ماسەلەن, سارىاعاشتىق شارۋالار اۋدانداعى قاربىز وسىرەتىن بوزاي, جامبىل اۋىلدىق وكرۋگتەرىندەگى 720 گا ەگىستىكتەن 170 توننا قاربىزدىڭ ەرتە پىسەتىن سۇرىپىن جيناپ, كورشى مەملەكەتتىڭ ماگنيتوگورسك جانە بەلورەتسك قالالارىنا جونەلتتى. جەرگىلىكتى قوجالىق يەلەرى قاربىزدىڭ كەلەسى پارتياسىن ساۋدالاۋعا دايىندالىپ ءجۇر. تاياۋدا 200 توننا قاربىز تاعى دا ەلىمىزدىڭ سولتۇستىك ايماقتارىنا جول تارتادى دەپ كۇتىلۋدە.
جالپى, سارىاعاشتىقتار باقشالىقتان وتكەن جىلى 105 مىڭ توننا قاۋىن-قاربىز جيعان بولاتىن. بيىلعى بولجام 120 مىڭ تونناعا جەتەدى دەيدى اۋداندىق اۋىل شارۋاشىلىعى ءبولىمىنىڭ ماماندارى. ال سارىاعاشتا باقشا ونىمدەرى 4,5 مىڭ گا القاپقا ەگىلسە, ونىڭ 3,5 مىڭ گا-ندا قاۋىن-قاربىز باپتالۋدا. ونىڭ ىشىندە 720 گا تاناپ ەرتە پىسەتىن قاربىز تۇرىنە ارنالعان.
ماقتاارالدىق قاربىز وسىرۋشىلەر دە كورشىلەس اۋدانداعى ارىپتەستەرىنەن قالىسار ەمەس. وندا بۇگىندە 100 توننا قاربىز رەسەيگە ەكسپورتتالىپ ۇلگەرگەن. اۋدانداعى «اتامەكەن» اۋىلدىق وكرۋگىنىڭ ديقاندارى قاربىزدىڭ ءار كەلىسىن 150 تەڭگەدەن وتكىزىپ جاتىر. ال جالپى بيىل ماقتاارال اۋدانىندا 5700 گەكتارعا قاربىز ەگىلگەن.
شاردارالىق شارۋالاردىڭ دا باقشا ونىمدەرى بارشىلىق. ونداعى جاۋشىقۇم اۋىلدىق وكرۋگىندە قاربىز ەگۋمەن شۇعىلدانىپ جاتقان ديقاندار العاشقى 30 توننا ءونىمدى رەسەيدىڭ ياكۋتيا اۆتونوميالىق رەسپۋبليكاسىنا ساتىلىمعا جونەلتتى. 2 گەكتار القاپقا جامىلعى استىنا ەرتە پىسەتىن قاربىز تۇقىمىن وتىرعىزعان «باعدات» شارۋا قوجالىعىنىڭ ديقاندارى پلەنكانى قوس قاپتاما تۇرىندە جاۋىپ شىققان ەكەن. ءبىرىنشى بولىپ ەگىستىك القاپتان ءونىم ارتقان قوجالىق توراعاسى ب.شىنازباەۆ ءار گەكتارىنان كەم دەگەندە 40 تن-دان قاربىز الۋدان ءۇمىتتى.
شاردارا اۋدانى بويىنشا جاۋشىقۇمدىق شارۋالار جامىلعى استىنا ءونىم ەگۋدەن الدىڭعى ورىندا تۇر. اۋىل اكىمى سەرىك ماحامبەتوۆتىڭ مالىمەتىنشە قازىرگى تاڭدا 3312 گەكتار اۋماققا باقشا داقىلدارى ورنالاستىرىلعان. مۇنىڭ 100 پايىزى جامىلعى استىنا ەگىلىپ وتىر. كوكتەم باستالىسىمەن قاربالاس تىرلىككە كوشەتىن ديقاندار قاۋىمى پلەنكا استىنا داقىل ەگۋدىڭ شىعىنى ءار گەكتارىنا 500 مىڭ تەڭگەنى شامالايتىنىن ايتادى. دەگەنمەن, نارىققا ەرتە شىعارىپ ۇلگەرسە شىققان شىعىننىڭ ورنى تولادى.
جالپى, بيىل وڭتۇستىك قازاقستان وبلىسى بويىنشا 53,4 مىڭ گا جەرگە باقشا داقىلدارى ەگىلگەن. ونىڭ 32 مىڭ گەكتارىندا قاۋىن داقىلى ءوسىپ جاتسا, 21 مىڭ گەكتارى قاربىز القابى. وبلىستىق اۋىل شارۋاشىلىعى باسقارماسى ماماندارىنىڭ بولجامىنشا, 1 شىلدەگە قاۋىن داقىلى دا ءپىسىپ, ءوڭىر نارقىنا جول تارتپاق. الدىن الا ەسەپ بويىنشا بيىل دا ايماق ديقاندارى 1 ملن. تونناعا جۋىق قاۋىن-قاربىز جيناپ, كول-كوسىر ونىمگە قارىق بولادى.