وتاندىق اقپارات قۇرالدارى قايتا جاڭعىردى
وسىدان ءبىر جىل بۇرىن ەلباسىنىڭ تىكەلەي تاپسىرماسىمەن اقپارات جانە كوممۋنيكاتسيالار مينيسترلىگى قۇرىلىپ, ونىڭ الدىنا بىرقاتار مىندەت جۇكتەلگەنى بەلگىلى. اسىرەسە, مەملەكەت باسشىسى جاڭادان قۇرىلعان مينيسترلىككە اقپاراتتىق كەڭىستىكتى نىعايتۋدى, وتاندىق ماسس-مەديانىڭ دەڭگەيىن كوتەرۋدى, مەملەكەتتىك قىزمەت كورسەتۋدىڭ تيىمدىلىگىن ارتتىرۋدى, سونداي-اق, تسيفرلاندىرۋ تەحنولوگياسىن دامىتا وتىرىپ, بايلانىستىڭ ساپاسىن جاقسارتۋدى تاپسىرعان بولاتىن.
ءمينيستردىڭ مالىمدەۋىنشە, مەديا-جوبالاۋ سالاسى بىرىڭعاي جۇيەگە ءتۇسىپ, مەملەكەتتىك اقپاراتتىق تاپسىرىستى جۇزەگە اسىرۋ تاسىلدەرى قايتا قارالعان. وتاندىق تەلەارنالاردى جاڭعىرتۋعا ەرەكشە كوڭىل ءبولىنىپ, تەلەونىمدەردىڭ ساپاسى ارتقان.
«بۇگىندە وتاندىق سەريالدارىمىزعا دەگەن حالىقتىڭ ىقىلاسى كۇننەن كۇنگە ارتىپ كەلەدى. مىسالى, بىلتىر «حابار» مەن «قازاقستان» تەلەارنالارى 16 سەريال ءتۇسىردى. ولاردىڭ اراسىندا «اكە», ء«ان-اعا», «ىڭكار جۇرەك», «اقىلدىڭ كىلتى» سياقتى ءساتتى جوبالار جۇرتشىلىق تاراپىنان جاقسى باعالاندى. ءبىزدىڭ بىرقاتار وتاندىق سەريالدارىمىزدى كورشى مەملەكەتتەردىڭ كورەرمەندەرى دە تاماشالاپ وتىر», دەدى مينيستر.
مينيسترلىك انالوگتىق حابار تاراتۋدان بىرتىندەپ تسيفرلىق حابار تاراتۋعا كوشۋدى دە بەلسەندى جۇرگىزىپ كەلەدى. وسى ورايدا, مينيستر وتاندىق سپۋتنيكتىك تەلەۆيزيا جايىنا دا كەڭىنەن توقتالدى. ونىڭ ايتۋىنشا, بۇگىندە ۇلتتىق سپۋتنيكتىك وپەراتوردىڭ ابونەنتى 1 ميلليون 300 مىڭعا جۋىقتاعان. بۇل كورەرمەندەردىڭ وتاندىق سپۋتنيكتىك تەلەۆيزياعا باسىمدىق بەرەتىنىن ايشىقتايدى.
مينيسترلىك قۇرىلعالى مەرزىمدى باسىلىمداردا دا ۇلكەن وزگەرىستەر بولعان. ايتالىق, حالىقارالىق تاجىريبە مەن وقىرمانداردىڭ قالاۋى ەسكەرىلە وتىرىپ, «ەگەمەن قازاقستان» مەن «كازاحستانسكايا پراۆدا» گازەتتەرىنە رەديزاين جۇرگىزىلدى. قازىر بۇل گازەتتەر باستان-اياق ءتۇرلى-ءتۇستى بولىپ شىعىپ جاتىر. سونىمەن قاتار, گازەتتەردىڭ سايتى دا قايتا جاڭارىپ, ىقپالدى اقپاراتتىق رەسۋرسقا اينالعان.
زاڭ جوباسى ازاماتتاردىڭ مۇددەسىن قورعايدى
اقپارات جانە كوممۋنيكاتسيالار مينيسترلىگى قوعامدىق سانانى جاڭعىرتۋ جونىندەگى «رۋحاني جاڭعىرۋ» باعدارلاماسى اياسىندا دا اۋقىمدى جوبالاردى قولعا الىپتى. سونىڭ ىشىندە ەلىمىزگە ەڭبەگى سىڭگەن, قاجىرلى ەڭبەگىمەن كوزگە تۇسكەن ازاماتتاردى انىقتاۋعا ارنالعان «100 جاڭا ەسىم» ارنايى جوباسىن اتاپ وتۋگە بولادى. ەرەكشە ادامدار ەسىمىنە لايىق ازاماتتاردى انىقتاۋدى مينيسترلىك بەلگىلى ساراپشىلارمەن, ەلگە ەڭبەگى سىڭگەن كورنەكتى قايراتكەرلەرمەن اقىلداسا وتىرىپ جۇرگىزبەك.
