مەملەكەت باسشىسى نۇرسۇلتان نازارباەۆ پالاتالاردىڭ بىرلەسكەن وتىرىسىندا پارلامەنت الدىندا تۇرعان زاڭ شىعارماشىلىق ءمىندەتتىڭ ءتورت بلوگىن اتاپ كورسەتكەن ەدى. سول مىندەتتەردىڭ ىشىندەگى ءبىرىنشى بلوكقا جاتاتىن ەلەكتر قۋاتىنىڭ شىعىنى 20 پايىزعا دەيىن بارادى دەگەندى پرەزيدەنت تەكتەن-تەك ايتقان جوق. شىنتۋايتىنا كەلگەندە, ءبىزدىڭ تۇرعىندار جىلۋدى, سۋدى جانە ەلەكتر قۋاتىن ۇنەمدەۋگە ۇيرەنبەگەن. سونىڭ سالدارىنان ەل بويىنشا وسىنشاما ىسىراپشىلىق بايقالىپ وتىر. سوندىقتان دا «ەنەرگيا ۇنەمدەۋ جانە ەنەرگيانىڭ تيىمدىلىگىن ارتتىرۋ تۋرالى» زاڭ جوباسىن قابىلداۋ – دۇرىس باستاما, قولداۋعا ابدەن لايىقتى يدەيا. قاراپايىم لامپالاردى ەنەرگيا ۇنەمدىلەرىنە اۋىستىرۋ دا وسىنداي قاجەتتىلىكتەن تۋىنداپ وتىر. بۇل قادام ەلىمىز ءال-اۋقاتىنىڭ ارتىپ كەلە جاتقانىنىڭ ءبىر كورىنىسى دەسە دە بولادى.
سونداي-اق ەلباسى «يندۋستريالىق-يننوۆاتسيالىق قىزمەتتەردى مەملەكەتتىك قولداۋ تۋرالى» زاڭ جوباسىن قابىلداۋ قاجەتتىگىن ايتتى. اتالعان زاڭدىق قۇجات ءماجىلىسكە كەلىپ ءتۇستى دە. ەندىگى ماسەلە يننوۆاتسيالىق ۇدەرىستەردى ىنتالاندىراتىن تەتىكتەردى زاڭنامالىق قامتاماسىز ەتۋ بولىپ تابىلادى. مەن وسى رەتتە «جوبالىق قارجىلاندىرۋ» امالىن دۇرىس دەپ ەسەپتەيمىن. ويتكەنى مۇنداي تەتىك مەملەكەت قانا ەمەس, جەكەنىڭ دە قارجىسىن جوبالاردى جۇزەگە اسىرۋدا جۇمىلدىرۋعا مۇمكىندىك بەرەدى. ونىڭ ءبىر ءتيىمدى تۇسى جوبالاردىڭ جۇزەگە اسىرىلۋ بارىسىندا قىمباتتاپ كەتپەۋىنە سەپتىگىن تيگىزەدى. مىنە, وسىنداي ءتيىمدى تەتىكتەر زاڭ جوباسىنان كورىنىس تاپسا دەيمىن.
سونىمەن قاتار, وتاندىق كاسىپورىنداردىڭ پايدالى ونىمدەر شىعارۋى, ولاردىڭ شەتەلدەردە ساتىلۋى ءۇشىن بارلىق جاعدايلاردى قاراستىراتىن نورمالار زاڭدىق قۇجاتتان ورىن تابۋى ءتيىس. بيىلدىڭ وزىندە 200-دەي كاسىپورىن اشىلسا, سولاردىڭ ونىمدەرى شەتەلگە شىعاتىنداي دەڭگەيدە بولعانى ءجون. ءارينە, ولاردىڭ بارلىعىنىڭ جۇمىسى قاداعالانىپ وتىرعانى ورىندى.
قايرات يششانوۆ,سەناتتىڭ قارجى جانە بيۋدجەت كوميتەتىنىڭ توراعاسى.