استانادا «قازاقستان تەمىر جولى» ۇلتتىق كومپانياسى» اق باس عيماراتىندا «وي-ورىستەن – وركەندەۋگە» اتتى يننوۆاتسيالىق فورۋم ءوتتى. وعان بارلىق جول بولىمشەلەرى, فيليالدار مەن ەنشىلەس كاسىپورىنداردان 800-دەن استام دەلەگات قاتىستى. فورۋم اياسىنداعى كورمەگە وندىرىسكە ەنگىزىلگەن راتسيوناليزاتورلىق ەڭبەكتەر مەن تىڭ ۇسىنىستار قويىلدى. جيىن ماقساتى – جاڭاشىلعا وندىرىستە قولايلى احۋال ورناتىپ, ءاربىر ەڭبەككەردىڭ جۇمىس بارىسىندا تالانتىنىڭ بارلىق قىرىن اشۋىنا, سول ارقىلى ءوندىرىس تيىمدىلىگىن ارتتىرىپ, شىعىن كولەمىن ازايتۋعا ۇمتىلىسىنا قولداۋ كورسەتۋ.
«قتج» ۇك» اق پرەزيدەنتى اسقار مامين كورمەدە تەمىرجولشى راتسيوناليزاتورلاردىڭ ونداعان جوباسىمەن, ۇسىنىستارىمەن تانىستى. ونىڭ بارلىعى تەمىر جولدىڭ ءارتۇرلى سالاسىن قامتيدى. جاڭاشىلداردىڭ ۇزدىكتەرى ەلىمىز تاۋەلسىزدىگىنىڭ 20 جىلدىعىنا ارنالاتىن «20 جىل قورىتىندىسى» 1-ءشى رەسپۋبليكالىق يننوۆاتسيالىق فورۋم باعدارلاماسىنا ەنگىزىلمەك.
بيىلعى جىلدىڭ سەگىز ايىندا كومپانيا قورجىنىنا 770 يننوۆاتسيالىق جوبا تۇسسە, ونىڭ 525-ءى وندىرىسكە ەنگىزىلگەن. ول ارقىلى 111 ميلليون تەڭگە ۇنەمدەلىپتى.
كومپانيانىڭ باس ينجەنەرى باۋىرجان ورىنباساروۆ بۇگىنگى تاڭدا قتج قورجىنىندا 14 يننوۆاتسيالىق جوبانىڭ قارالىپ جاتقاندىعىن ايتسا, ونىڭ تورتەۋى نوۋ-حاۋ تەحنولوگيالىق جوبالارى بولىپ تابىلادى ەكەن. كومپانيادا يننوۆاتسيالىق يدەيالاردىڭ اقپاراتتىق ينكۋباتورى «4ي اۆتوماتتاندىرىلعان جۇيەسى» ەنگىزىلۋدە. بۇل ينكۋباتور ارقىلى ەڭبەككەرلەردىڭ يدەيالارى, ۇسىنىستارى جيناقتالىپ, وڭدەلىپ, ساراپتاۋدان وتكىزىلەدى. بۇل اقپاراتتىق ينكۋباتوردا قاراپايىم ەڭبەككەردەن باستاپ كومپانيا پرەزيدەنتىنە دەيىن ينتەرنەت ارقىلى كورپوراتيۆتىك جەلى جۇيەسىمەن تانىسا الادى. باس ينجەنەر كومپانيادا كادرلار بىلىكتىلىگىن جەتىلدىرۋگە زور ماڭىز بەرىلىپ وتىرعاندىعىنا دا توقتالدى. وسىعان وراي استانادا جىلىنا 15 مىڭ مامان كاسىبي-تەحنيكالىق دايىندىقتان وتە الاتىن قازىرگى زامانعا ساي جابدىقتالعان وقۋ ورتالىعى جاساقتالىپ جاتىر.
بۇگىندە استانادا «ەۆوليۋشن» سەرياسىنداعى قازىرگى زامانعى تەپلوۆوزدار شىعارىلىپ جاتسا, حالىقارالىق وزەن – تۇركىمەنستانمەن مەملەكەتتىك شەكارا جانە جەتىگەن –قورعاس تەمىر جول جەلىلەرىنىڭ قۇرىلىسى جۇرگىزىلۋدە. ۇلتتىق كومپانيا جاڭاشىل تەمىرجولشىلاردىڭ ۇسىنىستارى مەن راتسيوناليزاتورلىق ەڭبەكتەرىن ءوندىرىسكە باتىل ەنگىزۋگە باعىت ۇستانعان.
ءابدىراحمان قىدىربەك.