كونفەرەنتسيادا بەلگىلى بولعانداي, كورمەدە ەرىكتىلەر رەتىندە 46 مەملەكەتتىڭ وكىلدەرى قىزمەت ەتۋدە. بۇدان بولەك, شارانى حالىقارالىق دەڭگەيدە ناسيحاتتاۋدا ەلەۋلى جۇمىستار اتقارىلىپ, بۇگىنگە دەيىن 1,5 ملرد ادام قامتىلعان, ال كورمە سوڭىنا دەيىن بۇل كورسەتكىش 2,5 ملرد ادامعا جەتپەك. ەكسپو-2017 جايىنداعى اقپارات حالىقارالىق ءىرى اۋەجايلاردا جانە وزگە دە ماڭىزدى نىسانداردا ورنالاستىرىلۋدا. سونداي-اق, «Google» كومپانياسىمەن ستراتەگيالىق ىنتىماقتاستىق ىسكە اسىرىلىپ, جارنامالار الدىڭعى قاتارلى الەمدىك تەلەارنالاردا كورسەتىلۋدە. ەكسپو-2017 كورمەسىنىڭ سالتاناتتى اشىلۋىنان شەتەلدىك باق-تىڭ 800-دەن استام وكىلى حابار تاراتتى. كوپتەگەن ەلدەردە بۇل شارا تىكەلەي ەفيردە كورسەتىلدى», دەدى «استانا ەكسپو-2017» ۇلتتىق كومپانياسىنىڭ باسقارما توراعاسى احمەتجان ەسىموۆ.
دۇنيەجۇزىلىك كونفەرەنتسيادا استانا اكىمى اسەت يسەكەشەۆ ءسوز سويلەپ, ەلوردادا بالامالى ەنەرگيا كوزدەرىنىڭ 50 نىسانى ورناتىلعانىن باياندادى. «قالادا بالامالى ەنەرگيا كوزدەرىنىڭ 50 نىسانى جۇمىس ىستەۋدە. مىسالى, گۇل بەينەسىندە جاسالعان «Smart flower» كۇن ەنەرگياسىن ەنەرگياعا اينالدىراتىن قۇرال نوۋحاۋ بولدى. سونىمەن قاتار, اۆتوبۋس ايالدامالارى, باعدارشامدار, تەحنولوگيالىق ورىندىقتار, پاركتەر مەن سكۆەرلەردەگى شامدار كۇننەن قۋات الادى. ارينە, مۇنىڭ بارلىعى شاعىن جوبالار ەكەنى بەلگىلى. بىراق بۇل جاڭاشا ويلاۋ ءۇشىن قاجەت, سونداي-اق ءىرى جوبالاردى جۇزەگە اسىرۋ ءۇشىن نەگىزگى ىرگەتاس بولادى. ءبىز ءىرى جوبالاردى دا جۇزەگە اسىرىپ جاتىرمىز», دەدى قالا باسشىسى.
اسەت يسەكەشەۆ الداعى ۋاقىتتا استانا كوشەلەرىندەگى شامداردىڭ ەنەرگيا ۇنەمدەيتىن شامدارعا اۋىستىرىلاتىنىن ايتتى. «اۋقىمدى تۇردە قالاداعى شامداردى ەنەرگيالىق جاعىنان ءتيىمدى شامدارعا الماستىرامىز. سونىمەن قاتار, كەزەڭ-كەزەڭمەن الەۋمەتتىك نىسانداردا – مەكتەپتەردە, بالاباقشالاردا, اۋرۋحانالاردا ەنەرگيا ۇنەمدەۋگە باعىتتالعان باعدارلامالار جۇزەگە اسىرىلادى. ەنەرگيا ۇنەمدەۋ ينستيتۋتىمەن ونىڭ تيىمدىلىگىن ارتتىرۋعا باعىتتالعان كەشەندى جوسپار جاسالدى. ال ەكولوگيالىق تۇراقتىلىقتى ساقتاۋ ءۇشىن بىرقاتار تومەن كومىرتەكتى جوبانى جۇزەگە اسىرۋدى جوسپارلاپ وتىرمىز. ونىڭ ىشىندە تومەن كومىرتەكتى كولىكتەرگە كوشۋ دە بار», دەدى اكىم.
ەلوردا باسشىسىنىڭ ايتۋىنشا, 2020 جىلعا قاراي استانا ەۋرازيا كەڭىستىگىندەگى تۋريستەر ءۇشىن ەڭ تارتىمدى قالا بولماق. سونىمەن قاتار, ءارتۇرلى فورۋمدار مەن سامميتتەر, ىسكەرلىك كەزدەسۋلەر مەن مادەني-سپورتتىق شارالار وتەتىن باستى ورتالىقتىڭ بىرىنە اينالۋى ءتيىس. وسى ماقساتتا اۋەجاي, تەمىر جول ۆوكزالى, قوناقۇيلەر مەن باسقا نىساندار, ءبىز سوزبەن ايتقاندا, ينفراقۇرىلىم ساپالى ءارى جان-جاقتى جەتىلدىرىلىپ, دامۋدا.
اسحات رايقۇل, «ەگەمەن قازاقستان»