جاھان جۇرتشىلىعى كوز تىككەن كورمە

ەلىمىزدىڭ ەڭسەسى بيىك ەكەنىن, ۇلتىمىزدىڭ ۇلىلىعىن, مەم­لە­كەت­تىلىگىمىزدىڭ مىعىمدىعىن, قازاق حالقىنىڭ جاسامپاز قاسيەتتەرىن جاھان جۇرتشىلىعىنا پاش ەتكەن تاريحي ساتكە كۋا بولۋ ءۇشىن كوپتەگەن مەملەكەتتەردىڭ پرەزيدەنتتەرى مەن ۇكىمەت باسشىلارى كەلدى. مارتەبەلى مەي­مان­داردىڭ قاتارىندا رەسەي پرە­زيدەنتى ۆلاديمير پۋتين, قحر توراعاسى سي تسزينپين, وز­بەكستان پرەزيدەنتى شاۆكات ميرزيەەۆ, قىرعىزستان پرەزيدەنتى المازبەك اتامباەۆ, تاجىكستان پرەزيدەنتى ەمومالي راحمون, بەلارۋس پرەزيدەنتى الەكساندر لۋكاشەنكو, اۋعانستان پرەزيدەنتى اشراف عاني احمادزاي, موڭعوليا پرەزيدەنتى تساحياگين ەلبەگدورج, ءۇندىستان پرەمەر-ءمينيسترى نارەندرا مودي مەن پاكىستان پرە­مەر-ءمينيسترى مۋحاماد نا­ۆاز شاريف بار. سونىمەن قاتار, يسپانيا كورولى فيليپپ VI, سەر­بيا پرەزيدەنتى الەكساندر ۆۋ­چيچ, ليۋكسەمبۋرگ ۇلى گەر­تسوگ­تىگى­نىڭ پرەمەر-ءمينيسترى كساۆە بەت­تەل بولدى. ەلباسى نۇرسۇلتان نازارباەۆ مارتەبەلى مەيمانداردى قالىپتاسقان حالىقارالىق راسىمدەرگە ساي, قازاق حالقىنىڭ قوناقجاي پەيىلىن كورسەتىپ قارسى الدى.  سالتاناتتى راسىمدە ءسوز سوي­لەگەن نۇرسۇلتان نازارباەۆ بار­شا جۇرتتى استانادا حالىق­ارالىق ەكسپو-2017 مامان­دان­دى­رىلعان كورمەسىنىڭ اشىلۋىمەن قۇتتىقتادى. ەلباسى 115 مەملەكەت پەن 22 حالىقارالىق ۇيىم قاتىسقان ەكسپو كورمەسىن قازاقستاننىڭ تمد جانە شىعىس ەۋروپا ەلدەرى اراسىنان ءبىرىنشى بولىپ وتكىزىپ وتىرعانىن اتاپ ءوتتى.  – ءبىز ەكسپو كورمەسىن تمد جانە شىعىس ەۋروپا ەلدەرى اراسىندا تۇڭعىش رەت وتكىزگەلى وتىرمىز. ءسويتىپ, قازاق ەلىنىڭ ورداسى ايتۋلى كورمەنى وتكىزگەن الەمدەگى 35 ەلدىڭ قاتارىنا قو­سىلدى. استانا ءۇش اي بويى بۇكىل ادامزاتتىڭ جەتىستىكتەرىن ايگىلەيتىن باستى الاڭعا اينالادى. تاۋەلسىز قازاقستاننىڭ سيمۆولى – استانا ناعىز ءححى عاسىردىڭ قالاسى رەتىندە جاڭا قىرىنان تانىلاتىن بولادى, – دەدى ەلباسى. كورمەگە دۇنيە ءجۇزىنىڭ 100-دەن استام مەملەكەتى مەن 20-دان استام حالىقارالىق ۇيىم قاتى­سىپ جاتقانى بەلگىلى. قازاق­ستان پرەزيدەنتى ءوز سوزىندە ولار­دىڭ حالىقارالىق كورمەگە اتسا­لىس­قاندارى ءۇشىن العىس ايتتى.

