پەتروپاۆل قالاسىنىڭ اكىمى مارات تاسماعانبەتوۆتىڭ ايتۋىنشا, باستى شاحاردى سانيتارلىق تازالاۋ جانە اباتتاندىرۋ بويىنشا ۇشايلىق اياسىندا جوسپارلى جۇمىس جۇرگىزىلۋدە. ونىڭ ىشىندە ەستەتيكالىق تالاپتارعا سايكەس كەلمەيتىن بوگەتتەر مەن قورشاۋلار الىنۋدا. جابىق قورشاۋ يەلەرىنە تورلى پوليمەرلى جابىلعى تۇرىندەگى زاماناۋي ەۋروقورشاۋلاردىڭ بالامالى تۇرلەرى ۇسىنىلدى.
قۇمار ىرگەباي ۇلى قالانى اباتتاندىرۋ تەك قانا ءسانسىز قورشاۋلاردى الىپ تاستاۋ عانا ەمەس, ول وبلىس ورتالىعىن كوگالداندىرۋ, كوشە جولدارىن, باقتاردى, قازاقستان كونستيتۋتسياسى كوشەسىن, اۋلالاردى قالپىنا كەلتىرۋ ەكەندىگىن اتاپ ايتتى.
«بۇگىنگى كۇنى «قىزىل بەلدەۋلەرگە», ياعني كوممۋنيكاتسيالار وتەتىن اۋماقتارعا ءىس جۇزىندە عانا ەمەس, مورالدىق جاعىنان دا ەسكىرگەن دۇڭگىرشىكتەر مەن ساۋدا نۇكتەلەرى سالىنعان. ولار قالانىڭ بەت-بەينەسىن بۇزىپ تۇر, ەستەتيكالىق تالاپتارعا جاۋاپ بەرمەيدى. اشىق تۇردە ساۋدا جاسايتىن بازارلار كوپ. «قىزىل بەلدەۋدە» تۇرعان نىساندار, باقىلاۋسىز ساۋدا ورىندارى الىنىپ تاستالاتىن بولسىن», دەپ ايماق باسشىسى قاتاڭ ەسكەرتتى.
وبلىس اكىمى «بەرەكە» شاعىناۋدانىن اباتتاندىرۋ جاعدايىنا دا ەرەكشە نازار اۋداردى.
«اسەم اۋدان بوي كوتەرىپ كەلەدى. وندا قۇرىلىس قارقىندى جۇرگىزىلۋدە. الايدا, ونى كوركەيتۋ ىسىندە شەشىمىن كۇتكەن ماسەلەلەر وتە كوپ. اۋلالاردا تولىعىمەن انتيسانيتارلىق جاعداي ورىن العان. قۇرىلىس قارقىندى, ال اۋماعى ادام كورگىسىز. اباتتاندىرۋ ءۇشىن جاقسى جوسپار دايىندالماعان. «بەرەكە» قالانىڭ ەڭ كورىكتى شاعىناۋداندارىنىڭ ءبىرى بولۋى ءتيىس», دەدى ءوڭىر باسشىسى.
بۇل اۋماقتا جانعا جايلى لوگيستيكانى قامتاماسىز ەتۋ, بيۋدجەتتە جاڭا جولدار سالۋ قاراستىرىلعان.
تالقىلاۋ بارىسىندا ۆوكزال الاڭىنداعى «قىزىل بەلدەۋلەرگە» ورنالاسقان نىساندار دا قاتتى سىنعا الىندى.
ءومىر ەسقالي, «ەگەمەن قازاقستان»