ەلىمىزدە كەدەندىك باقىلاۋدىڭ تيىمدىلىگىنىڭ ارتۋى بايقالىپ وتىر. بۇگىن حالىققا ەسەپ بەرۋ كەزدەسۋىندە قازاقستان رەسپۋبليكاسىنىڭ قارجى ءمينيسترى باقىت سۇلتانوۆ وسىلاي ءمالىم ەتتى, دەپ حابارلايدى «قازاقپارات».
قارجى ءمينيسترىنىڭ ايتۋىنشا, وسى سالاعا جاۋاپتى مەكەمەلەردىڭ بىرلەسە وتىرىپ جۇرگىزگەن تالداۋ جۇمىسى وڭ اسەرىن بەرگەن.
«بۇل قادام كەدەندىك باقىلاۋ كەزىندەگى سۋبەكتىلەردى ءتيىمدى تۇردە تاڭداۋعا مۇمكىندىك بەردى. وسىنىڭ ارقاسىندا بۇگىنگى كۇنى كەدەن باقىلاۋىنىڭ تيىمدىلىگى ەكى ەسەگە ارتىپ وتىر. قازىرگى ۋاقىتتا 36-دان 16 پايىزعا دەيىن تومەندەگەنىمەن, تاۋار اينالىمىنا قاتىستى كەدەندىك باقىلاۋدى 5,6 پايىزعا دەيىنگى كورسەتكىشكە جەتكىزۋدى جوسپارلاپ وتىرمىز», دەدى قارجى ءمينيسترى.
سونداي-اق, باقىت سۇلتانوۆ كەدەندىك راسىمدەردى وڭتايلاتۋ باعىتىندا جۇمىس جۇرگىزىلىپ, «اريس» باعدارلاماسى ارقىلى بيزنەس-پروتسەستەر جەڭىلدەتىلىپ جاتقانىن تىلگە تيەك ەتتى.
ەسكە سالا كەتسەك, بۇگىن قر قارجى ءمينيسترى باقىت سۇلتانوۆ حالىققا ەسەپ بەرۋ كەزدەسۋىن وتكىزۋدە.