– ءبىزدىڭ ءوتىنىشىمىزدى جانە ۇسىنعان تاقىرىبىمىزدى قابىل العاندارى ءۇشىن بارلىق ەلدەرگە ريزاشىلىعىمدى بىلدىرەمىن. وسىنداي اۋقىمداعى كورمە – ءبىر مەملەكەتتىڭ عانا اتقارعان ءىسى ەمەس, بۇل – وسىندا ءوز جەتىستىكتەرىن كورسەتۋگە كەلگەن حالىقارالىق قوعامداستىقتىڭ ەڭبەگى. استاناداعى ەكسپو حا­لىق­­ارالىق كورمەسى – جاھاندىق كەڭىستىكتە ەلىمىزدى تانىتۋدىڭ جانە «قازاقستان» ۇلتتىق برەندىن ىلگەرىلەتۋدىڭ جاڭا بەلەسى. ءبىز «بولاشاقتىڭ ەنەرگيا­سى» تاقىرىبىن ۇسىنا وتىرىپ, عىلىمي پروگرەستىڭ بەل ورتاسىندا بولۋدى قالايمىز, – دەدى نۇرسۇلتان نازارباەۆ. مەملەكەت باسشىسى وسىدان ءبىر جارىم عاسىر بۇرىن لوندوندا وتكەن العاشقى دۇنيەجۇزىلىك كورمەدەن كەيىن ادامزات وراسان زور تەحنولوگيالىق وزگەرىستەردى باستان وتكەرگەنىنە توقتالىپ, بۇگىندە ءتيىمدى جانە قاۋىپسىز ەنەرگيا سالاسىنداعى تىڭ جاڭالىقتار قارساڭىندا تۇرعانىمىزدى اتاپ ءوتتى. قازاقستان پرەزيدەنتى ەكسپو-2017 كورمەسى وسى جاھان­­دىق ۇدەرىسكە ءوزىنىڭ ايرىقشا ۇلەس قوساتىنىنا سەنىم ءبىلدىردى.  – زامانىمىزدىڭ وزىق ويلى ادامدارىنىڭ قاتىسۋى جوسپار­لانعان ءىس-شارالار ادامزات دامۋى­نىڭ جاڭا باعىتتارىن اي­شىقتايدى. ميلليونداعان قازاقستاندىق پەن دۇنيە ءجۇزىنىڭ تۇكپىر-تۇكپىرىنەن كەلەتىن 100 مىڭداعان قوناق الەمدىك عىلىمي جانە ينجەنەرلىك اقىل-ويدىڭ كەرەمەت جەتىستىكتەرىمەن تانىساتىن بولادى. ەكسپو باع­دارلاماسىندا 6 مىڭ ءتۇرلى ءىس-شارا وتكىزۋ جوسپارلانعان. ولار الەم ەلدەرى اراسىنداعى ءوزارا تۇسىنىستىكتى دامىتۋعا, عىلىم, بيزنەس جانە قوعام اراسىنداعى تابىستى ءىس-قيمىلعا, سونداي-اق قازاقستان مادەنيەتىمەن تانىسۋعا سەپتىگىن تيگىزەدى. ءبىز كەلۋگە تىلەك بىلدىرگەندەردىڭ بارلىعىن ەلى­مىز­دىڭ باسقا دا وڭىرلەرىن ارالاپ كورۋگە, بىرەگەي تابيعاتىمىزبەن جانە تاريحي مۇرامىزبەن تانىسۋعا شاقىرامىز, – دەدى نۇرسۇلتان نازارباەۆ.  