ءدال قازىرگى تاڭدا, ەل كۇتكەن حالىقارالىق كورمە – ەكسپو-نىڭ الدىندا استانا اجارىن پاش ەتىپ تۇر. ءزاۋلىم سارايلاردىڭ, عالامات عيماراتتاردىڭ كەلبەتى ءوز الدىنا, كوشەنى بويلاي كوككە وراعان تال-داراقتار كوڭىل كونشىتەدى. كوبەلەك قونىپ, كوركىن اشقان گۇلزارلار كوز سۇرىندىرەدى ءھام سۇيسىنتەدى. «استانا كوگالداندىرۋ قۇرىلىسى» اق باعباندارىنىڭ كۇتىپ-باپتاۋىمەن شاھارعا شىراي بەرگەن وسىمدىكتەر اتاۋلىنىڭ ءمان-جايىن باس اگرونوم باقتيار شايمۇحامبەتوۆ بىلاي باياندادى: «الپىس جىلدان اسا تاريحى بار مەكەمەنىڭ جۇمىسى ماۋسىمدىق قانا بولىپ كورىنگەنىمەن, جىل بويى جالعاسادى. سەبەبى, تال-داراقتار ءتىرى ورگانيزم بولعاندىقتان, ولاردى جىل ون ەكى اي كۇتىپ-باپتاۋ قاجەت. سودان كەيىن ەرتە كوكتەمدە كوشەت-شىبىقتار جەر قاتتى بولعاندىقتان قورەك الا الماي, كۇننىڭ بەلسەندى قىزۋىنا ۇرىنادى. بۇل دا كۇتىمدەگى وسىمدىكتىڭ كوكتەمەي سارعايۋىنا اكەلىپ سوعادى. ءبىز تال-داراقتاردى, كوشەتتەردى وسىنداي قاتەرلەردەن قورعاپ, كۇتىمگە الامىز. كۇزدەن باستاپ جىلىجايلاردا گۇل وسىرە باستايمىز. ونى دا زيانكەستەردەن قورعاۋ, توپىراعىن زالالسىزداندىرۋ, وزگە دە تولىپ جاتقان جۇمىستارى موينىمىزدا».
● ەركە ەسىلدىڭ وڭ قاپتالى. تاعى دا كوزگە ءبىرىنشى شالىناتىنى – جايقالعان گۇلزار الابى. وسى جىلدىڭ جاڭالىعى – بىرجىلدىق گۇلدەردىڭ سانى ازايىپ, ورنىن ءتۇبى توپىراقتا قالىپ قويىپ, وزدىگىنەن كوبەيەتىن رۋدبەكيا, مىڭجاپىراق, دەلفينيۋم سىندى كوپجىلدىق گۇلدەر باسقان. «تامىرىن تەرەڭدەتىپ الىپ, تۇتاس گۇل كوشەتتەرىنىڭ جامىلعىسىن قۇرايتىن كوپجىلدىق وسىمدىك ءبىر-ەكى جىلدان كەيىن بىرجىلدىق گۇلگە ورىن قالدىرماۋى مۇمكىن», دەيدى ماماندار. ولاردىڭ تاعى ءبىر ەرەكشەلىگى – بىرەۋى مامىردا بۇرشىك اتسا, ەكىنشىسى ايدىڭ اياعىندا گۇلدەيدى, ال ءبىرازى تامىزدا عانا كوكتەيدى. بىرجىلدىق گۇلدەر ءبىر مەزگىلدە, ءبىر مەزەتتە جايناپ, جايقالىپ شىعادى.
