كورمەنىڭ سالتاناتتى اشىلۋىنا ءبىلىم جانە عىلىم ءمينيسترى ە.ساعاديەۆ, ەۋروپا وداعى مەن ورتالىق ازيا ەلدەرىنىڭ ءبىلىم مينيسترلىكتەرىنىڭ وكىلدەرى, سونداي-اق «حالىقارالىق باعدارلامالار ورتالىعى» اق پرەزيدەنتى ج.مەلدەشوۆ قاتىستى. كورمە اياسىندا قوس ديپلوم باعدارلامالارى بويىنشا دوڭگەلەك ۇستەل وتىرىسى ۇيىمداستىرىلدى. وندا شەتەلدىك ءبىلىم بەرۋ ۇيىمدارى وزدەرىنىڭ ستيپەنديالىق جانە تاعىلىمدا باعدارلامالارىنىڭ شارتتارىمەن تانىستىردى.
«International Education Fair» كورمە اياسىندا شەتەلدىك جانە قازاقستاندىق ۋنيۆەرسيتەتتەر اراسىندا مەموروندۋمعا قول قويۋ ءراسىمى جانە ءبىلىم بەرۋ اگەنتتىكتەرىنىڭ كەزدەسۋلەرى ءوتتى. اۋقىمدى شارانىڭ باستى ماقساتى – قازاقستان رەسپۋبليكاسىنىڭ الەمدىك ءبىلىم كەڭىستىگىنە بىرىگۋ ءۇشىن حالىقارالىق ىنتىماقتاستىقتى نىعايتۋ بولىپ تابىلادى. سونداي-اق «بولاشاق» باعدارلاماسى ارقىلى جاستاردى شەتەلدىك جوعارى وقۋ ورىندارىندا ءبىلىم الۋعا تارتۋ. ايتۋلى شاراعا وتاندىق جانە شەتەلدىك 200-گە تارتا جوعارى وقۋ ورىندارى قاتىستى.
- «قازاقستان ورتالىق ازياداعى ءىرى ءبىلىم بەرۋ ورتالىقتاردىڭ بىرىنە اينالىپ وتىر. «بولاشاق» باعدارلاماسى اشىلعان 1993 جىلدان بەرى 9600 مامان ءبىتىرىپ كەلدى. بۇگىندە 70 مىڭعا جۋىق ستۋدەنت شەتەلدە وقيدى. حالىقارالىق ءبىلىم كورمەسىنىڭ اشىلۋى دۇنيەجۇزىنە تانىمال فرانتسيا, گەرمانيا سياقتى مەملەكەتتەردە تەگىن ءبىلىم الۋعا مۇمكىندىك بار. كورمەگە 90 - شەتەلدىك, 50 - قازاقستاندىق ۋنيۆەرسيتەت, جانە 60-قا جۋىق اگەنتتىكتەر قاتىسىپ وتىر. ءبىزدىڭ ەسەپتەۋىمىزشە مۇندا 200 مىڭعا جۋىق گرانت بار», دەيدى «حالىقارالىق باعدارلامالار ورتالىعى» اق پرەزيدەنتى ج.مەلدەشوۆ.
- ءبىزدىڭ ورتالىق فيلادەلفيا قالاسىنىڭ پەنسيلۆانيا شتاتىندا. ءبىز بولاشاق باعدارلاماسىمەن جۇمىس جاسايمىز. جىلىنا بىزگە ونعا جۋىق ستۋدەنت كەلەدى. قازاقستاندىق ستۋدەنتتەر بەلسەندى, ءتىل بىلۋگە دەگەن تالپىنىسى جوعارى. وكىنىشكە وراي ءتىل مەكتەپتەرىندە گرانت جوق, الايدا ۋنيۆەرسيتەتەردە باكالاۆر, ماگيستر, دوكتورانتۋرادا جەڭىلدىكتەر, گرانتتار بار», - دەيدى ەكسەتەر ۋنيۆەرسيتەتىنىڭ حالىقارالىق قاتىناستار ءبولىمىنىڭ مەنەدجەرى سارا گوددارد.
- ۆەنگرياعا وقۋعا تاپسىرۋ مەن ءۇشىن اسا قيىندىق تۋدىرمادى. مۇندا ەكى ەتاپتان وتەسىز, ءبىرى قۇجات تاپسىرۋ, ەكىنشىسى - ينتەرۆيۋ الادى. تەك اعىلشىن ءتىلىن جەتىك بىلسەڭ بولعانى. ءبىلىم بەرۋ دەڭگەيى وتە جوعارى, بىلىكتى پروفەسسورلاردان ءدارىس الامىز. دوكتورانتۋرانى 4 جىل وقيمىز. 2 جىل كۋرس, پراكتيكالىق ساباقتار, 2 جىل تەك زەرتتەۋمەن اينالىسامىز. مەن گرانتتا وقيمىن, 430 ەۆرو ستيپەنديا الامىن, ال ستۋدەنتتەر 130 ەۆرو كولەمىندە شاكىرتاقىعا يە. ال وقۋ اقىسى 1000-5000 ەۆرو ارالىعىندا», دەيدى ۆەنگرياداعى ELTE ۋنيۆەرسيتەتىنىڭ پەداگوگيكالىق جانە پسيحولوگيا فاكۋلتەتىنىڭ دوكتورانتى گۇلساۋلە قايرات.
ايتا كەتەيىك, استانادا 23-24 ماۋسىمدا «قازاقستان كونتسەرت زالىندا» وتسە, 26-27 ماۋسىمدا الماتى قالاسىندا ءال فارابي اتىنداعى قازاق ۇلتتىق ۋنيۆەرسيتەتى كىتاپحاناسىندا وتەدى. «حالىقارالىق باعدارلامالار ورتالىعى» اق «International Education Fair» حالىقارالىق ءبىلىم كورمەسىن وسىمەن ءتورتىنشى رەت وتكىزۋدە.
ايمان مۇقىشەۆا