سالاۋاتتى ءومىر سالتىن ناسيحاتتاۋدى ماقسات ەتكەن بۇل شارا ءبىر كۇنگە سوزىلدى. الدىمەن مارەگە جەتكەن بيليارد. ءبىرىنشى ورىندى وبلىستىق «جەتىسۋ» ارناسى السا, ەكىنشى ورىن – قاراساي اۋداندىق «زامان جارشىسى» گازەتىنىڭ تىلشىسىنە بۇيىردى. ۆولەيبولدان قىزدار اراسىندا وتكەن جارىستا تالعار اۋداندىق «تالعار» گازەتى توپ جاردى. ەكىنشى ورىندى «جەتىسۋ» تەلەارناسىنىڭ قىزدارى, ءۇشىنشى جۇلدەنى رايىمبەك اۋداندىق ء«حانتاڭىرى» گازەتى يەلەندى. ارقان تارتۋ بويىنشا وبلىستىق «جەتىسۋ» گازەتى قارسىلاس شىداتقان جوق. ودان كەيىنگى تىزىمدە ۇيعىر اۋدانى مەن كوكسۋ اۋدانىنىڭ قۇرامالارى. ۇستەل تەننيسىنەن وتكەن جارىستا دا «جەتىسۋ» گازەتى توپ جاردى. قالعان ەكى جۇلدە قاراساي اۋدانىنىڭ جۋرناليستەرىنە بۇيىردى.
سايىستىڭ كوركىن قىزدىرعان باستى سپورت – فۋتبول بولدى دەۋگە بولادى. ادەتتەگىدەي كىشى فۋتبول ەمەس, ويىندى ۇلكەن الاڭدا وتكىزۋدى ماقۇل كورگەن ۇيىمداستىرۋشىلار شاعىن ۇجىمداردىڭ قوسىلىپ, ءبىر كوماندا شىعارۋىنا مۇمكىندىك بەردى. بۇل دا – جوعارىدا ايتقان ارىپتەستىك سىيلاستىقتى ارتتىرۋدىڭ ءبىر جولى ەكەن دەستىك. فۋتبولشىلارعا اۋا رايى دا قارايلاسقانداي, تاس توبەدە شاقىرايىپ تۇرعان كۇن ءتۇس اۋا بۇلتقا كىرىپ, جۋاسىپ سالا بەردى. كۇن دە كۇيدىرمەگەن, جاڭبىر دا جاۋماعان قوڭىر سالقىن الاڭدا وتكەن دوپ دوداسىنىڭ باس كۋبوگىن «جەتىسۋ» تەلەارناسى جەڭىپ الدى. ال, «جەتىسۋ» گازەتىنىڭ جىگىتتەرى كۇمىس, «تالعار» گازەتىنىڭ ويىنشىلارى قولادان مەدال تاقتى. وبلىستىق ىشكى ساياسات باسقارماسىنىڭ توراعاسى رۋستام الپىسباەۆتىڭ ايتۋىنشا, باق وكىلدەرى مەن ىشكى ساياسات اراسىنداعى تۇسىنىستىك, اۋىزبىرلىك ولكەنىڭ ءوسىپ-وركەندەۋىنە زور ىقپال ەتەدى. سول سەبەپتى, جۋرناليستەر مەرەكەسىنە وراي وتكەن سايىسقا ۇيىمداستىرۋشىلار تاراپى دا ارنايى كوماندا شىعاردى.
الماس ءنۇسىپ,
«ەگەمەن قازاقستان»
الماتى وبلىسى