ءباسپاسوز ماجىلىسىنە ۇلتتىق ەكونوميكا ءبىرىنشى ۆيتسە-ءمينيسترى رۋسلان دالەنوۆ جانە ستاتيستيكا كوميتەتىنىڭ توراعاسى نۇربولات ايداپكەلوۆ قاتىستى.
«جاريالانعان جاڭعىرتۋدىڭ ءۇشىنشى كەزەڭى جاڭا جوعارى تەحنولوگيالىق سالانى, بارلىق جەردە يننوۆاتسيالاردى قولدانۋدى بىلدىرەدى. تسيفرلى ەكونوميكا داميدى, بۇل جاھاندىق ءۇردىس. جانە «جاڭا ەكونوميكا» ستاتيستيكانى اينالىپ وتپەۋى ءتيىس. سوندىقتان ءبىز ادىستەمەنى زاماناۋي حالىقارالىق تاجىريبە نەگىزىندە جەتىلدىرۋدەمىز. سونىمەن قاتار ستاتيستيكا سايتىندا جاڭا «3.0 جاڭعىرتۋ» ءبولىمىن اشامىز. ستاتيستيكا قازاقستاننىڭ ءۇشىنشى جاڭعىرتىلۋىن ەسەپتەيتىن بولادى», دەدى ر.دالەنوۆ.
ۆيتسە-مينيستر ستاتيستيكانىڭ اعىمداعى جۇمىستارى دا قايتا جاڭارتىلاتىنىن اتاپ ءوتتى. سونداي-اق, ەندى تسيفرلاردى تۇراقتى نەگىزدە جان-جاقتى ءتۇسىندىرىپ, قوسىمشا ەسەپ ادىستەمەسى دە ايتىلماق. سونىمەن قاتار, ستاتيستيكا سايتىنداعى بارلىق ادىستەمەلەر كورسەتكىشتەردىڭ قالاي ەسەپتەلەتىنىن مىسالدار ارقىلى اشىپ كورسەتەتىن بولادى. بۇل ءۇشىن كورنەكىلىك تولىق ەسەپپەن ارنايى ايدار اشىلماق, بۇل ارقىلى سەنىمدىلىك پەن كەرى بايلانىس ارتادى دەپ كوزدەلۋدە.
ء«بىز ستاتيستيكانىڭ ادىستەمەسىن جەتىلدىرۋ ءۇشىن ونلاين الاڭى ارقىلى جاڭا قارىم-قاتىناس فورماتىن دامىتۋعا دايىنبىز. جۋرناليستەردى, ەكونوميستەردى, قوعامدى, ازاماتتاردى تالقىلاۋلارعا بەلسەندى قاتىسۋعا شاقىرامىز», دەدى ۆيتسە-مينيستر.
ءسويتىپ سايت بارىنشا جاڭارتىلىپ, ونىڭ موبيلدىك قوسىمشاسى جاسالماق. ستاتيستيكا سايتىندا سونداي-اق حالىق سانىن ەسەپتەۋشى, باسقا دا وزەكتى دەرەكتەردى ەسەپتەۋشى, ينفوگرافيكا سياقتى قىزىقتى ايدارلار پايدا بولادى.
قازاقستاندا تسيفرلى تەحنولوگيالار مەن ينتەرنەتتى قولدانۋ ارقىلى قۇرىلاتىن ەكونوميكالىق قاتىناستار اۋقىمى ۇلعايىپ كەلەدى. مىسالعا, قازاقستاندىقتاردىڭ اراسىندا ۇيالى بايلانىستى پايدالانۋشىلار سانى − 97 پايىزعا, ينتەرنەت پايدالانۋشىلار سانى 77 پايىزعا جەتكەن.
«ينتەرنەت ارقىلى جاسالاتىن ساتىلىمدار كوبەيدى, ونلاين-فيلمدەر كورەتىن, ەلەكتروندى كىتاپتار وقيتىن, سمارتفوندارىنا ءتۇرلى قوسىمشالار جۇكتەيتىن ادامدار قاتارى ارتتى», دەدى ر.دالەنوۆ.
ال قازىرگى كۇنى ءىرى حالىقارالىق ۇيىمدار قازاقستاندىق ستاتيستيكانىڭ دەڭگەيىن جوعارى باعالايدى. بۇل تۋرالى ستاتيستيكا كوميتەتىنىڭ توراعاسى نۇربولات ايداپكەلوۆ مالىمدەدى.
ستاتيستيكالىق اقپاراتتىڭ دۇرىستىعى وزەكتى ماسەلەلەردىڭ ءبىرى بولىپ سانالادى. ستاتيستيكالىق تاجىريبەدە «جاھاندىق باعالاۋ» ۇعىمى بار. قازاقستاندىق ستاتيستيكا جۇرگىزىلە باستاعان كەزەڭنەن بەرى وسىنداي باعالاۋ جۇمىستارى ەلىمىزدە ءۇش رەت – 2003, 2008 جانە 2016 جىلدارى جۇرگىزىلگەن.
«2016 جىلدىڭ سوڭى مەن 2017 جىلدىڭ باسىندا ءبىزدى ءۇش ءىرى حالىقارالىق ۇيىم – بۇۇ ەۋروپالىق ەكونوميكالىق كوميسسياسى, ەۋروستات جانە ەركىن ساۋدا قاۋىمداستىعى باعالادى. سونىڭ ناتيجەسىندە ولار قازاقستاندىق ستاتيستيكادا ەلەۋلى ىلگەرىلەۋدىڭ بار ەكەنىن ايقىنداپ, بىزگە ورتالىق ازيا وڭىرىندەگى كوشباسشى اتاۋىن بەرىپ, ادىستەمە بويىنشا تاجىريبەمەن بولىسۋگە شاقىردى», دەدى ن.ايداپكەلوۆ. جالپى, كوميتەت توراعاسىنىڭ ايتۋىنشا, ستاتيستيكانى 5 000-عا جۋىق كورسەتكىش قالىپتاستىرادى. ەلىمىزدىڭ ستاتيستيكا كوميتەتىنە ەسەپتەر ونلاين رەجىمدە جانە قاعاز تۇرىندە كەلىپ تۇسەدى, كوميتەت ماماندارى كەلگەن اقپاراتتارعا تالداۋ جاساپ, قاجەت بولعان جاعدايدا ولاردىڭ دۇرىستىعىن قايتا تەكسەرەدى.
دينارا بىتىكوۆا, «ەگەمەن قازاقستان»