جۇمىستىڭ ءبىرىنشى كەزەڭىندە ەرىكتىلەردى شەت تىلدەرىن بىلەتىن ستۋدەنتتەردەن جاساقتاۋ شارالارى جۇرگىزىلدى. ولاردىڭ قاتارىندا: س.سەيفۋللين اتىنداعى قازاق اگروتەحنيكالىق ۋنيۆەرسيتەتى, ل.ن.گۋميلەۆ اتىنداعى ەۇۋ, قازاق گزۋ, قازاق-تۇرىك ليتسەيى, سونىمەن قاتار №22 مەكتەپ-گيمنازياسىنىڭ وقۋشىلارى مەن قالا تۇرعىندارى بار. ەرىكتىلەردىڭ جالپى سانى 1500-دەن اسادى.
ل.ن.گۋميلەۆ اتىنداعى ەۇۋ بازاسىندا ءساۋىر ايىنان باستان شتاب پەن call-center جۇمىس ىستەۋدە. شتاب مۇشەلەرى جۇمىس جوسپارىن بەكىتتى جانە ەكسپو-2017 ەرىكتىلەرىنە جادىنامالار مەن تۇجىرىمداما دايىندادى. ستۋدەنتتەر مەن وقىتۋشىلاردان قۇرالعان ەرىكتىلەردىڭ سۋپەرۆايزەرى تاعايىندالدى. ەرىكتىلەردىڭ ەتيكا كودەكسى ءارى ادىستەمەلىك جاردەماقى قۇرىلدى. ءار ەرىكتىمەن جازباشا ازاماتتىق-قۇقىقتىق كەلىسىم شارت جاسالدى.
قالا اكىمدىگىنىڭ قۇرىلىمدىق بولىمشەلەرىمەن بىرلەسە وتىرىپ ەرىكتىلەردىڭ جۇمىس ىستەيتىن ورىندارى بەلگىلەندى: حالىقارالىق اۋەجاي, تەمىرجول ۆوكزالى, اۆتوۆوكازل, جەدەل مامانداندىرىلعان قىزمەتتەر (101, 102, 103, 911), مادەني نىساندار مەن كوناقۇيلەر جانە ت.ب.
- ءبىزدىڭ بارلىق ەرىكتىلەر, ياعني 1500 ادام استانا ق. «نيكا» كوممۋنيكاتيۆتى دامىتۋ ورتالىعىنىڭ» سەرتيفيكاتتالعان جاتتىقتىرۋشىلارى مەن ءدارىس وقۋشىلارىنىڭ تولىق وقۋىنان ءوتتى. ولارعا شەتەلدىك قوناقتارمەن سويلەسۋدىڭ ادىستەرى ۇيرەتىلدى, ەرىكتىلەر قوزعالىسىنىڭ قىر-سىرى تانىستىرىلىپ, استانا قالاسى مەن ەكسپو تاريحى جايلى, سونىمەن قاتار ەلوردانىڭ كورىكتى جەرلەرى تۋرالى اقپاراتتار بەرىلدى, - دەيدى «استانا قالاسىنىڭ جاستار ساياساتى ماسەلەلەرى باسقارماسى» مم باسشىسى اسحات ورالوۆ.
سونىمەن قاتار, ەكونوميكا, زاڭ, پسيحولوگيا جانە پەداگوگيكا سالالارى بويىنشا جوعارى تاجىريبەلى ماماندار ەرىكتىلەرگە 16 ساعاتتىق وقىتۋلار جۇرگىزدى.
«ارمان» وتباسىلىق جانە مەديتسينالىق قۇقىق بيۋروسى» ليتسەنزيالانعان جاتتىقتىرۋشىلارى, تج كوميتەتىنىڭ ازاماتتىق قورعانىس باسقارماسىنىڭ جانە جاستار ساياساتى ماسەلەلەرى باسقارماسىنىڭ دا وكىلدەرى ەرىكتىلەردى وقىتىپ, ۇيرەتتى.
ەرىكتىلەردى كەرەك-جاراقتارمەن جابدىقتاۋ, سونداي-اق, كۇندىز جانە تۇندە ءبىر رەتتىك تاماقتاندىرۋ بويىنشا جەكە كومپانيالارمەن كەلىسىم شارت جاسالدى. «استانا LRT» كومپانياسى بارلىق ەرىكتىلەردىڭ قوعامدىق كولىكتەردە (استانا قالاسىنداعى اۆتوبۋستار) كورمە كەزىندە, ياعني 3 اي بويى تەگىن قاتىناۋلارىنا مۇمكىندىك جاسادى. تەز تاماقتاناتىن McDonald’s مەيرامحاناسىمەن 10 ماۋسىم مەن 10 قىركۇيەك ارالىعىندا كۇن سايىن 500 ەرىكتىنى 46 000 (قىرىق التى مىڭ) كۋپون ارقىلى تاماقتاندىرۋ بويىنشا كەلىسىمگە قول قويىلدى. وسى كۋپوندار ارقىلى ەرىكتىلەر تەگىن تۇستەنۋگە قول جەتكىزەدى.
ەرىكتىلەردى ىنتالاندىرۋ ماقساتىندا كەشەندى شارالار قاراستىرىلۋدا. ناقتىراق ايتساق, ەڭ ۇزدىك ۆولونتەر-ستۋدەنتتەرگە استانا قالاسى اكىمىنىڭ 20 ءبىلىم گرانتى ء(بىر جىلعى وقۋعا) بولىنەدى. قالا اكىمىنىڭ العىس حاتتارى, سىيلىقتار, ەستەلىك كادەسىيلار, ەلەكتروندى كىتاپتار, قالادا وتكىزىلەتىن كونتسەرتتەرگە تەگىن بيلەتتەر تاراتىلادى, كەرەك-جاراقتارمەن قاماتاماسىز ەتىلەدى (جەڭىل جەيدە, بەيسبولكا, ارقاعا اساتىن سومكەلەر مەن تەرموس), قوعامدىق كولىكتەرگە جول ءجۇرۋ بيلەتتەرى بەرىلەدى ءارى 3- 4 كۋرس ستۋدەنتتەرىنە ءبىر جىلعى جاتاقانا قاراستىرىلادى.