ەل پرەزيدەنتىنىڭ تاپسىرماسى بويىنشا الماتىدا "نۇرلى جول" باعدارلاماسىنىڭ ينفراقۇرىلىمدىق جوبالارىنا 20 ميلليارد تەڭگە, ال داعدارىسقا قارسى باعدارلاما اياسىندا تۇرعىن ءۇي قۇرىلىسىنا رەسپۋبليكالىق بيۋدجەتتەن 33 ميلليارد تەڭگە بولىنگەن. الماتى اكىمى 2016 جىل مەن بيىلعى جىلدىڭ العاشقى توقسانىندا قالادا 4 مىڭعا جۋىق پاتەر بولىنگەن, ياعني 2014-2015 جىلدارمەن سالىستىرعاندا ەكى ەسەگە ارتقانىن, جىل اياعىنا دەيىن تاعى دا 4,5 مىڭ پاتەر بولىنەتىنىن ايتتى.
"الماتىدا "نۇرلى جول" باعدارلاماسى اياسىندا العاشقى بەس جىل ىشىندە قۇنى 140 ميلليارد تەڭگە بولاتىن 670 مىڭ شارشى مەتر تۇرعىن ءۇي سالىنادى. جىل قورىتىندىسى بويىنشا ءۇي كەزەگىندە تۇرعان ءاربىر ءتورتىنشى وتباسى تيەسىلى پاتەرىن الادى. بۇگىن ءبىز كەزەكتە تۇرعان 120 وتباسىعا پاتەر كىلتتەرىن تاپسىرامىز, ولاردىڭ اراسىندا مۇگەدەكتەر, كوپبالالى جانە تولىق ەمەس وتباسىلار, مەملەكەتتىك قىزمەتكەرلەر, بيۋدجەت قىزمەتكەرلەرى, اسكەريلەر بار. بۇلاردىڭ باسىم كوپشىلىگى - پاتەر جالداپ نەمەس تۋىستارىنىڭ ءۇيىن پانالاپ, پاتەر كەزەگىندە ۇزاق تۇرعاندار. بۇگىن ولار وزدەرىن ناعىز پاتەر يەلەرى رەتىندە سەزىنە الادى", - دەدى باۋىرجان بايبەك.
الماتى اكىمى حالىققا پاتەر ءبولۋدى بارىنشا اشىق جۇرگىزۋ ءۇشىن ءتۇرلى شارالاردىڭ جۇزەگە اسقانىن جەتكىزدى. بۇدان بىلاي ءۇي كەزەگىنە قويۋ جانە كەزەكتىڭ جىلجۋى ەلەكتروندى ۇكىمەت پورتالى ارقىلى جۇرەتىن بولادى. سونىمەن قاتار, العاش رەت كەزەكتىڭ ەلەكتروندى ينۆەنتاريزاتسياسى ەنگىزىلگەن, ياعني كەزەكتە تۇرعاندار جىل سايىن تۇرعىن ءۇي باسقارماسىنا كەلمەي - اق ديستانتسيالىق جۇيە ارقىلى وزىنە قاتىستى مالىمەتتى بىلەدى. تاعى ءبىر جاڭالىق, SMS- حابارلار ارقىلى دا قاجەتتى مالىمەتتى الۋعا بولادى. بۇلاردان وزگە, جىل اياعىنا دەيىن ادام فاكتورىنسىز, كەزەكتە تۇرعاندار اراسىندا اۆتونومدى كەستە ارقىلى پاتەر ءبولۋ مەحانيزمى جىل اياعىنا دەيىن ەنگىزىلەدى.