بۇل ورايدا, بۇگىندە ەلىمىزدىڭ بارلىق وڭىرىندە ۇلتتىق رۋحتى ۇلىقتاعان اۋقىمدى ءىس-شارالار وزىندىك ءسان-سالتاناتىمەن وتكىزىلۋدە. سولاردىڭ قاتارىندا الماتىداعى «بورالداي» ارحەولوگيالىق پاركىندە وتكەن « ۇلى دالا رۋحى-2017» حالىقارالىق ەتنوفەستيۆالىن اتاۋعا بولادى. كوشپەندى حالىقتاردىڭ مادەنيەتى مەن تەرەڭ تاريحىنان سىر شەرتەتىن تانىمدىق شاراعا الەمنىڭ 10 ەلىنەن كەلگەن وكىلدەر قاتىستى.
وسىمەن ەكىنشى رەت ۇيىمداستىرىلىپ وتىرعان ەتنوفەستيۆال جوعارى دارەجەدە ءوتتى. قاز-قاتار تىگىلگەن ون ەكى قاناتتى اقشاڭقان الپىس ءۇي شارانىڭ اجارىن كىرگىزىپ, كوشپەندىلەر شەرۋى مەن ات قۇلاعىندا وينايتىن شاباندوزداردىڭ ونەرى جيىلعانداردى ءتانتى ەتتى. كوكپار, اۋدارىسپاق, قىز قۋ, اساۋعا تۇساۋ سالۋ سىندى ات ويىندارى ويناتىلىپ, ۇلتتىق قۇندىلىقتارىمىزدىڭ دىڭگەگى سانالاتىن قولونەر شەبەرلەرى مەن ۇستالاردىڭ تۋىندىلارى, التىباقان, كۇي تارتىس, قىران قۇس, قۇماي تازى ۇلى دالانىڭ رۋحىن اسقاقتاتتى.
«باستى ماقسات – قازاقستاندىقتار مەن شەتەلدىك قوناقتارعا كوشپەندىلەر مادەنيەتىن, قازاقتىڭ ەجەلگى تاريحى مەن سالت-ءداستۇرىن كورسەتۋ», – دەيدى شارانى ۇيىمداستىرۋشىلار. فەستيۆال اياسىندا تاقىرىپقا بايلانىستى سەكتورلار جۇمىس ىستەدى. ماسەلەن, «المالى» اتتى قولونەرشىلەر اۋىلىندا شەبەرلىك ساباقتارى وتكىزىلىپ, كورەرمەندەر شەبەرلەردىڭ ونەرىن تاماشالاپ قانا قويماي, ماماننىڭ كومەگىمەن سازدان قۇمىرا جاساپ كوردى. ال «شابىت» مۋزىكانتتار اۋىلىندا ۇيىمداستىرىلعان بايقاۋدا قوناقتار ءتۇرلى اسپاپتاردا ويناپ, ۇلتتىق تاعامداردان ءدام تاتتى. قىز جاساۋىنىڭ قۇپياسىمەن تانىسىپ, كاسىبي بۇركىتشىلەر مەن پالۋانداردىڭ ونەرىن تاماشالادى. وسىلايشا, فەستيۆالعا كەلگەندەر كوشپەندىلەر ءومىرىن ءوز كوزدەرىمەن كورىپ, تۇرمىس-سالتىمەن تانىسىپ قايتتى. كورەرمەندەر اراسىنان «ەڭ ادەمى ۇلتتىق كيىم» تاڭدالىپ, سىيلىق تابىستالدى.
ءبىر ەرەكشەلىگى, قالا ىرگەسىندە جالاۋىن كوتەرگەن دۋماندى مەرەكەنى كەز كەلگەن تۇرعىننىڭ تەگىن بارىپ تاماشالاۋىنا تولىقتاي مۇمكىندىك جاسالعان. قالاداعى ورتالىق ستاديون مەن «استانا» الاڭىنان ءار جيىرما مينۋت سايىن ارنايى اۆتوبۋستار قاتىناپ, الماتىلىقتار مەن قالا قوناقتارىن ەتنوفەستيۆالمەن قاۋىشتىردى. ۇلتتىق قۇندىلىقتاردىڭ قاينارىنان قانىپ ءىشىپ, ەجەلگى تۇران وركەنيەتى مەن كونە تۇركىلەر تاريحىنا ساياحات جاساۋعا كەلگەندەردىڭ سانى جيىرما مىڭ ادامنان اسىپ جىعىلدى.
ارمان وكتيابر, «ەگەمەن قازاقستان»
الماتى