«ەl.kz پورتالىندا «100 جاڭا ەسىم» جوباسىنا وتىنىمدەردى قابىلداۋ باستالدى. وسى مۇمكىندىكتى پايدالانىپ, بارشاڭىزدى جوباعا اتسالىسۋعا, ايرىقشا جەتىستىكتەرىمەن, بىرەگەي قاسيەتتەرىمەن ءتانتى ەتكەن ادامداردى تاڭداۋعا ۇلەس قوسۋعا شاقىرامىن», دەدى مينيستر.
وسىدان ءبىراز ۋاقىت بۇرىن مينيسترلىك ەلىمىزدىڭ كەيبىر نورماتيۆتىك-قۇقىقتىق اكتىلەرىنە اقپارات جانە كوممۋنيكاتسيا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ازىرلەگەنى بەلگىلى. قوعام قىزۋ تالقىلاعان زاڭ جوباسى 4 كودەكس جانە 12 زاڭ بويىنشا 200-دەن استام تۇزەتۋدى قامتيدى. ءمينيستردىڭ مالىمدەۋىنشە, ولاردىڭ ءبارى دە قاراپايىم ادامداردىڭ مۇددەسىن قورعاۋدى كوزدەيدى. زاڭ جوباسى, اسىرەسە, بالالاردى كەلەڭسىز اقپاراتتاردان قورعاۋدى, اقپارات قۇرالدارى بەتىندە زورلىق-زومبىلىققا ۇشىراعان جەتكىنشەكتەر تۋرالى وڭدى-سولدى مالىمەت تاراتۋعا تىيىم سالۋدى قاراستىرادى.
ء«بىز زورلىق-زومبىلىققا ۇشىراعان بالالاردىڭ فوتوسۋرەتىن, بەينەماتەريالىن بالانىڭ ءوزىنىڭ جانە اتا-اناسىنىڭ كەلىسىمىنسىز جاريالاۋعا تىيىم سالماقشىمىز. مۇنداي اقپاراتتار ەرتەڭگى كۇنى جەتكىنشەكتىڭ ومىرىنە ۇلكەن كەسىرىن تيگىزۋى مۇمكىن. كەيبىر اقپارات قۇرالدارى ارزان سەنساتسيا قۋىپ, ءجابىر كورگەن جاننىڭ جاعدايىن ويلاماي, دەرەكتەردى بەي-بەرەكەت جاريالاي بەرەدى. بۇل – دۇرىس ەمەس.
ايشىلىق الىس جەرلەردەن جىلدام حابار العىزعان...
ەلباسىنىڭ مينيسترلىككە تاپسىرعان باستى مىندەتتەرىنىڭ ءبىرى – كوممۋنيكاتسيالىق ينفراقۇرىلىمدى دامىتۋ جانە تسيفرلىق تەحنولوگيانى قولدانا وتىرىپ, حالىقتى ينتەرنەتپەن قامتاماسىز ەتۋ. ۆەدومستۆونىڭ وسى باعىتتا قولعا العان شارالارىنىڭ ناتيجەسىندە بىلتىر ينتەرنەت قولدانۋشىلاردىڭ قاتارى حالىقتىڭ 77 پايىزىن قۇراپتى. ال ەلدىڭ 96 پايىزى ستاندارتتى 2G ۇيالى بايلانىس قىزمەتىمەن قامتاماسىز ەتىلگەن. 87 پايىزى – 3G قىزمەتىمەن, ال 69 پايىزى 4G ستاندارتتى جەلىسىنە قوسىلعان. ەندى بيىلعى جىلدىڭ اياعىنا دەيىن وسى 4G جەلىسىنە 51 اۋدان ورتالىعىن قوسۋ جوسپارلانۋدا. وسىلايشا, ەلىمىزدىڭ بارلىق اۋدان ورتالىعى جىلدامدىعى ەڭ جوعارى ينتەرنەتتى قولدانۋعا مۇمكىندىك الادى
داۋرەن اباەۆتىڭ ايتۋىنشا, قازىرگى كۇنى بارلىق ەلدى مەكەندەردە ينتەرنەت بايلانىسى بار. بىراق ساپاسى تالاپقا ساي كەلمەيدى. وسىنى ەسكەرە كەلە مينيسترلىك بايلانىس وپەراتورلارىمەن بىرلەسىپ, اۋىلدىق جەرلەردە وپتيكالىق-تالشىقتى جەلى تارتۋدى باستاپ كەتكەن. جوبا اياسىندا شامامەن 5 ميلليونعا جۋىق ادام تۇراتىن 1 900 اۋىلدى جىلدامدىعى جوعارى ينتەرنەتكە قوسۋ جوسپارلانۋدا. مينيسترلىك حالىقتىڭ تسيفرلىق ساۋاتتىلىعىن ارتتىرۋدى دا باستى نازارعا العان. جەرگىلىكتى اكىمدىكتەردىڭ تۇرعىنداردى تسيفرلىق ماشىققا ۇيرەتۋگە كوڭىل بولە باستاعانىنىڭ ارقاسىندا بۇگىندە ەلدىڭ تسيفرلىق ساۋاتتىلىق دەڭگەيى 76 پايىزدان اسىپتى.
