بيىل قازاقستان مەن ۆەنگريا اراسىنداعى ديپلوماتيالىق قارىم-قاتىناستىڭ ورناعانىنا 25 جىل تولىپ وتىر. قوس مەملەكەت اراسىنداعى ارىپتەستىك جىلدان جىلعا دامىپ كەلەدى. بۇگىندە ماجارستان قازاقستاننىڭ ورتالىق جانە شىعىس ەۋروپا الاڭىنداعى سەنىمدى سەرىكتەسىنە اينالىپ وتىر. بۇگىندە ەكى ەل اراسىندا قازاقستان-ۆەنگريا ستراتەگيالىق كەڭەسى, ەكونوميكالىق ىنتىماقتاستىق بويىنشا ۇكىمەتارالىق كوميسسياسى, ىسكەرلىك كەڭەس جانە قازاقستان-ۆەنگريا بىرلەسكەن تىكەلەي ينۆەستيتسيالىق فوندى جۇمىس ىستەيدى.
كەزدەسۋ بارىسىندا قايرات ءابدىراحمانوۆ تاراپتار ءبىلىم گرانتىنىڭ سانىن ارتتىرۋعا كەلىسكەنىن مالىمدەدى.
– ىنتىماقتاستىعىمىزدىڭ باسىم باعىتتارىنىڭ ءبىرى – ءبىلىم بەرۋ. وسى جىلدىڭ ناۋرىز ايىنداعى كەلىسىم جوعارى وقۋ ورىندارىنداعى بىرلەسكەن ءبىلىم گرانتىن 45-تەن 200-گە ارتتىرۋعا مۇمكىندىك بەردى. وسى ءۇشىن ۆەنگريالىق تاراپقا العىسىمىز شەكسىز. بۇگىندە ءبىز قازاقستان-ۆەنگريا ەكونوميكالىق ىنتىماقتاستىق بويىنشا ۇكىمەتارالىق كوميسسيانىڭ, قازاقستان-ۆەنگريا ىسكەرلىك كەڭەسىنىڭ, سونداي-اق, استاناداعى ماجارلىق ساۋدا ءۇيىنىڭ الەۋەتىنە باسا نازار اۋدارىپ وتىرمىز, – دەدى قايرات ءابدىراحمانوۆ.
جيىندا ءسوز العان پەتەر سييارتو ۆەنگريانىڭ ورتالىق ازيامەن ىنتىماقتاستىق ورناتقىسى كەلەتىنىن مالىمدەدى.
– الداعى ۋاقىتتا ءبىز ورتالىق ەۋروپا مەن ورتالىق ازيا اراسىندا تىعىز ىنتىماقتاستىق ورناتقىمىز كەلەدى. بۇل بايلانىس ەكى وڭىرگە دە وڭ اسەرىن تيگىزەدى دەگەن ويدامىز, – دەدى پەتەر سييارتو.
جيىن بارىسىندا ەلىمىزدىڭ سىرتقى ىستەر ءمينيسترى سيرياعا بايلانىستى 4-5 شىلدە كۇندەرى وتەتىن استانا پروتسەسىنىڭ V كەزەڭى جايلى مالىمدەدى. ونىڭ ايتۋىنشا, بارلىق كەپىلگەر ەلدەر بۇل جيىنعا قاتىساتىندارىن راستاعان. استاناعا رەسەي پرەزيدەنتىنىڭ ارنايى وكىلى, رەسەي سىرتقى ىستەر ءمينيسترىنىڭ ارنايى وكىلى, تۇركيا مەن يران سىرتقى ىستەر مينيسترلەرىنىڭ ورىنباسارلارى كەلەدى. بۇلاردان بولەك, سيريا ۇكىمەتى مەن سيريا قارۋلى وپپوزيتسياسىنىڭ كەلەر-كەلمەسى ازىرگە بەلگىسىز.
– بىرىككەن ۇلتتار ۇيىمىنىڭ وكىلى ستاففەندە ميستۋرا مەن يوردانيا دەلەگاتسياسى دا استاناعا ارنايى ات باسىن بۇراتىنىن مالىمدەدى. سونىمەن قاتار, اقش تا باقىلاۋشى رەتىندە جوعارى لاۋازىمدى تۇلعاسىن جىبەرەدى, – دەدى قايرات ءابدىراحمانوۆ.
ايان ءابدۋالي, «ەگەمەن قازاقستان»