مەملەكەت باسشىسى الەمنىڭ ەكولوگيالىق تۇرعىدان تەڭدەسسىز جانە ورنىقتى دامۋىنىڭ ماڭىزدىلىعىنا توقتالىپ, ەكسپو-2017 تاقىرىبىنىڭ ءبىز­دىڭ ەلىمىز ءۇشىن وزەكتى ەكەنىنە ەرەكشە نازار اۋداردى. – ەكسپو – عىلىمي جاڭالىق قانا ەمەس, بارلىق ەلدەر مەن وركەنيەتتەردى جالعايتىن التىن كوپىر. وسىدان 166 جىل بۇرىن وتكەن تۇڭعىش كورمەدەن بەرى بۇل شارا ۇدايى جاڭا يدەيالار بەسىگى بولىپ كەلە جاتىر. اتاپ ايتقاندا, العاشقى تەلەفون, ات-كولىك, كومپيۋتەر, جەر سەرىگى مەن اتوم-ەلەكتر ستانساسى سەكىلدى جاڭالىقتاردىڭ بارلىعىنىڭ تۇساۋى وسىنداي ەكسپو-لاردا كەسىلگەن بولاتىن. سول يگى ءۇردىستى جالعاستىرعان استانا الەمدىك يننوۆاتسيالار ورتالىعىنىڭ ءبىرى رەتىندە تانىلادى دەپ سەنەمىن, – دەدى پرەزيدەنت. قازاقستان كومىرسۋتەگى سىندى ەنەرگيا كوزدەرىنىڭ مول قورىنا يەلىك ەتەتىندىگىنە قاراماستان, الداعى ۋاقىتتا جاڭعىرمالى, قورشاعان ورتاعا زيانسىز ەنەرگيا تۇتىنۋعا بەلسەندى تۇردە كوشپەك. ەلباسى ءوز سوزىندە بۇعان دا توقتالدى.  – قازاقستان وراسان زور كومىر­سۋتەگى قورىنىڭ بار ەكەنىنە قارا­ماستان, جاڭارتىلاتىن ەنەرگيا كوزدەرىنە بەلسەندى تۇردە كوشەتىن بولادى. وسىنداي ماق­سات ءبىزدىڭ «ستراتەگيا-2050» باعدارلامامىزدا جانە «جاسىل ەكونوميكاعا» كوشۋ جونىندەگى تۇجىرىمدامامىزدا كورىنىس تاپتى. قازاقستان 2050 جىلعا قاراي جاڭارتىلاتىن كوزدەردىڭ ەسەبىنەن ەلەكتر ەنەرگەتيكاسىنىڭ جالپى كولەمىنىڭ جارتىسىن وندىرە الاتىن بولادى. سونىمەن بىرگە, ەكونوميكادا ەنەرگيانىڭ جۇمسالۋى دا ازايا­دى. تاۋەلسىزدىگىمىزدىڭ 25 جىلىندا ەنەرگيانىڭ جۇمسالۋى ەكى ەسەگە قىسقارعان. 2025 جىلعا قاراي بۇل كورسەتكىشتى تاعى 30%-عا قىسقارتۋ جوسپارلانعان. الەمنىڭ كوپتەگەن مەملەكەتتەرى مەن كورپوراتسيالارى دا الدارىنا وسىنداي مىندەت قويىپ وتىر. مۇنىڭ بارلىعىن بۇگىن اشىلعان كورمەدەگى باي مازمۇندى ەكسپوزيتسيالاردان كورۋگە بولادى, – دەدى قازاقستان پرەزيدەنتى.  نۇرسۇلتان نازارباەۆ «استانا ەكسپو-2017» كورمە كەشەنىنىڭ نىساندارى مەن حالىقارالىق پاۆيلونداردىڭ قالاي پايدالانىلاتىنى جونىندە ايتىپ بەردى. – كورمەنى ارالاۋشىلار نازارىنا باستى نىسان – جەر شارىن بەينەلەيتىن «نۇر الەم» سفەراسى ۇسىنىلادى. ونىڭ ءار دەڭگەيى ەنەرگيانىڭ بەلگىلى ءبىر تۇرىنە ارنالعان. سفەرانىڭ وزەگىندە ءبىزدىڭ ۇلتتىق پاۆيلون ورنالاسقان. وندا قازاقستاندىق عالىمداردىڭ ەڭ وزىق جوبالارى كورسەتىلگەن قازاقستانمەن تانىسۋ ايماعى جانە «جاسامپاز ەنەرگيا» ايماعى بار. ەكسپو كورمەسىنە مەملەكەتتەر مەن حالىق­ارالىق