ەلەكتروندىق ۇكىمەت – حالىققا قولايلى قىزمەت
بۇگىندە قۇجات رەسىمدەۋ ۋاقىتىن قىسقارتۋ, حالىققا كورسەتىلەتىن قىزمەت ساپاسىن ارتتىرۋ, ولاردى ەلەكتروندىق فورماتقا كوشىرۋ بويىنشا اۋقىمدى شارالار جۇرگىزىلىپ جاتىر. «ەلەكتروندى ۇكىمەت» پورتالىنىڭ كومەگىمەن جۇرتشىلىق ۇيىنەن شىقپاي-اق, بيزنەسىن تىركەۋگە, نەكەنى زاڭداستىرۋعا, ليتسەنزيا مەن رۇقساتتاما قۇجاتتارىن الۋعا, بالاباقشا كەزەگىنە بالاسىن تىركەتۋگە مۇمكىندىك تۋعان. ءمينيستردىڭ كەلتىرگەن دەرەگى بويىنشا, بۇگىندە پورتال ارقىلى 758 قىزمەت ءتۇرى كورسەتىلىپ, ونى قولدانۋشىلاردىڭ سانى 6 ميلليون ادامدى قۇراعان.
قازىرگى تاڭدا «ەلەكتروندى ۇكىمەتتىڭ» موبيلدىك قوسىمشاسى دا پايدا بولعان. وسى ارقىلى قازاقستاندىقتار 80-نەن استام قىزمەت ءتۇرىن الا الادى. بۇگىندە پورتالدىڭ موبيلدىك نۇسقاسىندا 2,2 ملن ازامات تىركەلىپتى», دەدى ول.
مەملەكەتتىك قىزمەت ساپاسىن ارتتىرۋعا نەگىز بولىپ وتىرعان تاعى ءبىر ءتاسىل – «ازاماتتارعا ارنالعان ۇكىمەت» مەملەكەتتىك كورپوراتسياسى. بۇل بىرىڭعاي قۇرىلىم 350 فرونت-كەڭسەنى بىرىكتىرىپ, جىل سايىن 37 ميلليوننان استام قىزمەت كورسەتەدى ەكەن.
«ازاماتتارعا ارنالعان ۇكىمەت» جۇمىسىنىڭ تاعى ءبىر ماڭىزدى باعىتى – قىزمەتتەردىڭ شالعاي اۋىل تۇرعىندارىنا قولجەتىمدى بولۋى. وسى ماقساتتا قازىر تۇتاس ەل اۋماعىندا 70 ءموبيلدى قىزمەت ورتالىعى جۇمىس ىستەيدى. ولار اۋىلدارعا جىلىنا 13 مىڭنان استام ساپار ۇيىمداستىرادى. سونىمەن قاتار, «قازپوشتامەن» بىرلەسىپ, مەملەكەتتىك قىزمەتتەردى پوشتا كەڭسەلەرىندە كورسەتۋ جوباسى جۇزەگە اسىرىلۋدا.
الەۋمەت ساۋالى – مينيستر جاۋابى
مينيسترلىك بالالاردى جاعىمسىز اقپارات كوزدەرىنەن قورعاۋ ءۇشىن ارنايى «بالالار پاكەتى» جوباسىن ىسكە قوسقالى وتىر. بۇل ينتەرنەت-پاكەتتىڭ ىشىندە جەتكىنشەكتەردى بىلىمگە دەگەن ىنتاسىن ارتتىراتىن, وي-تانىمىن كەڭەيتەتىن سايتتار ءتىزىمى عانا ەنگىزىلگەن. بۇل قىزمەت ءتۇرىن 2017 جىلدىڭ ءىىى توقسانىندا ىسكە قوسۋ جوسپارلانىپ وتىر.
ءمينيستردىڭ بايانداماسىنان كەيىن سۇراق-جاۋاپقا كەزەك بەرىلدى. بۇل ۇنقاتىسۋ الاڭىنا ەلىمىزدىڭ بارلىق وڭىرىندەگى اقپارات قۇرالدارى ونلاين-رەجىم ارقىلى قاتىسىپ, ساۋالدارىن قويدى.
