راشيد بايپاقباەۆتى 1982 جىلى سەمەيدە وقىپ جۇرگەندە كولىك قاعىپ, ەكى كۇن ەس-ءتۇسسىز جاتىپ, بەس رەت وتا جاسالىپتى. «كلينيكالىق ءولىمدى باسىمنان كەشىرگەسىن دەنساۋلىعىمدى قالپىنا كەلتىرۋ قاجەت بولدى. سول ماقساتتا ۆەلوسيپەد تەبە باستادىم», دەيدى ول. وبلىس اۋماعىنداعى اۋداندارعا شايتاناربامەن جەلدەي جۇيتكىپ بارىپ-كەلىپ جۇرەتىن جىگىت اعاسى ەلىمىزدىڭ وزگە وڭىرلەرىنە دە ەكى اياقتى كولىگىمەن ساياحاتتايتىن كورىنەدى. 2011 جىلى مىڭ شاقىرىمنان اساتىن استاناعا 9, 2012 جىلى الماتى ارقىلى تۇركىستان قالاسىنا 20 كۇندە جەتىپتى. وسى ۋاقىتقا دەيىنگى باعىندىرعان مەجەسى – 120 000 شاقىرىم. كۇنىنە ورتاشا ەسەپپەن 100-120 شاقىرىمدى ارتقا تاستايدى ەكەن. «ۆەلوسيپەد تەبۋ ادامنىڭ قان قىسىمىن قالپىنا كەلتىرىپ, ارتىق سالماقتان ارىلتادى. جۇرەك قان-تامىر جۇيەسىن, زات الماسۋ, تىنىس الۋ قىزمەتىن جاقسارتادى. ۇيقىسىزدىق دەرتىنە دە تاپتىرماس ەم», دەگەن اۋىل تۇرعىنى الداعى ۋاقىتتا اتىراۋ مەن اقتاۋعا بارۋدى جوسپارلاپ جۇرگەنىن ايتتى.
ازامات قاسىم, «ەگەمەن قازاقستان»
شىعىس قازاقستان وبلىسى, كوكپەكتى اۋدانى