ۇيىمداردىڭ 130-دان استام ەكسپوزيتسيالارى اكەلىندى. ەكى تاقىرىپتىق پاۆيلوندا ەنەر­گە­تيكانىڭ ەۆوليۋتسياسى, ونىڭ ءححى عاسىرداعى پروبلەمالارى جانە وسى سالاداعى تەحنولوگيالىق ورلەۋ ءساتى كورسەتىلەدى, – دەدى مەم­لەكەت باسشىسى. قازاقستان پرەزيدەنتى كور­مە­نىڭ ىسكەرلىك باعدارلاماسىنا توقتالدى. ونىڭ اياسىندا استانا ەكونوميكالىق فورۋمى, شەت ەل ينۆەستورلارىنىڭ كەڭەسى, يسلام ىنتىماقتاستىعى ۇيىمىنىڭ ءسامميتى سياقتى بىرقاتار ءىرى حا­لىق­ارالىق ءىس-شارا وتكىزۋ جوس­پارلانعانىن ايتتى.  مەملەكەت باسشىسى كور­مەنىڭ حالىقارالىق ءوزارا ىن­تى­ماق­تاستىققا ەلەۋلى تىڭ سەر­پىن بە­رىپ, ەلىمىزدىڭ عىلىمىن دا­مىتۋعا جا­نە ەكونوميكامىزدى جاڭعىرتۋعا سەپ­تىگىن تيگىزەتىنىنە سەنىم ءبىلدىردى. نۇرسۇلتان نازارباەۆ ەكسپو-2017 كورمەسى اياقتالعان سوڭ ونىڭ ينفرا­قۇ­رى­لىمى ودان ءارى پايدالانىلاتىنى تۋرالى ايتتى. – بۇل جەردە «استانا» حا­لىقارالىق قارجى ورتالىعى جۇمىس ىستەيتىن بولادى. «جاسىل» تەحنولوگيالار مەن ينۆەستيتسيالاردى دامىتۋ جونىندەگى حالىقارالىق ورتالىق قۇرىلادى. ءىت-ستارتاپتاردىڭ حالىقارالىق تەحنوپاركى اشىلادى. وسىلايشا, ەلىمىزدىڭ, ءوڭىرىمىزدىڭ جانە الەم­نىڭ يگىلىگى ءۇشىن ەكسپو-دا­عى «يننو­ۆاتسيانىڭ تامىر سو­عى­سى» جالعاساتىن بولادى, – دەدى قازاقستان پرەزيدەنتى. سوڭىندا مەملەكەت باسشىسى ەكسپو-2017 كورمەسىن دايىنداۋ ۇدەرىسىنە قاتىسۋشىلاردىڭ بارلىعىنا شىنايى قولداۋ كور­سەت­كەندەرى جانە كورمە يدەياسىن جۇ­زەگە اسىرۋعا اتسالىسقاندارى ءۇشىن العىس ايتتى. – ءبىزدىڭ مارتەبەلى قوناق­تا­­رىمىزعا – استاناداعى ەكسپو-2017 كورمەسىنىڭ اشىلۋ سالتاناتىنا قاتىسۋعا ۋاقىت تا­ۋ­­ىپ كەلگەن مەملەكەتتەر مەن ۇكىمەتتەر باسشىلارىنا ەرەكشە ريزاشىلىق بىلدىرەمىن. قادىرلى قاۋىم! وسىمەن حالىقارالىق ەكسپو-2017 كورمەسىن اشىق دەپ جاريالايمىن! الەم جۇرتشىلىعى مەن بارلىق وتانداستارىمدى كورمەنى تاماشالاۋعا شاقىرامىن! ۇلى دالاعا قوش كەلدىڭىزدەر! – دەپ ءسوزىن تۇيىندەدى مەملەكەت باسشىسى.  وسىلايشا, ن.نازارباەۆ قازاق جۇرتى بىرنەشە جىلدان بەرى كۇتكەن, الەم جۇرتشىلىعى نازارىن تىككەن ايتۋلى شارانىڭ رەسمي تۇردە اشىلعانىن جاھان جۇرتشىلىعىنا حابارلادى.  