● ەسىلدىڭ جاعاسىنا گۇل-اققۋلار قونىپتى. مۇنداي كومپوزيتسيالارمەن كاسىپورىننىڭ لاندشافتىق ديزاين ءبولىمى اينالىسادى. قىس كەزىندە شەبەرحانا ماماندارى گۇل كوشەتتەرىنىڭ الدىن الا جوباسىن دايىنداپ, مۇسىندەردىڭ ۇلگىلەرىن ازىرلەيدى, جازۋىن باسادى. جوسپارعا سايكەس, گۇلدەن جاسالعان قوبىز ءمۇسىنى «استانا وپەرا» تەاترىنىڭ ماڭىنا, تورسىق – سارايشىق كوشەسى مەن ماڭگىلىك ەل داڭعىلىنىڭ قيىلىسىنا, ال تەكشە ءپىشىنى «كەرۋەن» ساۋدا جانە ويىن-ساۋىق ورتالىعىنىڭ جانىنا ورنالاسادى. فرانتسيادان اكەلىپ, جەرسىندىرىلگەن راۋشان گۇلدەرى «حان شاتىردىڭ» اينالاسىنا وتىرعىزىلىپ, ەرەكشە كورىك بەرمەك.
● گۇل دەستەلەرىمەن بوي كوتەرگەن كەرىكتەر مەن پىلدەر قابانباي باتىر داڭعىلى مەن قورعالجىن تاس جولىنىڭ قيىلىسىنداعى استانا تسيركىنىڭ الاڭىنا ورنىعىپتى. استاناعا اجار بەرىپ, كوز تويدىرعان مۇسىندەرمەن كوپشىلىك سۋرەتكە تۇسۋدە. وسىنداي كوگالداندىرۋ جۇمىستارى ەلوردانىڭ باس جوسپارىنا ساي جانە 2007-2030 جىلدارعا ارنالعان قالانى كوگالداندىرۋ تۇجىرىمداماسىن باسشىلىققا الا وتىرىپ جۇرگىزىلۋدە.
● اقوردادان «حان شاتىر» ساۋدا جانە ويىن-ساۋىق ورتالىعىنا دەيىن سوزىلعان «نۇرجول» سۋلى-جاسىل جەلەك بۋلۆارىندا استانا كوگالداندىرۋ قۇرىلىسىنىڭ باعباندارى ەڭبەك كورىگىن قىزدىرۋدا. «بۇگىنگى تاڭدا ەلوردا بويىنشا ەكى مىڭعا جۋىق باعبان باس شاھاردى كوگالداندىرۋعا جۇمىلدىرىلعان. استانادا وتەتىن ەكسپو كورمەسىنە وراي قىزمەتكەرلەرىمىزدىڭ قاتارىن جىلداعىدان ارتتىرعانىمىزدى ايتا كەتەيىن. حالىقارالىق شاراعا بايلانىستى باسقا دا قولعا العان شارۋالارىمىز جەتەرلىك. ايتالىق, جىلدا قالا ءىشىن گۇلدەندىرۋ شىلدەنىڭ باسىنا دەيىن سوزىلاتىن بولسا, بيىل بۇل ءىستى ەرتەرەك قولعا الىپ, گۇلدەردىڭ توقسان پايىزىن, شامامەن ون بەس ءتۇرلى جەتى ميلليون ءتۇپ گۇل وتىرعىزىپ قويدىق», دەيدى باس اگرونوم ب.شايمۇحامبەتوۆ. ونىڭ ايتۋىنشا, قالاعا جىل سايىن ون-ون بەس مىڭ ءتۇپ كولەمىندە تال كوشەتتەرى ەگىلەتىن بولسا, بيىل قىرىق مىڭ ءتۇپ تال كوشەتى كوشەلەرىمىزدى كوركەيتپەك. قازىرگى تاڭدا ونىڭ جارتىسىنا جۋىعى استانانىڭ اجارىن اشىپ تۇر. ولاردىڭ قاتارىندا كادىمگى قاراعاي, ءسىبىر شىرشاسى, تاتار ۇيەڭكىلەرى, تەرەك جانە جوكە اعاشتارى بار.
فوتورەپورتاجدى دايىنداعان اسحات رايقۇل, سۋرەتتەردى تۇسىرگەن ەرلان وماروۆ, «ەگەمەن قازاقستان»