توپ باستاۋشى «استانا» بۇل تۋردا «اقتوبەمەن» كۇش سىناسىپ, تەگەۋرىندى قارسىلىققا تاپ بولدى. دەگەنمەن, تەمىرجولشىلار جىگەرلى ويىننىڭ ارقاسىندا الدىمەن ەسەپتى تەڭەستىرىپ, ودان كەيىن قاتارىنان ەكى گول سوعىپ, ماڭىزدى جەڭىسكە يە بولدى. ال «قايرات» بولسا, بيىلعى بىرىنشىلىكتىڭ جۇلدەسىنەن ءۇمىتتى «توبىلدى» ءوز الاڭىندا تىزە بۇكتىردى. قىزىلوردادا جەرگىلىكتى «قايسارمەن» ويناعان «ورداباسى» دا قانجىعاعا ءۇش ۇپاي بايلاپ, شىمقالاعا ولجالى ورالدى.
قالاي بولعان كۇندە دە, چەمپيوناتتاعى التىنشى ورىن ءۇشىن ارپالىس كۇشەيە ءتۇستى. بۇعان سەبەپ بولعان جايتتىڭ ءبىرى – «ەرتىس» كۇتپەگەن جەردەن «تارازعا» ەسە جىبەردى. ءسويتىپ, جامبىلدىق فۋتبولشىلار تۋرنير كەستەسىندە «اتىراۋ» مەن «اقجايىقتى» باسىپ وزىپ, التىنشى ورىنداعى «قايسارعا» ءبىر تابان جاقىنداي ءتۇستى.
بۇل تۋردا قاراعاندىنىڭ «شاحتەرى» كەزەكتى جەڭىسىنە قول جەتكىزىپ, تۋرنير كەستەسىندەگى جاعدايىن تۇزەپ الدى. ال كوش سوڭىنداعى «اقتوبە» «كەنشىلەردەن» ءۇش ۇپايعا قالىپ كەلەدى. بىراق, اقتوبەلىكتەردىڭ ءبىر ويىنى كەم.
سۇرمەرگەندەر اراسىنداعى باسەكەدە جەرار گوۋدىڭ («قايرات», 13 دوپ) كوكجەلكەسىنەن جۋنيور كابانانگا («استانا») قاراپ تۇر. بۇل شابۋىلشى سوڭعى ءتورت ويىندا التى دوپ سوعىپ, گول سانىن 12-گە جەتكىزدى. ال, الەكسەي ششەتكيننىڭ («توبىل») ەنشىسىندە ازىرگە 8 گول بار.
16-تۋرداعى كەزدەسۋلەردە مىناداي ناتيجەلەر تىركەلدى:
«قايرات» – «توبىل» – 2:0 (0:0), يسلامحان, 64 – پەنالتيدەن (1:0). يساەل, 84 (2:0). «قايسار» – «ورداباسى» – 0:1 (0:0), فونتانەلو, 58 (0:1). «شاحتەر» – «اتىراۋ» – 2:0 (1:0), ستانوەۆيچ, 1 (1:0). ستانوەۆيچ, 89 (2:0). «وقجەتپەس» – «اقجايىق» – 2:1 (2:0), ماروچكين, 28 (1:0). كوزلوۆ, 36 (2:0). ازۋكا, 58 – پەنالتيدەن (2:1). «تاراز» – «ەرتىس» – 2:0 (2:0), زاينۋتدينوۆ, 13 (1:0). سەيداحمەت, 24 (2:0). «اقتوبە» – «استانا» – 2:4 (2:1), زەنكوۆيچ, 18 (1:0). تۆۋماسي, 19 (1:1). گراحوۆاتس, 45+2 – ءوز قاقپاسىنا (2:1). كابانانگا, 47 (2:2). تۆۋماسي, 56 (2:3). مۋجيكوۆ, 86 (2:4).
كەلەسى, 17-تۋر ماۋسىمنىڭ 24 جانە 25 كۇندەرى وتەدى: «ەرتىس» – «قايسار», «ورداباسى» – «قايرات», «اتىراۋ» – «اقتوبە», «استانا» – «وقجەتپەس», «توبىل» – «شاحتەر», «اقجايىق» – «تاراز».
قايرات ءابىلدينوۆ, «ەگەمەن قازاقستان»