ەكسپو-2017 كورمەسىنىڭ سالتاناتتى اشىلۋ راسىمىندە حالىقارالىق كورمەلەر بيۋرو­سىنىڭ پرەزيدەنتى ستين كريستەنسەن دە ءسوز سويلەدى. قازاقستان استاناسىنا قوناق بولۋ, قازاقستانعا تابان تىرەۋ ءوزى ءۇشىن ۇلكەن مارتەبە ەكەنىن ايتقان ول ەلورداداعى بەدەلدى شارانىڭ ءمان-ماڭىزىنا توقتالدى. ستين كريستەنسەن حالىقارالىق كورمەلەر بيۋرو­سى­نىڭ 175 مەملەكەتى اتى­نان قازاقستان پرەزيدەنتى نۇرسۇلتان نازارباەۆتى جانە ەكسپو-2017 كورمەسىنىڭ بارلىق ۇيىم­داس­تىرۋشىلارىن وسى ايتۋلى وقيعامەن قۇتتىقتاپ, العىسىن ءبىلدىردى.  – قۇرمەتتى پرەزيدەنت نۇرسۇلتان نازارباەۆ, حالىق­ارا­لىق كورمەلەر بيۋرو­سىنىڭ 175 مەم­لەكەتى اتىنان ءسىزدى وسى ايتۋلى وقيعامەن قۇتتىقتايمىن! بۇدان بولەك, كورمەنىڭ بارلىق ۇي­ىم­داستىرۋشىلارى مەن قا­تى­سۋ­شىلارىنا جانە ۇكىمەتكە اتقارعان جۇمىستارى ءۇشىن العىس بىلدىرەمىن! قازاقستان ەكسپو-2017 كورمە­سى­نىڭ ار­قاسىندا دۇنيەجۇزىلىك قوعام نازارىن وزىنە اۋداردى. كورمەنىڭ «بولاشاقتىڭ ەنەرگياسى» اتتى تاقىرىبى ۇنەمى وزەكتى بولعان جانە بولىپ قالادى دا. بۇگىنگى تاڭدا «جاسىل ەنەرگيا» ماسەلەسى دا­مىعان ەلدەردى عانا ەمەس, سونىمەن قاتار, دامۋشى مەملەكەتتەردى دە قىزىقتىرادى. 115 ەلدىڭ اراسى­نان الەمدىك اۋقىمداعى 22 كومپانيا ءدال وسى كورمەگە تارتىلدى, – دەدى ول. حالىقارالىق كورمەلەر بيۋرو­سىنىڭ باسشىسى ايتىپ وت­كەن­دەي, بۇل وقيعا الەمدەگى كوپ­تەن كۇتكەن جانە ەڭ كوپ كەلۋشى قاتى­ساتىن وقيعا بولىپ تابىلادى. – دۇنيەجۇزىلىك ەكسپو-2017 كورمەسىنە قاتىسىپ جاتقا­نى­مىزعا قۋانىشتىمىز. بار­لىق پاۆيلوندار «جاسىل ەنەر­گە­تيكانىڭ» دامۋىنا ۇلكەن ۇلەس قوسپاق. سەبەبى, بولاشاقتا ءبىز ەنەرگيانى قانشالىقتى قول­دا­ناتىنىمىز بارشا ءۇشىن قى­زىقتى. ەنەرگيا – ومىرلىك كۇش. بۇگىنگى ەكسپو كورمەسىندەگى كەزدەسۋىمىز بولاشاقتا ماڭىزدى ماسەلەلەردى شەشۋگە دەگەن ىنتا-ىقىلاسىمىزدى ارتتىرىپ وتىر. ەنەرگيا تۇراقتى ءارى بارشامىزعا قولجەتىمدى بولۋى كەرەك. تازا ەنەرگياسىز پلانەتانىڭ بولاشاعىن ەلەستەتۋ مۇمكىن ەمەس. ەنەرگيا – بار وركەنيەتتىڭ ومىرلىك كۇشى. بۇ­گىنگى شارا – ءۇش ايعا سوزىلاتىن مەرەكەنىڭ باستاماسى. ءۇش اي بويى جاسىل ەنەرگەتيكا – بولاشاقتىڭ ەنەرگياسى بويىنشا ءارتۇرلى پىكىر­تالاستار وتكىزەمىز. وسىنداي الەم ءۇشىن ماڭىزدى ءارى قازاقستان ءۇشىن ماڭىزدى وقيعانىڭ باستالۋىمەن بارشاڭىزدى قۇتتىقتايمىن! – دەدى س.