ساندىقتى اشىپ قاراعاندا, ىشىنەن ەسكى كىتاپتار, باسقا دا ءارتۇرلى بۇيىمدار جانە ۇزىنشا شۇبەرەككە ورالعان الدەقانداي بەلگىسىز بۋما شىعادى. ارادا كوپ ۋاقىت وتپەي, بەلگىسىز بۋمانى ادەبيەت ينستيتۋتىنىڭ عالىمدارى كەلىپ الىپ كەتەدى. ولار جازىلعان قولجازبانىڭ ءبىر بولىگىن لەنينگرادتاعى سيرەك قولجازبالاردى وقيتىن مامانداردىڭ ساراپتاماسىنا جىبەرەدى. ولار قولجازبانىڭ بۇزاۋ تەرىسىنە جازىلعان تورو, ياعني اللا تاعالانىڭ مۇسا پايعامبارعا جىبەرگەن ەۆرەي حالقىنىڭ ءدىني كىتابى ءتاۋرات ەكەنىن انىقتايدى. جازىلعان ۋاقىتى – ءحىى-ءحVىىى عاسىر ارالىعى.
قاسيەتتى ءتورت كىتاپتىڭ ءبىرى ءتاۋرات جازىلعان تەرىنىڭ ۇزىندىعى – 26 مەتر! جۇپ-جۇقا بولىپ يلەنىپ, جىلتىراپ تۇرىپ وڭدەلگەن بۇزاۋ تەرىسىنىڭ ساپاسى كۇشتى كورىنەدى. قابارىپ, قارايىپ, ءار جەرىنەن كۇيىك شالعان تەرىنىڭ ءبىر مارتە ءورتتىڭ ىشىنەن امان شىققانى بايقالادى. ءتاۋراتتىڭ دا ءار پاراعى ۋاقىتتىڭ ءار كەزەڭىندە جازىلسا كەرەك. ءار جاڭا پاراعى جاڭا يلەنگەن بۇزاۋ تەرىسىنە قولمەن جازىلىپ, بىرىنە-ءبىرى جالعانىپ وتىرعان.
ۇزىندىعى 26 مەتر, ەنى 60 سم تاۋراتپەن كەز كەلگەن ادام تانىسا المايدى, ول ءتىپتى كورمەلەرگە دە قويىلمايدى. 2011 جىلى عىلىم ورداسىنا كۇردەلى جوندەۋ جۇرگىزىلىپ, وردا تىنىسىمەن ارنايى تانىسۋ ءۇشىن ەلباسى كەلىپ ارالاپ كورگەندە عانا ءبىرىنشى رەت نازارعا ۇسىنىلدى. قازىر ءتاۋرات تسيفرلىق قالىپقا تۇسىرىلگەن. قىزىعۋشىلىق تانىتقان ادام سايتقا كىرىپ, تانىسا الادى.
ايگۇل احانبايقىزى, «ەگەمەن قازاقستان»
الماتى