31 مامىر كۇنى ايماق باسشىسى, قر مەملەكەتتىك حاتشىسى گۇلشارا ابدىقالىقوۆا جانە قازاقستان حالقى اسسامبلەياسى توراعاسىنىڭ ورىنباسارى دارحان مىڭبايمەن بىرگە وتباسى ۇلگىسىندەگى «اتامەكەن» بالالار اۋىلىنا بارىپ, ونداعى تاربيەلەنۋشىلەردى مەرەكەسىمەن قۇتتىقتادى. بۇلدىرشىندەرگە مۋزىكالىق اپپاراتۋرا سىيعا تارتتى.
ال,«اتامەكەن» اۋىلىنىڭ كىشكەنتاي تۇرعىندارى مارتەبەلى مەيماندار نازارىنا ارنايى ازىرلەگەن كونتسەرتتىك باعدارلاماسىن ۇسىندى.
1 ماۋسىم كۇنى وبلىس اكىمى وبلىستىق بالالار اۋرۋحاناسىندا بولىپ, ونداعى ونكوگەماتولوگيا,ءپاللياتيۆتى ەمدەۋ بولىمشەلەرىندەگى ەمدەلۋشىلەرمەن كەزدەسىپ, ولارعا سىيلىقتار تابىس ەتتى. سونىمەن قاتار, نەوناتالدىق حيرۋرگيا جانە ساۋلەلىك تەراپيا بولىمشەلەرىنىڭ جۇمىسىمەن تانىستى.
ەستەرىڭىزگە سالا كەتەيىك, قىزىلوردا قالاسىندا 300 ورىندىق بالالار اۋرۋحاناسى وتكەن جىلى اشىلعان بولاتىن.
سونداي-اق, قىرىمبەك كوشەرباەۆ «بالاپان» باعدارلاماسى اياسىندا سالىنىپ, 2014 جىلدىڭ شىلدەسىندە ءوز جۇمىسىن باستاعان «شاعبان» ينكليۋزيۆتىك بالاباقشاسىندا بولدى.
تاربيەلەنۋشىلەردىڭ تەزىرەك ساۋىعۋى ءۇشىن مۇندا زاماناۋي ەمدەۋ تاسىلدەرى كەڭىنەن قولدانىلادى. مىسالى: اۋتيزم جانە باسقا دا ناۋقاس بالالار ءۇشىن «تامەتيست» باعدارلاماسى, يپپوتەراپيا (جىلقى ارقىلى ەمدەۋ) جانە ت.ب.
بالاباقشاداعى تاربيەلەنۋشىلەردى وبلىس اكىمى مەرەكەمەن قۇتتىقتاپ, سىيلىقتار تابىس ەتتى. سونداي-اق, مۇمكىندىگى شەكتەۋلى بالالارعا دەگەن قامقورلىقتارى ءۇشىن بالاباقشا قىزمەتكەرلەرىنە العىسىن ءبىلدىردى.
- قىزىلوردا وبلىسىندا 5062 مۇمكىندىگى شەكتەۋلى بالا بولسا, سونىڭ ىشىندە 2238 بالا ينكليۋزيۆتىك بىلىممەن قامتىلعان. سىزدەر اتا-بابامىزدىڭ ءداستۇرىن ناسيحاتتاپ, بالالاردى اتقا مىنگىزۋ ارقىلى ساۋىقتىرىپ قانا قويماي, سونىمەن قاتار ۇلكەن ومىرگە جول اشىپ بەرىپ وتىرسىزدار. ءبىز «شاعبان» بالاباقشاسىنىڭ تاجىريبەسىن وبلىس كولەمىندە ناسيحاتتاپ, قولداپ, ونىڭ جۇمىس اياسىن كەڭەيتۋگە مۇددەلىمىز. الداعى ۋاقىتتا وبلىستىق اكىمدىك تاراپىنان بۇل جۇمىستى زەرتتەپ, تاجىريبەنىڭ ءارى قاراي جۇمىس جاساۋىنا مۇمكىندىكتەر جاسايمىز, - دەدى وبلىس اكىمى.