كريستەنسەن.  كورمەنىڭ سالتاناتتى اشىلۋى اسەرلى تەاترلاندىرىلعان قويىلىممەن باستالدى. قويىلىم ستسەناريىندە ەنەرگيانىڭ پايدا بولۋى, جەل, كۇن جانە سۋ ەنەر­گياسىنىڭ قۋاتى كورسەتىلدى. اۋەدە قالىقتاعان الىپ شار ارقى­لى ۇيىمداستىرۋشىلار دۇنيە ءجۇزى قول جەتكىزگەن جاڭالىقتاردى كورسەتۋگە ۇمتىلدى. ادامزات بالاسىنىڭ اتام زاماننان بەرگى ارالىقتا ەنەرگيا الۋدىڭ قۇپيا­سىنا ۇڭىلگەن تالپىنىسىن بالەت بيشىلەرى بي قيمىلدارى ارقىلى بەينەلەدى. امپەر, نيۋتون, گالۆاني, تەسلا سىندى ادام­زاتتىڭ دامۋىنا ۇلەس قوسقان عا­لىمداردىڭ ەڭبەگى كورسەتىلدى. اك­تەرلەر قازاق دالاسىنىڭ جەل ەنەر­گەتيكاسىنىڭ قاينار كوزى ەكەنىن بەينەلەدى. حالىقارالىق باي­قاۋلاردىڭ لاۋرەاتى, تانىمال وپەرا ءانشىسى ماريا مۋدرياك قازاقتىڭ حالىق ءانى «ياپۋرايدى» ورىندادى.  قازاقستان قارۋلى كۇشتەرىنىڭ وفيتسەرلەرى ەلىمىزدىڭ مەملەكەتتىك تۋىن ساحناعا الىپ شىعۋ ءراسىمى دە وتە اسەرلى كورىنىستەردىڭ ءبىرى بولدى. كوك تۋ تۋتۇعىردىڭ باسىنا كوتە­رىل­گەننەن كەيىن قازاقستاننىڭ مەملەكەتتىك ءانۇرانى شىرقالدى. الەم كوز تىككەن ايتۋلى شارادا ءانۇراندى شىرقاۋ باقىتى حالىقارالىق بايقاۋلاردىڭ لاۋرەاتى, «استانا-وپەرا» تەاترىنىڭ جەتەكشى ءسوليسى سۇندەت بايعوجينگە بۇيىردى.  ودان كەيىنگى كەزەكتە امفيتەاتر ساحناسىنا حالىقارالىق كورمەلەر بيۋروسىنىڭ رەسمي تۋى سالتاناتتى جاعدايدا جەتكىزىلىپ, تۇعىرعا كوتەرىلدى. اق ءتۇستى, ورتاسىندا جەر شارى كوك تۇسپەن بەينەلەنگەن تۋ قازاقستان استاناسىندا كورمەگە قاتىسىپ جاتقان 100-دەن استام ەلدىڭ تۋىمەن بىرگە 93 كۇن جەلبىرەپ تۇراتىن بولادى.  قويىلىم سوڭى جاس جەتكىن­شەك­تەردىڭ بالعىن ۇنىمەن قو­رىتىندىلاندى. ولار الەمنىڭ ءتۇرلى تىلىندە جاسىل ەنەرگيا تۋرا­لى ءوز ويلارىن ايتتى. بۇل قازاقستاننىڭ كوپ ۇلتتى ەل ەكەنىن جانە بولاشاقتىڭ ۇرپاقتار قولىندا ەكەنىن بىلدىرسە كەرەك. بالالار سالعان سۋرەتتەر ارقىلى كە­لەشەكتەگى فۋتۋريستيكالىق استانا بەينەلەندى.  