ونىڭ ايتۋىنشا, قازىرگى ۋاقىتتا ارحيۆتە اقپاراتتاندىرۋ تۇجىرىمداماسى مەن باعدارلاماسى تولىق كەشەندە جۇزەگە اسىرىلۋدا, ۇلتتىق ارحيۆ قورى قۇجاتتارىن جاپپاي تسيفرلاۋ جۇمىستارى جۇرگىزىلۋدە, زەرتتەۋشىلەر ءۇشىن «ۆيرتۋالدى وقۋ زالىنىڭ» اقپاراتتىق قۇرىلىمى مەن مودەلى قۇرىلعان.
ء«ارحيۆتىڭ 2021 جىلعا دەيىنگى جوسپارىندا ءى ساناتقا جاتاتىن ارحيۆ ىستەرىن, ياعني اسا قۇندى جانە زەرتتەۋشىلەر تاراپىنان سۇرانىسقا يە تاريحي قۇجاتتاردى تسيفرلى فورماتقا كوشىرۋ ماقساتى تۇر. وسىنداي ىستەردىڭ جالپى سانى 160 مىڭ. اعىمداعى جىلدىڭ 1 قاڭتارىنان باستاپ ساناعاندا 62 مىڭ ءىس تسيفرلى جۇيەگە كوشىرىلگەن», دەدى ب.جاپاروۆ.
سپيكەردىڭ سوزىنشە, ءارحيۆتىڭ بۇرىندارى قولدانىپ جۇرگەن اقپاراتتىق جۇيەلەرى ءارتۇرلى كومپانيالارمەن ءار جىلدارى ءتۇرلى باعدارلامالىق پلاتفورمالاردى پايدالانا وتىرىپ جاسالۋى بيزنەس-پروتسەستەردىڭ ورىندالۋىندا قيىندىقتار الىپ كەلگەن. «بارلىق بيزنەس-پروتسەستەردى ءتيىمدى اۆتوماتتاندىرۋ ماقساتىندا ارحيۆ 2014 جىلدان باستاپ جاڭا اقپاراتتاندىرۋ تۇجىرىمداماسىن قابىلدادى. ونداعى باسىم باعىتتاردىڭ ءبىرى بولىپ ارحيۆ قىزمەتىنىڭ باستى باعىتتارى: جيناقتاۋ, ساقتاۋدى قامتاماسىز ەتۋ, پايدالانۋ جانە عىلىمي-انىقتامالىق اپپارات قۇرۋ قىزمەتتەرىن تولىقتاي قامتي وتىرىپ, ەلەكتروندى ارحيۆ جۇيەسىن قۇرۋ بولىپ انىقتالدى», دەپ اتاپ ءوتتى ول.
بوريس جاپاروۆتىڭ مالىمەتىنشە, ەل پرەزيدەنتىنىڭ ءارحيۆى اقپاراتتىق تەحنولوگيالاردى كەڭىنەن قولدانا وتىرىپ, بىرنەشە عىلىمي-زەرتتەۋ جوبالارىن جۇزەگە اسىرۋدا. اعىمداعى جىلدىڭ 1 ماۋسىمىنان باستاپ ءارحيۆتىڭ سايتىنا قازاقستاننىڭ جاڭا زامان تاريحىنىڭ ماڭىزدى تاريحي وقيعالارىن سيپاتتايتىن 33 ۆيرتۋالدى تاريحي-قۇجاتتىق كورمە ورنالاستىرىلعان. ولاردىڭ قاتارىندا قازاقستاندىقتاردىڭ 1941-1945 جىلدارداعى ۇلى وتان سوعىسىنا قاتىسۋى, حالىقتاردى قازاقستانعا دەپورتاتسيالاۋ تاريحى, 1920-1930 جىلدارداعى قازاق ءالفاۆيتىن لاتىن الفاۆيتىنە كوشىرۋ جانە ت.ب. تاقىرىپتارداعى كورمەلەر بار.
«الەمنىڭ بارلىق زەرتتەۋشىلەرى ءۇشىن ۆيرتۋالدى كورمەلەردە بىرەگەي ارحيۆ قۇجاتتارى ونلاين رەجىمىندە قولجەتىمدى. قازاقستان رەسپۋبليكاسى پرەزيدەنتى ءارحيۆىنىڭ مۇنداي قادامعا بارۋى ەلباسىنىڭ بەس ينستيتۋتتىق رەفورماسىنىڭ 87-قادامىنا ساي كەلەدى», دەدى بوريس جاپپاروۆ.
راۋان قايدار, «ەگەمەن قازاقستان»