بىلدىرەدى. دەمەك, بۇگىن سايلانعالى وتىرعان سەنات دەپۋتاتتارىنىڭ الدىندا ۇلكەن جاۋاپكەرشىلىك تۇر. جالپى, سەنات كونستيتۋتسيالىق زاڭدا بەلگىلەنگەن تارتىپپەن ءار وبلىستان, رەسپۋبليكالىق ماڭىزى بار قالادان جانە قازاقستان رەسپۋبليكاسىنىڭ استاناسىنان ەكى ادامنان وكىلدىك ەتەتىن دەپۋتاتتاردان قۇرالادى. سەناتتا قوعامنىڭ ۇلتتىق-مادەني جانە وزگە دە ەلەۋلى مۇددەلەرى ەسكەرىلۋى كەرەك. سوندىقتان, جوعارعى پالاتانىڭ 15 دەپۋتاتىن رەسپۋبليكا پرەزيدەنتى تاعايىندايدى. سەنات دەپۋتاتتارىنىڭ جارتىسى ءاربىر ءۇش جىل سايىن قايتا سايلانىپ وتىرادى. سەنات دەپۋتاتتارىنىڭ وكىلەتتىك مەرزىمى – التى جىل. كونستيتۋتسياداعى تالاپتارعا سايكەس, جاسى وتىزعا تولعان, جوعارى ءبىلىمى جانە كەمىندە بەس جىل جۇمىس ءوتىلى بار, ءتيىستى وبلىستىڭ, رەسپۋبليكالىق ماڭىزى بار قالانىڭ, نە رەسپۋبليكا استاناسىنىڭ اۋماعىندا كەمىندە ءۇش جىل تۇراقتى تۇرىپ جاتقان ادام سەنات دەپۋتاتى بولا الادى. سونىمەن, وبلىستىق, استانا جانە الماتى قالالارى سايلاۋ كوميسسيالارىنىڭ مالىمەتتەرىنە سايكەس, بۇگىنگى سايلاۋعا بارلىعى 38 ۇمىتكەر تىركەلدى. وسىعان دەيىن جەرگىلىكتى بۇقارالىق اقپارات قۇرالدارىندا تاڭداۋشىلاردىڭ تىزىمدەرى جاريالانعان بولاتىن. رەسمي دەرەككە سايكەس, بۇگىنگە دەيىن سايلاۋعا قاتىساتىن تاڭداۋشىلاردىڭ سانى – 3293. ياعني, سايلاۋ زاڭناماسىنا سايكەس سەنات دەپۋتاتتارىن ءماسليحات دەپۋتاتتارى سايلايدى. ولاردىڭ باسىم بولىگى الماتى, شىعىس قازاقستان جانە وڭتۇستىك قازاقستان وبلىستارىندا تىركەلگەن. ورتالىق سايلاۋ كوميسسياسىنىڭ توراعاسى بەرىك يماشەۆتىڭ ايتۋىنشا, سايلاۋ ناۋقانى «قازاقستان رەسپۋبليكاسىنداعى سايلاۋ تۋرالى» زاڭعا ساي ءوتۋى قاتاڭ قاداعالانعان. ءارى دەموكراتيالىق قوعامعا ساي داۋىس بەرۋ ۇدەرىسىن حالىقارالىق ۇيىمدار مەن شەت مەملەكەتتەردەن اككرەديتتەلگەن بايقاۋشىلار باقىلاپ وتىر. ولاردىڭ قاتارىندا فرانس-پرەسس, بي-بي-سي, رەيتەر, ءال-جازيرا سەكىلدى تانىمال اقپارات قۇرالدارىنىڭ وكىلدەرى دە بار. پارلامەنت سەناتى دەپۋتاتتارىن سايلاۋعا داۋىس بەرۋ استانا ۋاقىتى بويىنشا ساعات 10.00-دە باستالادى. وسى سايلاۋدا تاڭداۋشىلار ەلەكتروندىق تىركەۋدى العاش رەت قولداناتىنىن دا ايتا كەتۋ ءلازىم. بۇل داۋىس بەرۋدىڭ ادىلدىگى مەن اشىقتىعىن ايعاقتايتىن تاسىلدەردىڭ ءبىرى سانالادى.
قىمبات توقتامۇرات, «ەگەمەن قازاقستان»