ەكسپو-2017 كورمەسىنىڭ اشىلۋ سالتاناتىنداعى بارلىق شارا ەل حالقىنىڭ نازارىنا تەلەارنالاردان تىكەلەي ەفير ارقىلى ۇسىنىلعانىن ايتا كەتەيىك. بۇدان بولەك, «Astana EXPO-2017» رەسمي سايتى مەن «Youtube» عالامتور ارناسىنان دا تىكەلەي ەفير ۇيىمداستىرىلدى. كورمە كەشەنىنىڭ اۋماعىندا ورنالاسقان مەديا-ورتالىقتاعى جۋرناليستەرگە ارنالعان ۇلكەن ءبىر زال لىق تولىپ تۇردى. الەمنىڭ تۇكپىر-تۇكپىرىنەن جانە ەلىمىزدىڭ وڭىرلەرىنەن كەلگەن بۇقارالىق اقپارات قۇرالدارى وكىلدەرىنىڭ كوپتىگىنە بايلانىستى اككرەديتتەۋ مەن قاتىسۋشىلارعا قىزمەت كورسەتۋ ورتالىقتارىنىڭ زالدارىن بوساتىپ بەرۋگە تۋرا كەلىپتى.  «بىزدە ماسس-مەدياعا ارنالعان 500 ورىن بار ەدى. الايدا, كەلگەن جۋرناليستەردىڭ سانى مىڭنان اسىپ كەتتى. قازىر مۇندا شامامەن 1200 جۋرناليست وتىر. ونىڭ 400-ءى ءوزىمىزدىڭ باق وكىلدەرى بولسا, قالعان 800-ءى – شەتەلدىك جۋر­­نا­ليستەر», دەيدى  «استانا ەكس­پو-2017» ۇلتتىق كومپانيا­سى قو­عاممەن بايلانىس دەپارتا­مەنتىنىڭ ديرەكتورى سەرگەي كۋيانوۆ.  ەلباسى حالىقارالىق كورمەنى رەسمي اشىق دەپ جاريالاعاننان كەيىن استانانىڭ اسپانى تاڭعا­جايىپ تۇسپەن مىڭ قۇبىلعان اسەم وتشاشۋعا بولەندى. شامامەن 15 مينۋتقا سوزىلعان وتشاشۋ قالا تۇرعىندارى مەن كورمەگە كەلگەن مەيمانداردى تاڭعالدىرعانى, تامساندىرعانى انىق. كورمە قا­لاشىعىنا جينالعان قاۋىم بۇ­رىن-سوڭدى وسىنداي وتشاشۋ­دى كور­مەگەندەرىن ايتتى. وتشا­شۋ­دان سوڭ حالىق كورمە الاڭىنىڭ كىن­دى­گىند­ە ورنالاسقان الىپ سفە­راد­ا­عى پروەكتسيالىق لازەرلىك شوۋدى تاماشالادى. سالتاناتتى شارانىڭ ودان كەيىنگى كەزەگى كونتسەرتتىك باعدارلاماعا ۇلاستى. ەلىمىزدىڭ بەتكە ۇستار انشى­لەرى, بيشىلەرى, ونەر ۇجىمدارى قاتىسقان كونتسەرتتە ءداستۇرلى مۋزىكالىق مۇرالارىمىز بەن شەتەلدىك كلاسسيكالىق تۋىندىلار جۇرتشىلىق نازارىنا ۇسىنىلدى.  سونىمەن, شىمىلدىعى تۇرىل­گەن حالىقارالىق كورمە اياسىندا 90 كۇن ىشىندە 3 مىڭنان استام شارا وتەدى. ەلوردا مەن ەلى­مىزدىڭ باسقا قالالارىنداعى شارالاردى ايتپاعاندا, تەك قانا كورمە اۋماعىنداعى پاۆيلونداردىڭ ارقايسىسىنىڭ اشىلۋ راسىمىندە بۇرىن-سوڭدى بولماعان ەكس­كليۋزيۆتى شوۋلار وتەتىن بولادى.

ارنۇر اسقار, «ەگەمەن قازاقستان» سۋرەتتەر پرەزيدەنتتىڭ باسپاسوز قىزمەتىنەن الىندى