كەزدەسۋ بارىسىندا قازاقستان مەن دۇنيەجۇزىلىك دەنساۋلىق ساقتاۋ ۇيىمى اراسىنداعى ىنتىماقتاستىقتى دامىتۋ پەرسپەكتيۆالارى تالقىلاندى. گۇلشارا ابدىقالىقوۆا ج.ياكابتى تەدروس ادحانومنىڭ دۇنيەجۇزىلىك دەنساۋلىق ساقتاۋ ۇيىمىنىڭ جاڭا باس ديرەكتورى بولىپ تاعايىندالۋىمەن قۇتتىقتادى. مەملەكەتتىك حاتشى دۇنيەجۇزىلىك دەنساۋلىق ساقتاۋ ۇيىمىنىڭ قوعامدىق دەنساۋلىق ساقتاۋ جۇيەلەرى مەن قىزمەتتەرىن نىعايتۋعا باعىتتالعان بارلىق باستامالارىنىڭ ماڭىزدىلىعىن اتاپ ءوتتى. گۇلشارا ابدىقالىقوۆا ەلىمىزدىڭ دەنساۋلىق ساقتاۋدىڭ, سونىڭ ىشىندە بۇۇ-نىڭ ورنىقتى دامۋ ماقساتتارىنا قول جەتكىزۋدىڭ وزەكتى ماسەلەلەرىن شەشۋ ءۇشىن دۇنيەجۇزىلىك دەنساۋلىق ساقتاۋ ۇيىمىمەن بىرلەسكەن جوبالاردى ىسكە اسىرۋعا بەلسەندى اتسالىسىپ وتىرعانىن ايتتى. مەملەكەتتىك حاتشى قازاقستان رەسپۋبليكاسىنداعى دەنساۋلىق ساقتاۋدى دامىتۋدىڭ مەملەكەتتىك باعدارلاماسىن ىسكە اسىرۋدا, اتاپ ايتقاندا انا مەن بالا دەنساۋلىعىن قورعاۋ, وكپە اۋرۋىنىڭ الدىن الۋ ءارى ونىمەن كۇرەسۋ, مەديتسينالىق جانە فارماتسەۆتيكالىق ءبىلىم بەرۋ جانە ت.ب. ماسەلەلەر بويىنشا دۇنيەجۇزىلىك دەنساۋلىق ساقتاۋ ۇيىمى تاراپىنان قولداۋ كورسەتىلىپ جاتقانىن اتاپ ءوتتى. اڭگىمەلەسۋ بارىسىندا دۇنيەجۇزىلىك دەنساۋلىق ساقتاۋ ۇيىمىنىڭ گەوگرافيالىق تۇرعىدان شالعايدا ورنالاسقان الماتى قالاسىنداعى العاشقى مەديتسينالىق-سانيتارلىق كومەك كورسەتۋ ءوفيسى قىزمەتىنىڭ ماسەلەلەرى تالقىلاندى. سونداي-اق, گۇلشارا ابدىقالىقوۆا قازاقستاننىڭ الماتى قالاسىندا بۇۇ-نىڭ كوپجاقتى ديپلوماتيا جونىندەگى حابىن قۇرۋ باستاماسى تۋرالى ايتتى. ج.ياكاب قازاقستاننىڭ دەنساۋلىق ساقتاۋ سالاسى بويىنشا جۇرگىزىپ وتىرعان ساياساتىنا ريزاشىلىق ءبىلدىردى.
قىمبات توقتامۇرات, «ەگەمەن قازاقستان»