العاشقى سۇراقتى اقمولا وبلىستىق «ارقا اجارى» گازەتىنىڭ باس رەداكتورى قايىرباي تورەعوجا جولدادى. ول جۋرناليستەردىڭ الەۋمەتتىك ماسەلەسىن كوتەرىپ, باسپانالى بولۋ مۇمكىندىگىن سۇرادى. ءمينيستردىڭ ايتۋىنشا, جۋرناليستەر قاۋىمى – بيۋدجەتتىك قىزمەتكەرلەرگە جاتپايدى. سوندىقتان جەكەمەنشىك مەكەمەلەردە جۇمىس ىستەپ, جوعارى جالاقى الۋى مۇمكىن دەپ ەسەپتەلەدى. «بايىرعىدان قالىپتاسىپ قالعان وسى تۇسىنىكتى وزگەرتۋ بىزگە قيىنعا سوعادى. دەگەنمەن دە, جۋرناليستەردىڭ الەۋمەتتىك جاعىنان قامتۋ جولدارىن ىزدەستىرىپ جاتىرمىز. الداعى ۋاقىتتا وڭ شەشىمىن تابادى دەپ ويلايمىن», دەدى مينيستر.
ال باتىس قازاقستان وبلىستىق «ورال ءوڭىرى» گازەتىنىڭ باس رەداكتورى باۋىرجان عۇبايدۋللين الەۋمەتتىك جەلىلەردىڭ كەيبىر پايدالانۋشىلارى كەيدە ادامداردىڭ جەكە باسىنا, رەسمي تۇلعالاردىڭ نەمەسە مادەنيەت, ادەبيەت سالاسىنداعى ەلگە تانىمال تۇلعالاردىڭ ار-نامىسىنا ءتيىپ جاتاتىنىن ايتا كەلىپ, جالپى الەۋمەتتىك جەلىدە بۇقارالىق مادەنيەتتى قالىپتاستىرۋدىڭ وتە وزەكتى ماسەلە ەكەنىن كولدەنەڭ تارتتى. «وسى جايت جاڭادان دايىندالىپ جاتقان بۇقارالىق اقپارات قۇرالدارى تۋرالى زاڭدا قاراستىرىلعان با؟», دەپ سۇرادى.
«شىندىققا جاناسپايتىن اقپارات تاراتۋ ادامنىڭ ومىرىنە دە كەسىرىن تيگىزۋى مۇمكىن. ءتىپتى, تەكسەرىلمەگەن دەرەك ون-ون بەس جىل وتكەننەن كەيىن دە الدىڭنان شىعۋى مۇمكىن. مىسالى, اقش-تا ۆيزا بەرەردە ادامنىڭ الەۋمەتتىك جەلىلەردە نە جازعانى تەكسەرىلەدى. جازبالارىنا جاسالعان ساراپتاما قورىتىندىسىنان كەيىن الگى ادامعا ۆيزا بەرىلمەۋى دە مۇمكىن. ءبىزدىڭ وي جۇيەمىز دە تۇبىندە تۇزەلىپ, قالىپتاسادى دەپ ويلايمىن», دەدى ءوز جاۋابىندا مينيستر.
مينيسترمەن كەزدەسۋ بارىسىندا جۋرناليستەر بۇقارالىق اقپارات قۇرالدارى وكىلدەرىنىڭ مارتەبەسىن انىقتاۋ, بىلىكتىلىگىن جەتىلدىرۋ, وڭىرلىك باق-تى دامىتۋ جايىنداعى كوپتەگەن ساۋالدارىن قويدى. ولاردىڭ بارىنە ەگجەي-تەگجەيلى جاۋاپ بەرىلدى.
كەزدەسۋ سوڭىندا داۋرەن اباەۆ مۇنداي اشىق ۇنقاتىسۋ ازاماتتارعا عانا ەمەس, مينيسترلىككە دە پايدالى ەكەنىن, بۇل جۇمىس بارىسىن ءارى قاراي جەتىلدىرۋگە ءتيىمدى تەتىك بولاتىنىن اتاپ ءوتتى. سونداي-اق, ول جيىندا ايتىلعان ۇسىنىس-پىكىر, ساۋالداردىڭ ەشقايسىسى ەسكەرۋسىز قالماي, 10 كۇننىڭ ىشىندە جاۋاپتارىمەن مينيسترلىكتىڭ سايتىندا جاريالاناتىنىن جەتكىزدى.
قىمبات توقتامۇرات, «ەگەمەن قازاقستان»
سۋرەتتەردى تۇسىرگەن ەرلان وماروۆ, «ەگەمەن قازاقستان»