– ءفيلمنىڭ يدەياسى مارقۇم مەڭتاي وتەپبەرگەنوۆتىكى. ءبىر كۇنى كينوستۋديادا كەزدەسكەنىمىزدە, كينومەحانيكتەر تۋرالى ويىن ايتتى. كەيىننەن ونىڭ ويىن تارقاتىپ, ستسەناري جازىپ شىقتىم. ستسەناريدى كورگەن ساتتەن باستاپ, اۋىرىپ جۇرگەنىنە قاراماستان, باستى ءرولدى سومداۋعا دايىندالىپ, قۋانىپ ءجۇردى. امال نەشىك, ءفيلمنىڭ تۇسىرىلىمگە شىققانىن كورە الماي كەتتى. الايدا, ونىڭ ەسىمى تيترعا جازىلادى, – دەدى رەجيسسەر ەرمەك تۇرسىنوۆ.
فيلم ەكىنشى دۇنيەجۇزىلىك سوعىس كەزىندە نەمىس قارياسىنان سىيعا كينواپپارات العان سولدات تۋرالى. سوعىستان ورالعان جاۋىنگەر ءۇيىنىڭ قاڭىراپ بوس تۇرعانىن كورەدى, جاقىندارى قايتىس بولعان. ول گەرمانيادا قارت نەمىستەن سىيعا العان كينوپروەكتورمەن كينو قويادى. قايعىسىنان تەز ايىعۋىنا وسى فيلمدەر ىقپال ەتەدى. ءومىردى قايتا باستاۋعا قۋات الادى. ءسويتىپ, قارتايعان شاعىنا دەيىن ەل ارالاپ, كينواپپاراتپەن ەسكى فيلمدەردى كورسەتىپ, كينەماتوگرافتىڭ كومەگىمەن الەمدى وزگەرتۋگە بولادى دەپ سەنەدى.
«كينومەحانيك» كينوكارتيناسى مادەنيەت جانە سپورت مينيسترلىگىنىڭ تاپسىرىسى بويىنشا تۇسىرىلگەلى وتىر. كارتينانىڭ پروديۋسەرى قانات تورەباي ەكىنشى دۇنيەجۇزىلىك سوعىس سۋرەتتەلەتىن ەپيزودتار وتكەن جىلدىڭ جەلتوقسان ايىندا بۋداپەشتە تۇسىرىلگەنىن ايتىپ, تۇسىرىلگەن 8 مينۋتتىق بەينەماتەريالدى cاراپتاۋ كەڭەسىنىڭ مۇشەلەرىنە كورسەتتى.
– سوعىستان كەيىنگى جىلداردى ساحنالاۋعا قاجەتتى نىسانداردى تابۋ ءۇشىن قازاقستاننىڭ بارلىق ايماعىن شارلاپ شىقتىق. ارالاي كەلە, ءفيلمدى جاركەنت قالاسى ماڭىندا ءتۇسىرۋدى ءجون دەپ شەشتىك. ءبىزدىڭ كارتينامىز حح عاسىردا كينو ونەرىن تاراتۋشىلارعا باعىشتالادى, – دەپ تۇيىندەدى پروديۋسەر.
ەرمەك تۇرسىنوۆتىڭ بۇل فيلمىندە باستى رولدەردى مۇرات ماقاجانوۆ جانە كارتينانىڭ قويۋشى سۋرەتشىسى قۋات تىلەۋباي سومدايدى. پروديۋسەر قانات تورەبايدىڭ ايتۋىنشا, فيلمدە وتاندىق جانە شەتەلدىك تانىمال اكتەرلەر بوي كورسەتەدى. 31 مامىر كۇنى ءتۇسىرىلىم توبى الماتى وبلىسىنا اتتانادى. سوڭعى تۇسىرىلىمدەر الماتىداعى «قازاقفيلم» كينوستۋدياسىنىڭ اۋماعىندا جانە تالعار قالاسىنىڭ مادەنيەت سارايىندا وتەدى.
ايگۇل احانبايقىزى, «ەگەمەن قازاقستان»
الماتى