«كىتاپحانا» ارت-گالەرەياسى مەن اۋەزحان قودار اتىنداعى زياتكەرلىك كلۋبىنىڭ قازاقستاندىق ارت-قاۋىمداستىقتىڭ تۋىندىلارىن كوپشىلىككە كەڭىنەن تانىستىرۋ ماقساتىندا وتكىزىپ وتىرعان كورمەسىنە تاقىرىبى, جانرى جانە ءستيلى سان الۋان سۋرەتشىلەر بۋىنىنىڭ ايرىقشا تۋىندىلارى كوپشىلىك نازارىنا ۇسىنىلدى. وتاندىق التى بىردەي اۆتوردىڭ كەسكىندەمە, گرافيكا, كەستەلەنگەن كارتينا, ساندىك-قولدانبالى ونەر سياقتى ءداستۇرلى بەينەلەۋ ونەر تۇرلەرىمەن قاتار, ينستاللياتسيا, سومداۋ سياقتى جاڭا تۇرلەرى دە ونەرسۇيەر قاۋىمعا تانىستىرىلدى.
قازاقستاندىق بەينەلەۋ ونەرىنىڭ تالانتتى وكىلدەرىن تەك ەلىمىزگە عانا ەمەس, الەمگە دە تانىتىپ, اۋقىمدى ارت-جوبالارعا قاتىستىرۋ ماقساتىندا كوپتەگەن ءىس-شارالار اتقارىلا باستاعانىن ايتقان «كىتاپحانا» ارت-گالەرەياسىنىڭ جەتەكشىسى دينا دوسپولوۆا: «قازىرگى ۋاقىتتا تەك بەينەلەۋ عانا ەمەس, باسقا دا ونەر تۇرلەرىنە, سول ونەر يەلەرىنىڭ ۇلتتىق سيپاتتاعى ايرىقشا تۋىندىلارىنا دەگەن كوپشىلىك نازارىن حالىقارالىق دەڭگەيگە كوتەرۋ ارقىلى مادەنيەتىمىزبەن قاتار, ەكونوميكامىزدى دا كوتەرە تۇسۋگە مۇمكىندىك بار», – دەدى.
كورمەگە جينالعان قاۋىم نازارىنا ەلىمىزدىڭ بىرقاتار وڭىرلەرىندە جەكە كورمەلەرىن وتكىزگەن, تۋىندىلارى پاريجدەگى ايگىلى لۋۆر مۇراجايىنىڭ كورمە زالدارىنا قويىلعان جاس سۋرەتشى-پەيزاجيست, الەمنىڭ ايتۋلى بايقاۋلارىنىڭ جەڭىمپازى انار ءابجانوۆانىڭ ەڭبەكتەرىمەن قاتار, كەستە ونەرىنىڭ ساقتالۋى ءۇشىن كوپ ەڭبەك ءسىڭىرىپ, ىلمەكپەن ورنەكتەلەتىن ەجەلگى قازاق كەستەسىنىڭ نەگىزىندە جاڭا ونەر ءتۇرى سانالاتىن ء«بىز كەستەنى» ويلاپ تابۋشى زەينەلحان مۇحامەدجاننىڭ دا جۇمىستارىن تاماشالادى. سونداي-اق, «ەتنو-اۆانگارد» دەپ اتالاتىن وزىندىك ستيل يەسى, سۋرەتشى-زەرگەر ءارى ءمۇسىنشى سەرجان باشيريۆتىڭ ابستراكتسيونيزم مەن مودەرن باعىتىنداعى اسسيمەتريالىق سىزىقتاردى حالىق ونەرىنىڭ تابيعي تۇرىمەن ۇيلەستىرە وتىرىپ, ءوزىنىڭ سۇيىكتى كومپوزيتسيالىق ءتاسىلى – اعاشتاردى ءتۇرلى تاسىلمەن ءارى قاراما-قارسى فاكتۋراداعى كۇمىس, تاس, سۇيەكتەرمەن ۇيلەستىرە قولدانعان ەڭبەكتەرى دە كەلۋشىلەردىڭ ىستىق ىقىلاسىنا بولەندى.
جىبەك ماتاعا شارلى قالاممەن سۋرە سالاتىن اۆتورلىق تەحنيكاسىنىڭ ارقاسىندا تانىمال بولعان كەسكىندەمەشى ورازبەك ەسەنباەۆتىڭ دا قورشاعان ورتانىڭ دالمە-ءدال كوشىرمەسىن بەرە ءبىلۋ قابىلەتى, پوەتيكالىق شىعارماشىلىعى ەجەلگى ۇيعىر حالقىنىڭ ساندىك اسقاباقتاردان قۋىرشاق جاساۋ ونەرىنەن باستاۋ الاتىن ۇيعىر سۋرەتشىسى حاشيم قۇربانوۆ كەسكىندەمەلەرى, ءمۇسىنشى, ديزاينەر ارمان بايمۇراتوۆتىڭ شىعارماشىلىق ناقىشى, سيپاتى مەن وبرازدارىنىڭ مازمۇنى جاعىنان كوپ قىرلى, رەاليزم مەن ابستراكتسيانىڭ توعىسۋىنان تۋىنداعان جۇمىستارى دا كوپشىلىكتى ءتانتى ەتتى.
ميرا بايبەك, «ەگەمەن قازاقستان» الماتى