ماقالا جارىق كورگەننەن بەرى بۇقارالىق اقپارات قۇرالدارىندا, ايماقتاردا قىزۋ تالقىلانعان ماقالانى ەندى حالىققا تارقاتىپ ءتۇسىندىرۋ ماقساتىندا جەر-جەردە زيالى قاۋىم وكىلدەرىمەن كەزدەسۋلەر ءوتىپ جاتىر. الماتى وبلىسى, جامبىل اۋدانىندا قازاقستان حالقى اسسامبلەياسىنىڭ ۇيىتقىسىمەن جازۋشىلار نەسىپبەك ءداۋتاي ۇلى جانە مارحابات بايعۇتپەن كەزدەسۋ ءوتتى. كەزدەسۋگە اۋدان باسشىلىعى, سوعىس ارداگەرلەرى, باسقارما باسشىلارى, ۇستازدار, وقۋشىلار قاتىستى. قالامگەرلەر ەلباسىنىڭ ماقالاسىنداعى ماڭىزدى التى قادامنىڭ ەل بولاشاعىنا ايقىن باعدار بەرەتىنىن تاراتىپ ايتتى. ماسەلەن, مارحابات بايعۇت وڭتۇستىك قازاقستان وبلىسىنداعى اتقارىلىپ جاتقان جۇمىستاردى مىسال رەتىندە كەلتىرىپ, تاجىربيە الماسۋعا بولاتىنىن جەتكىزدى. «ەلباسى ماقالاسىندا ءبىلىم ساپاسىنا ايىرىقشا كوڭىل ءبولىنىپ وتىر. ءبىلىم – بولاشاقتىڭ جولى. ونداعى پراگماتيزم ماسەلەسى بۇگىن قازاق حالقى ءۇشىن وتە ماڭىزدى نارسە. ۋاقىت پەن قارجىنىڭ ىسىراپشىلدىعىن جويۋ كەرەك. لاتىن قارپىنە كوشۋ تۋرالى 2012 جىلعى ەلباسى ۇسىنعان ستراتەگياسىندا ايتسا, رۋحاني جاڭعىرۋدى نۇرسۇلتان نازارباەۆ 1993 جىلى ورداباسىندا ءۇش ەلدىڭ باسشىسى جينالعان ۇلكەن جيىندا تىلگە تيەك ەتكەن ەدى. سودان بيىل ناقتى قۇجات ماندەس ماقالاسى جارىق كوردى. بۇل اسىقپاعان دا, كەشىكپەگەن دە وڭ باستاما», دەدى مارحابات بايعۇت.
ال نەسىپبەك ءداۋتاي ۇلى ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ ۇلت ءۇشىن نەسىمەن ماڭىزدى ەكەنىن ايتتى: «جالپى العاندا, بۇل باعدارلامالىق ماقالا «قازاق قالاي ءومىر ءسۇرىپ جاتىر؟ رۋحاني ديدارى قانداي؟ ەرتەڭى نە بولماق؟» دەگەن ساۋالدارعا جاۋاپ بەرەتىن قادامدارعا باستايتىن تەتىك. وسى ماقالادا العا قويىلعان مىندەتتەردى مۇلتىكسىز اتقارساق قانا, جاڭاعى سۇراقتاردىڭ جاۋابىن تابامىز. بۇل جاستار ءۇشىن, بولاشاق ءۇشىن جاسالعان ساياسي قادام. الەمدە ەكونوميكالىق جاقتان دا, مادەنيەت جاقتان دا العا وزعان مەملەكەتتەردى بيىككە سۇيرەگەن ءۇش نارسە: ءبىلىم. مادەنيەت. ءتارتىپ. الەمنىڭ ماڭىزدى كىتاپتارىن قازاق تىلىنە اۋدارۋ, قازاقتىڭ ۇزدىك شىعارمالارىن التى تىلگە اۋدارۋدى ايتقاندا ەلباسى وسى ءۇش ماسەلەنى ءبىر-اق قامتىپ وتىر».
جيىنعا قاتىسقان ۇستازدار رۋحاني جاڭعىرۋ ءۇشىن مەكتەپ وقۋلىقتارىن تۇزەۋ كەرەكتىگىن ايتسا, ارداگەرلەر جاستاردىڭ ءتارتىبى مەن تاربيەسىن اڭگىمەنىڭ وزەگى ەتتى. تاياۋ جىلداردا اتقارىلاتىن جۇمىستاردى ناقتى قاداپ ايتقان ەلباسىنىڭ تاپسىرمالارى ءوز دەڭگەيىندە ورىندالار دەپ سەنىمىز.
باعاشار تۇرسىنباي ۇلى, «ەگەمەن قازاقستان»