20 ماۋسىم كۇنى وڭتۇستىك قازاقستان وبلىسىندا ۇلتتىق بىرىڭعاي تەستىلەۋدەن 4266 ءبىتىرۋشى تەست تاپسىرىپ, وبلىستىڭ ورتاشا كورسەتكىشى – 72,3 بالدى كورسەتتى.
جالپى كەشە 514 بالا 100 بالدان جوعارى جيناسا, ەڭ جوعارى 137 بالدى شىمكەنت قالاسى, «بولاشاق» مەكتەبىنىڭ وقۋشىسى يساتاي ءبىرجان جينادى. ال, 136 بالدى شىمكەنت قالاسى №47 مەكتەپ-گيمنازياسىنىڭ وقۋشىسى جولداسبەكوۆا ايگەرىم داستانبەكقىزى جيناپ وتىر.
ءبىرىنشى كۇنگى سىناقتىڭ قورىتىندىسىمەن وبلىستىڭ ورتا بالى – 72,3 بالدى قۇرادى. اتاپ ايتقاندا: شىمكەنت جانە سايرام - 75,5, قازىعۇرت - 74,3, تۇلكىباس - 72,7, سوزاق - 70,6, سارىاعاش -70,4, بايدىبەك - 70,2, ماقتارال - 67,03 بالدى كورسەتتى.
تەستىلەۋ كەزىندە ۇبت قاعيداتى تالاپتارىنىڭ بۇزىلۋى ورىن العان جوق.
ايتا كەتەيىك, وبلىس بويىنشا 2016-2017 وقۋ جىلىندا 11 سىنىپتى 32964 وقۋشى اياقتاسا, ونىڭ 21668-ءى جوعارى وقۋ ورنىنا ءتۇسۋ ءۇشىن سىناق تاپسىرۋعا نيەت بىلدىرگەن. ياعني,78,2 پايىزى ۇبت تاپسىرۋعا ءوتىنىش بەرگەن.