بوبەك – بالاباقشا بەزبەنى. ونىڭ كۇندەلىكتى كوڭىل-كۇيىنە, ءجۇرىس-تۇرىسىنا, ىنتا-ىقىلاسىنا, قابىلەت-قارىمىنا قاراپ-اق «پەرىشتە پاتشالىعىنداعى» احۋالدى اڭعاراسىڭ. ارينە, ءبىر بالامەن بۇكىل ۇجىمنىڭ تىنىس-تىرشىلىگىن بەزبەندەۋگە بولمايتىنى بەلگىلى. بىراق, بولجامنىڭ بوداۋىنا جاراپ جاتىر. ءوزىم كۇنى كەشە زەينەتكەرلىككە شىققان «ەرتەگى» بالاباقشاسىنىڭ بۇرىنعى باسشىسى رىسقال يارىشەۆانى بىلىكتى بالا باعبانى دەپ باعالايمىن. مەكتەپ جاسىنا دەيىنگى بالالار مەكەمەسىن اتىنا ساي ۇستادى. قۇلدىراڭداعان كەنجە قىزىم اياۋلىمنىڭ ارقاسىندا ءۇش جىل ءوزىم دە سول «ەرتەگى الەمىنىڭ» ادەمى اسەرىن ءبولىستىم. بۇرناعى جىلى بالاباقشاعا كۇردەلى جوندەۋ جۇرگىزەتىن بولىپ, بۇلدىرشىندەردى ءبولىپ-ءبولىپ جىبەردى. بىزگە ءۇيدىڭ الدىنداعى بالاباقشا بۇيىردى. كەشكە بارعانىمدا مەكەمە باسشىسى قولىما كەڭسە زاتىنىڭ ءتىزىمىن ۇستاتتى. «مىناۋىڭ دۇنيەنىڭ زاتى عوي؟!» دەدى زايىبىم, ونشا ۇناتپاي. ساۋدالاسىپ جاتۋ – ۇيات! ايتقانىن الىپ بەردىم. ونى قويشى, قيعىلىقتىڭ كوكەسىن قىزىمنىڭ «قيقارلىعىنان» كوردىم. بارعانىنا ءبىر اپتا ءوتتى مە, وتپەدى مە: ء«وزىمنىڭ «ساديگىمە» اپار!» دەگەندى شىعاردى. ايتقانعا تۇسىنبەيدى. تاڭەرتەڭ ۇيدەن شىققان بەتتە تۋرالاپ «ەرتەگىگە» تارتادى. الداپ-سۋلاپ ءۇش ايدى ارەڭ وتكىزدىك. مويىنداۋ كەرەك, باردىڭ باعاسىن بىلمەيمىز. كەيدە ايىنا تولەگەن 8 000 تەڭگەنى بۇلدايمىز. بالا تاربيەسى تەك سوعان تىرەلىپ تۇرعانداي تەپسىنەمىز. ەگەر سول اقشانى بەرىپ «بالاڭدى باق!» دەسە, «مىناۋ اۋىز شايۋعا كەلمەيدى عوي!» دەپ بەتتەن الار ەدىك. ال, ەسى اۋىپ قالماي, وتىز ءۇيدىڭ ەركەسىنىڭ ءتىلىن تاپقان تاربيەشىگە ەسكەرتكىش قويسا, ارتىق ەمەس. ءبىز جايشىلىقتا ءبىر اۋىز جىلى ءسوز ايتۋعا جارامايمىز. قىزىم كەيىنگى تاربيەشىسى قارلىعا ناۋرىزباەۆانى «مەنشىكتەپ» العانى ءوز الدىنا, ونىڭ الدىنداعى قارلىعاش سارينوۆا مەن گۇلميرا اشىربەكوۆاعا, باسقا بالاباقشاعا باسشى بولىپ كەتكەن الما ورازاليناعا كەزدەيسوق كەزدەسىپ قالعاندا «مەنىڭ تاتەم!» دەگەندە, ەرىكسىز ويلانىپ قالاسىڭ. بالا باعبانىنا دەگەن قۇرمەتىڭ ارتا تۇسەدى. ءۇش جىل وتە شىقتى. بىراق, بوسقا كەتكەن جوق. ونىڭ جەمىسىن 1-سىنىپتا وقيتىن بالامنىڭ بويىنان كورەمىن. بالاباقشا ۇجىمىنا ريزاشىلىعىمدى بىلدىرەمىن. «ەشتەن – كەش جاقسى!».
الىبەك ءابدىراش, جۋرناليست
قاراعاندى وبلىسى, ساتباەۆ قالاسى سۋرەتتى تۇسىرگەن اۆتور