الايدا, زاڭدى بىلمەۋ جاۋاپكەرشىلىكتەن بوساتپايتىنىن ەسكەرسەك, بۇل باعىتتا ءتۇسىندىرۋ جۇمىستارىنىڭ ءالى دە جەتپەي جاتقاندىعىنا كوز جەتكىزۋگە بولادى. وسىعان وراي, اقمولا وبلىسى ىشكى ساياسات باسقارماسى قوعامدىق-ساياسي جاعداي مونيتورينگى ءبولىمىنىڭ باسشىسى وكسانا سالاحوۆا بۇقارالىق اقپارات قۇرالدارىنا ارنايى بريفينگ وتكىزدى.
مەملەكەتتىك سيمۆولداردى رەتتەيتىن «قازاقستان رەسپۋبليكاسىنىڭ مەملەكەتتىك رامىزدەرى تۋرالى» كونستيتۋتسيالىق زاڭ 1992 جىلدىڭ 4 ماۋسىمىندا قابىلدانعان بولاتىن. ۋاقىت وتە, ياعني 2007 جىلدىڭ 4 ماۋىسىمىندا اتالعان زاڭدىق قۇجاتقا بىرقاتار وزگەرىستەر ەنگىزىلدى. ال 2012 جىلى مەملەكەت باسشىسى مەملەكەتتىك رامىزدەردى قۇرمەتتەمەۋگە قاتىستى جاۋاپقا تارتۋ ءتارتىبىن كۇشەيتۋ جونىندەگى تاعى ءبىر زاڭعا قول قويعان بولاتىن. سودان باستاپ ولاردى ماسقارالاۋعا قاتىستى ايىپپۇل كولەمىن ارتتىرۋ, رامىزدەردى ازىرلەۋدە ۇلتتىق ستاندارتتاردى ساقماعانى ءۇشىن اكىمشىلىك جاۋاپكەرشىلىككە تارتۋ جانە ولاردى قولدانۋ ەرەجەلەرىن بۇزۋعا جاۋاپكەرشىلىكتى كۇشەيتۋ قولعا الىنعان-دى.
و.سالاحوۆانىڭ ايتۋىنشا, مەملەكەتتىك سيمۆولدارعا 25 جىل تولۋى مەرەيتويى قارساڭىندا ولاردى قالاي دۇرىس پايدالانۋعا بولادى نەمەسە نەندەي جاۋاپكەرشىلىكتەر قاراستىرىلعان دەگەن سۇراقتاردىڭ توڭىرەگىندەگى تالقىلاۋ وتە ماڭىزدى سيپات العان بولاتىن. اكىمشىلىك قۇقىق بۇزۋشىلىق كودەكسىنىڭ 418-بابىنىڭ تالاپتارىنا سايكەس, مەملەكەتتىك تۋ مەن مەملەكەتتىك ەلتاڭبانى ازىرلەۋدە نەمەسە پايدالانۋدا ۇلتتىق ستاندارتتاردى ساقتاماعاندارعا ايىپپۇلدار قاراستىرىلعان. اتاپ كورسەتكەندە, جەكە تۇلعالار ءۇشىن ول 50 ايلىق ەسەپتىك كورسەتكىش بولسا, شاعىن كاسىپكەرلىك پەن كوممەرتسيالىق ەمەس ۇيىمدارعا ەكى ەسەگە دەيىن, ال ءىرى كاسىپكەرلىك سۋبەكتىلەرىنە 400 ايلىق ەسەپتىك كورسەتكىش دەڭگەيىندە بەلگىلەنگەن. بۇل رەتتە, ۇلتتىق ستاندارتقا ساي كەلمەيتىن مەمرامىزدەردى جويۋ ءبىر ەڭبەك كۇنى ىشىندە جۇزەگە اسىرىلۋى ءتيىس.
ءبولىم باسشىسى ازاماتتاردىڭ جەكە كولىكتەرىندە نەمەسە باسپانالارىندا مەمرامىزدەردى پايدالانۋىنا قاتىستى تۋىندايتىن جايتتارعا قاتىستى دا جاۋاپ بەردى. ونىڭ ايتۋىنا قاراعاندا, مەملەكەتتىك تۋدى مەملەكەتتىك ەمەس ۇيىمدار مەن جەكە تۇلعالارعا تيەسىلى عيماراتتاردا پايدالانۋعا تىيىم سالىنبايدى, الايدا, ۇلتتىق ستاندارتتارعا سايكەس شەكتەۋ دە جوق ەمەس. دەي تۇرعانمەن, ازاماتتار مەملەكەتتىك تۋدى ءوزىنىڭ پاتريوتتىق سەزىمىن, ەلىمىزدىڭ جەتىستىگىن پاش ەتۋ ماقساتىندا تۇرعان ءۇيىنىڭ شاتىرىنا, بالكونعا, ءتىپتى وفيسىنە ءىلىپ قويۋىنا بولادى. بۇل جەكە اۆتوكولىككە دە قاتىستى. ال مەملەكەتتىك ەلتاڭباعا قاتىستى ايتقاندا, ونىڭ قوعامدىق جانە وزگە دە ۇيىمداردىڭ گەرالديكالىق نەگىزى رەتىندە پايدالانۋىنا تىيىم سالىنعان. سول سياقتى ونى تۇرعىن ۇيلەر مەن جەكە اكىمشىلىكتىك عيماراتتار مەن اۆتوكولىكتەردە ورناتۋ زاڭسىز سانالادى. مەملەكەتتىك گيمنگە قاتىستى ايتقاندا, ونىڭ اۋديوجازباسىن كليپتەرگە پايدالانۋ دۇرىس ەمەس. زاڭنىڭ 8-بابى بويىنشا, مەملەكەتتىك ءانۇراندى پايدالانۋعا دا شەكتەۋ قويىلعان. ماسەلەن, بۇرىنعى قازاقستاندىق, قازىرگى رەسەي ازاماتى ءانۇراننىڭ ءماتىنىن ورىسشاعا اۋدارىپ, ءوزىنىڭ كليپىنە پايدالانعان. ارينە, بۇل دۇرىس ەمەس. جەلىدە كەڭىنەن تالقى تەزىنە تۇسكەن-ءدى.
جالپى بريفينگ بارىسىندا مەملەكەتتىك سيمۆولداردى پايدالانۋدىڭ اۋقىمى كەڭ ەكەندىگى ەرەكشە اتالدى.
اسقار تۇراپباي ۇلى, «ەگەمەن قازاقستان»
اقمولا وبلىسى