«ۇلتتىق گوبەلەن ونەرىنىڭ نەگىزىن قالاعان قۇراسبەك تىنىبەكوۆ شىعارماشىلىق جۇمىسپەن اينالىسۋ كەزىندە سيمۆوليزم, مەتافوريزم, تاڭبالاردى زەرتتەۋگە تالپىندى, كوركەم تۋىندىسىن مادەني مۇراعا اينالدىرۋدا ەجەلگى جانە ورتاعاسىرلىق جاۋھار تۋىندىلار جاساعان شەبەرلەردىڭ ەستەتيكالىق قالىپتاستىرۋ ءتارتىبى, ىرعاعى مەن قالىپتاسقان كانونىنا سۇيەندى. ونىڭ شىعارماشىلىعىنداعى ەڭ باستى جەتىستىك – ۇلتتىق كوركەم توقىما ونەرىندە ءوزىنىڭ قايتالانباس اۆتورلىق قولتاڭباسىن قالىپتاستىرۋى. سۋرەتشىنىڭ تۋىندىلارى قازاقستان كوركەم توقىما شەبەرلەرى ءۇشىن كوركەم ونەر كانونى - ەتالونى بولدى, − دەيدى م.اۋەزوۆ اتىنداعى وقمۋ رەكتورىنىڭ كەڭەسشىسى, پەداگوگيكا عىلىمدارىنىڭ دوكتورى, اكادەميك سادىبەك بەيسەنباەۆ. − بۇگىنگى تاڭدا قازاقستانداعى ساندىك ونەرىنىڭ ەشبىر سالاسىندا گوبەلەن ونەرى قول جەتكىزگەندەي, وسىنشالىقتى جان-جاقتى اۆتورلىق كوركەم ستيل مەن باعىت جوق ەكەن». حالىقارالىق جامبىل سىيلىعىنىڭ لاۋرەاتى ەسەنالى ەرالى ءسان جانە قولدانبالى ونەر سالاسىندا ق.تىنىبەكوۆ جان-جاقتى كاسىبي ءبىلىم العان العاشقى قازاق ەكەنىن اتاپ ءوتتى. زاماناۋي فورمالارعا نەگىزدەلگەن كوپتەگەن ساندىك ويۋ-ورنەكتەر, نوبايلار, جوبالار, ۇلتتىق ساندىك-قولدانبالى ونەرىنىڭ بارلىق جانرىمەن اينالىسىپ, كوركەم تۋىندىلار جاساعان قۇراسبەك باۋ-باسقۇر, تەرمە الاشا توقۋدىڭ قايتا جاندانۋىنا كوپ ەڭبەك ءسىڭىردى. جىبەك ماتاعا سۋرەت سالۋمەن – باتيك ونەرىمەن دە اينالىستى. كيىز باسۋدىڭ ءداستۇرلى تەحنولوگياسىن جەتىك مەڭگەردى. حالىق ىشىندە تەكەمەتتى تۇرمىستىق زات رەتىندە باعالاسا, ق.تىنىبەكوۆ تەكەمەتتى ناعىز ونەر تۋىندىسىنا اينالدىردى. ءوز قولىمەن بىرنەشە تەكەمەتتى دايىندادى. ءيا, جۇرەگى وتە نازىك تە سەزىمتال, ارمانشىل دا اسەرشىلدىگى, تۋعان ەلگە دەگەن سارقىلماس تازا ماحابباتى تۋىندىلارىنان اڭعارىلاتىن سۋرەتشى 1980 جىلى «قازاقستان شۇعىلاسىن» جاساعانى ءۇشىن مەملەكەتتىك سىيلىقتى يەلەندى. وكىنىشكە قاراي, ومىردەن وتكەن سوڭ. ودان بەرى وتىز جەتى جىل وتسە دە ونىڭ ءولىمىنىڭ ەرتە جانە كەنەتتەن بولۋى باقتالاستىق, كۇندەستىك, ىشتارلىقپەن, سول كەزدەگى سولاقاي ساياساتپەن بايلانىستىرىلادى. از عانا عۇمىرىندا وشپەس مۇرا قالدىرعان قۇراسبەك تىنىبەكوۆ ۇلتتىق ونەرگە نەبارى 10 جىل قىزمەت ەتىپتى. سول ءبىر قىسقا ۋاقىتتا ناعىز شىعارماشىلىقتىڭ شىنايى ۇلگىسىن ايقىنداپ, قازاقستان ونەرى ءۇشىن ماڭىزىن ەشقاشان جوعالتپايتىن وتە قۇندى جاۋھار دۇنيەلەردى وسكەلەڭ ۇرپاققا ميراس ەتىپ قالدىردى. بار-جوعى 33 جىل ءومىر سۇرگەن ق.تىنىبەكوۆتىڭ ءولىمى ءالى دە جۇمباق كۇيىندە قالىپ وتىر. «سول كەزدەگى سولاقاي ساياساتتىڭ دا اعامنىڭ ولىمىنە سەبەپشى بولۋى ابدەن مۇمكىن. نەگە ۇلتتىق گوبەلەنگە جالعىز قازاققا بەرىلەدى دەگەن كوزقاراسپەن ەكى ورىس ۇلتىنىڭ وكىلى جانە ءباتيما زاۋىربەكوۆا قوسىلىپ «تەڭدىك» ساقتالدى. سونداي-اق, اعامنىڭ ۇلتشىلدىق كوزقاراسى الدەكىمدەرگە ۇناماعان دا بولار. بالكىم ۇلتشىل بولعان سوڭ ۋ بەرىلدى مە دەپ تە ويلايمىن», – دەدى ءىنىسى, شاكىرتى, سۋرەتشى قۇتتىبەك تىنىبەك ۇلى. وتىزىندا وردا بۇزعان دارابوز دارىننىڭ دەنەسى ايگىلى ءابىلحان قاستەەۆتىڭ بەيىتىنە تاياۋ تۇسقا جەرلەنىپتى. بۇگىندە الماتىداعى ءا.قاستەەۆ اتىنداعى ورتالىق مەملەكەتتىك مۋزەيدە قۇراسبەك تىنىبەكوۆتىڭ تۋىندىلارى ساقتاۋلى. رەسپۋبليكالىق عىلىمي-كونفەرەنتسيادا بايانداما جاساعان ونەرتانۋشى, يۋنەسكو ونەرتانۋشىلار قاۋىمداستىعىنىڭ مۇشەسى ك.لي سۋرەتشىنىڭ ساقتالعان ءاربىر تۋىندىسىنىڭ ەرەكشەلىكتەرىنە جەكەلەي توقتالىپ, ستۋدەنت-جاستارعا تەرەڭ ماعلۇمات بەردى. سونداي-اق, بايانداماشىلار ونەر مەكتەپتەرىنىڭ, وقۋ ورىندارىنىڭ اتىنا, كوشەلەرگە قازاق قولونەرىنە وشپەستەي ءىز قالدىرعان ق.تىنىبەكوۆتىڭ ەسىمىن بەرۋ جونىندە ۇسىنىستارىن ءبىلدىردى.
عالىمجان ەلشىباي, «ەگەمەن قازاقستان»