قالاي دەگەندە دە قازىرگى كۇنى مۇندا ورىنبور وبلىسىمەن بايلانىس وڭ جولعا قويىلعان. بۇل ماسەلە شەكارالاس وڭىرلەر باسشىلارى قول قويعان ءوزارا كەلىسىمگە سايكەس شەشىمىن تاۋىپ كەلەدى. ەگەر شەكارالاس ايماقتار اراسىندا وتكىزۋ بەكەتتەرىنىڭ قىزمەتى جاقسى جولعا قويىلسا, بۇل جاعداي ساۋدا-ەكونوميكالىق, الەۋمەتتىك, رۋحاني جانە مادەني قارىم-قاتىناستاردى تەرەڭدەتە تۇسۋگە جول اشادى. وسىنداي جول ءبىرىنشى كەزەكتە اقتوبە وڭىرىندەگى «جايسان» اۆتوكولىك وتكىزۋ بەكەتى ارقىلى اشىلعان. اقتوبە وبلىسى اكىمدىگى سىرتقى بايلانىستار جانە تۋريزم باسقارماسىنىڭ باسشىسى ەرمەك كەنجەحان ۇلىنىڭ ايتۋىنشا, مۇنداعى وتكىزۋ جولاعى تاۋەلسىزدىكتىڭ العاشقى جىلدارىندا ەكەۋ عانا بولسا, قازىر سەگىزگە جەتكىزىلگەن. تۇتاستاي العاندا وڭىردەگى باستى وتكىزۋ بەكەتىنىڭ جاڭعىرتىلىپ, قايتادان تولىق جوندەۋدەن وتكىزىلگەندىگى اۆتوكولىك تاسقىنى مەن جۇك اينالىمىنىڭ بىرنەشە ەسە وسۋىنە سەپتىگىن تيگىزىپتى. وسى ارادا اقتوبە مەن ورىنبور سەكىلدى شەكارالاس ايماقتار اراسىنداعى جول «باتىس ەۋروپا – باتىس قىتاي» حالىقارالىق كولىك ءدالىزى ارقىلى توعىساتىنىن وقىرماندار نازارىنا سالا كەتكەن ءجون. ونىڭ اقتوبە وبلىسىنداعى ۇزىندىعى 628 شاقىرىم. جوعارىدا ايتىلعان اۆتوكولىك پەن جۇك تاسىمالىنىڭ نەگىزگى بولىگى دە وسى جول ارقىلى وتەدى. ايتسە دە, رەسەي جاعىنداعى «ساگارچين» وتكىزۋ بەكەتى ءالى كۇنگە دەيىن جوندەلمەي, سول كۇيىندە تۇر ەكەن. بۇل ماسەلە وتكەن جىلى قازان ايىندا قازاقستان مەن رەسەيدىڭ شەكارالاس وڭىرلەرى باسشىلارىنىڭ اراسىندا وتكىزىلگەن فورۋم كەزىندە اقتوبە وبلىسىنىڭ اكىمى بەردىبەك ساپارباەۆتىڭ تاراپىنان قويىلعان. وزەكتى ماسەلە رەسەيلىكتەردىڭ تاراپىنان تۇسىنىستىكپەن قابىل الىنىپتى. ولار اقتوبە وبلىسىنىڭ مارتوك اۋدانىمەن شەكتەسەتىن تۇسىندا ورنالاسقان «ساگارچين» وتكىزۋ بەكەتىن بۇگىنگى بيىك تالاپتارعا ساي جاساقتاۋ جونىندەگى جوبانى 2018 جىلعا دەيىن اياقتاۋعا ءسوز بەرىپتى. بۇعان قوسا اقبۇلاق اۋدانى اۋماعى ارقىلى ورىنبورعا بارار جولداعى 40 شاقىرىمدى قۇرايتىن جول دا جوندەۋدى قاجەت ەتەتىنىنە اۆتوكولىكپەن ءجۇرۋ كەزىندە ايقىن كوز جەتكىزدىك. كورشىلەر قازىر بۇل جولدى قالپىنا كەلتىرۋ جۇمىستارىن باستاپ وتىر. قازاق ەلىنىڭ قاتپار-قاتپار شەجىرەسى مەن تاريحى ورىنبور وبلىسىنىڭ ارحيۆتەرىندە جاتقانى دا عىلىمي-رۋحاني بايلانىستاردى ۇلعايتا تۇسۋگە نەگىز قالايدى. ورىنبور قازاقتارى قازاقستانداعى, سونىڭ ىشىندە, كورشىلەس اقتوبە وبلىسىنداعى وزگەرىستەرگە جانە مۇنداعى جارقىن جوبالارعا سۇيىسپەنشىلىكپەن قارايتىنى اڭعارىلادى. اسىرەسە, ورىنبورلىق قازاق جاستارى كۇندىك جۇرتى – قازاقستانداعى ارىپتەستەرىمەن تىعىز بايلانىس ۇستاۋعا ىقىلاستى, دەدى گازەت تىلشىسىنە ورىنبور وبلىسىنداعى ورىس-قازاق قاۋىمداستىعى اراسىنداعى الەۋمەتتىك-مادەني قارىم-قاتىناستاردى قولداۋ مەن دامىتۋ جونىندەگى كوممەرتسيالىق ەمەس ۇيىمنىڭ ديرەكتورى ايتپاي جالعاسحان ۇلى. ءبىز اڭگىمەمىزدىڭ باسىندا اقتوبە وبلىسىمەن شەكارالاس وڭىرلەردىڭ ءبىرى وزبەكستان ەكەنى جونىندە ءسوز ساباقتاعان ەدىك. بۇل قازاق جۇرتىنا ەڭ جاقىن حالىق – قاراقالپاق ەلى بولىپ تابىلادى. اشىعىن ايتقاندا, بۇعان دەيىن وزبەكستانمەن ءوزارا بايلانىستار جانە كورشىلىك قارىم-قاتىناستار ماسەلەلەرىندە توماعا-تۇيىقتىق كورىنىستەرى ورىن الىپ كەلگەنى راس. دەگەنمەن, سوڭعى كەزدە بۇل كورشىلەس ءارى ءتۇبى ءبىر تۋىستاس ەلمەن قارىم-قاتىناس جاقسارىپ, وڭ سيپات العانى دا انىق.
اقتوبە وبلىسىنىڭ رەسەيدىڭ ورىنبور وبلىسى اراسىنداعى شەكاراسى ۇزىندىعى ارتىق تا ەمەس, كەم دە ەمەس – تۇپ-تۋرا 1000 شاقىرىم قۇرايدى. سونداي-اق, اقتوبە وبلىسىنىڭ وڭتۇستىك -شىعىس بولىگىندەگى بايعانين جانە شالقار اۋداندارى وزبەكستانمەن شەكتەسەدى.