بۇل كورمەنىڭ ەرەكشەلىگى – ءۇش قاباتتان, ءۇش بولىمنەن تۇرادى. العاشقى قاباتتاعى بولىگى « ۇلى دالا جاۋھارلارى» دەپ اتالدى. مۇندا كيىز ءۇيدىڭ ىشكى كورىنىسى, ات ابزەلدەرى, قازاقتىڭ زەرگەرلىك اشەكەيلەرى, تۇرمىس زاتتارى, كيىزدەن, تەرىدەن جاسالعان كادەسىيلار, ۇلتتىق كيىمدەر, سۋرەتشى جەڭىس كاكەن ۇلىنىڭ بىرنەشە كارتيناسى قوناقتار نازارىنا ۇسىنىلدى. – تاۋەلسىز, قازاقستاننىڭ ءوز تاريحى, مادەنيەتى, ونەرى بار. بۇل كورمەگە سوناۋ ساق, عۇن, تۇركى قاعاناتى, وعىز زامانىنان بەرگى قازاق دالاسىنداعى قانشاما زەرگەرلەردىڭ قولىنان شىققان بۇيىمداردىڭ قويىلۋى قازاق مادەنيەتى تامىرىنىڭ تەرەڭدە جاتقانىن كورسەتەدى. XIX عاسىردا كوكشەتاۋ جەرىندە اسىل زاتتاردىڭ ءبارى جەر بەتىندە جاتقان ەكەن. وسىنىڭ قۇنىن بىلگەن اعىلشىندار كەلىپ تەرىپ اكەتكەن. كەزىندە سال-سەرىلەرىمىزدىڭ ءۇستى التىن-كۇمىسكە مالىنۋى جەرىمىزدىڭ باي ەكەنىنىڭ ءبىر بەلگىسى, – دەدى عالىم سەرىك نەگيموۆ. ەكىنشى قاباتتاعى بولىمگە «كۇمىستىڭ سۇلۋ سىڭعىرى» دەگەن اتاۋ بەرىلگەن. كۇمىستىڭ باكتەريالارعا قارسى تۇراتىن, ەمدىك قاسيەتى ادامزاتقا وسىدان التى مىڭ جىل بۇرىن بەلگىلى بولعان. سوندىقتان ەرتە كەزدە حاندار نەگىزىنەن كۇمىس ىدىستان اس ءىشۋدى ءجون كورگەن. اتاۋىنا ساي مۇنداعى زاتتاردىڭ ءبارى كۇمىستەن ازىرلەنگەن. كورمەنىڭ بۇل بولىگىندە ەلباسى نۇرسۇلتان نازارباەۆقا ءتۇرلى ەلدەردىڭ دەلەگاتسيالارى تارتۋ ەتكەن سىيلىقتار قويىلعان. مۇندا كۇمىستەن جاسالعان ىدىس-اياقتاردىڭ ءتۇر-ءتۇرىن كورۋگە بولادى. عيماراتتىڭ ەكىنشى قاباتىندا سونداي-اق, جەمىس سالعىش ۆازا, ساندىك ءۇشىن قابىرعاعا ءىلىپ قوياتىن «پاننو» تاباقشالارى, قۇمعاندار, كۇمىستى قارايتۋ ادىسىمەن دايىندالعان وزگە دە باعالى زاتتار جۇرت نازارىنان تىس قالمادى. كورمەنىڭ ءۇشىنشى قاباتىندا ءتۇرلى ەلدەر مەن ءداۋىردىڭ مۋزىكالىق اسپاپتار توپتاماسى تانىستىرىلدى. وسىعان سايكەس كورمەنىڭ بۇل بولىگىنە «الەم xالىقتارىنىڭ مۋزىكالىق اسپاپتارى» دەگەن اتاۋ بەرىلدى. مۇندا ورتالىق ازيا xالىقتارىنىڭ شەكتى ىسقىش اسپابى «گيدجاك», ەكى شەكتى «دۋتار», قىرعىز xالقىنىڭ ءۇش شەكتى «قومىزى», ۇيعىردىڭ «ساتار», كورەيدىڭ «چانگۋ», يندونەزيالىق «بونانگ», قىتايدىڭ «گونگ», گرۋزيننىڭ ءتورت شەكتى «چونگۋري», تۇرىكتىڭ «ساز», سول سياقتى پلاستينكالاردى ويناتۋعا ارنالعان «پاتەفون» سەكىلدى اسپاپتار كورەرمەن نازارىنا ۇسىنىلدى. ايتا كەتەيىك, بىرەر اي بۇرىن ءدال وسى عيماراتتىڭ ءتورتىنشى قاباتىندا, ياعني كۇمبەزدى زالدا ۇلتتىق وليمپيادا كوميتەتىنىڭ باسشىلارى مەن مۇراعاتىنىڭ جەكە قورلارى نەگىزىندە قازاقستاننىڭ سپورتتاعى جەتىستىكتەرىن كورسەتەتىن «وليمپيادالىق قوزعالىس» كورمەسى اشىلعان بولاتىن. «بولاشاقتىڭ ەنەرگياسىن قارسى الامىز!» قور كورمەلەرىنىڭ توپتاماسى 2017 جىلدىڭ 31 تامىزىنا دەيىن جالعاسادى.
ايان ءابدۋالي, «ەگەمەن قازاقستان»