قازاقستان رەسپۋبليكاسى پارلامەنتى ءماجىلىسىنىڭ حالىقارالىق ىستەر, قورعانىس جانە قاۋىپسىزدىك كوميتەتىنىڭ توراعاسى ءامزەبەك جولشىبەكوۆ پەن ەكونوميكالىق رەفورما جانە وڭىرلىك دامۋ كوميتەتىنىڭ توراعاسى سەيىتسۇلتان ايىمبەتوۆ گەرمانيا فەدەراتيۆتىك رەسپۋبليكاسى بۋندەستاگىنىڭ مۇشەسى, حدس/حسس فراكتسياسىنىڭ سىرتقى ساياسات بويىنشا سپيكەرى فيليپپ ميسفەلدەرمەن كەزدەستى.
ءماجىلىستىڭ كوميتەت ءتوراعالارى مارتەبەلى مەيمانعا استانادا وتكەن ەقىۇ سامميتىنە قولداۋ كورسەتكەندەرى ءۇشىن ريزاشىلىعىن ءبىلدىرىپ, ەكى ەل اراسىنداعى ەكونوميكالىق, ساياسي جانە پارلامەنتارالىق بايلانىستار جايىندا جىلى پىكىر ايتتى. سونىمەن قاتار, قازاقستاننىڭ ءوز تاۋەلسىزدىگىنىڭ 20 جىلىندا جەتكەن تابىستارى مەن جەتىستىكتەرى, الداعى ماقساتتارى جايىنان حاباردار ەتتى.
گەرمانيا بۋندەستاگىنىڭ مۇشەسى ارىپتەستەرىنە وزدەرىندە جاسالىپ جاتقىن رەفورمالار مەن پارلامەنتتەگى جاعداي, ماشينا جاساۋ, ەنەرگيامەن قامتاماسىز ەتۋ تۋرالى اڭگىمەلەدى.
كەزدەسۋلەرگە ءماجىلىس دەپۋتاتتارى ەگور كاپپەل, امانگەلدى مومىشەۆ, مەيرام پىشەمباەۆ قاتىستى, دەپ حابارلادى وسى پالاتانىڭ ءباسپاسوز قىزمەتى.