كەشە «نۇر وتان» پارتياسى توراعاسىنىڭ ءبىرىنشى ورىنباسارى مۇحتار قۇل-مۇحاممەدتىڭ قاتىسۋىمەن قارۋلى كۇشتەردىڭ ۇلتتىق اسكەري-پاتريوتتىق ورتالىعىندا پارتيانىڭ استانا قالالىق فيليالىنىڭ ەسەپتىك-سايلاۋ كونفەرەنتسياسى ءوتتى. قالا اكىمى اسەت يسەكەشەۆ جەتەكشىلىك ەتكەن جيىندا وسى كەزگە دەيىن اتقارىلعان شارۋالاردىڭ قورىتىندىسى تىڭدالىپ, بولاشاقتا جۇزەگە اسىرىلۋى ءتيىس باسىم باعىتتار ايقىندالدى.
«ەلباسىمىز بۇگىندە بۇكىل الەم تانىعان اسەم استانامىزدى سالىپ, ونى دۇنيە جۇزىنە جارقىراتا كورسەتتى. استانا بۇكىل وڭىرلەرىمىز ءۇشىن دامۋدىڭ داڭعىل جولىنا اينالدى. سوندىقتان «نۇر وتان» پارتياسىنىڭ استانالىق فيليالى ەلباسىمىزدىڭ باعدارلامالارى مەن ستراتەگيالىق كۋرسىن ورىنداۋدا وبلىستىق پارتيا ۇيىمدارى ءۇشىن ۇلگى-ونەگە بولۋعا ءتيىس», – دەگەن مۇحتار ابرار ۇلى مۇنداي مىندەت, اسىرەسە, ميلليونداعان ەكسپو قوناقتارىن قارسى الۋ كەزىندە ەرەكشە مانگە يە ەكەندىگىن اتاپ ءوتتى.
بۇگىنگى تاڭدا «نۇر وتاننىڭ» استانالىق فيليالى 350 باستاۋىش پارتيا ۇيىمىنىڭ باسىن بىرىكتىرسە, سوڭعى ەكى جىل ىشىندە استاناداعى جەتەكشى ساياسي پارتيا مۇشەلەرىنىڭ سانى 12 195-تەن 45 501 ادامعا دەيىن ارتىپتى. مۇنداي دەرەكتەردى جيىندا ارنايى قورىتىندى بايانداما جاساعان پارتيانىڭ قالالىق فيليالى توراعاسىنىڭ ءبىرىنشى ورىنباسارى ەدىل مامىتبەكوۆ ءمالىمدەدى.
سونداي-اق, پارتيانىڭ مۇرىندىق بولۋىمەن وسى كەزگە دەيىن 5 مىڭنان استام ءتۇرلى فورماتتاعى ءىس-شارا ۇيىمداستىرىلىپ, وعان 400 مىڭنان اسا ادامنىڭ قاتىسۋى قامتاماسىز ەتىلگەن. سونىڭ ىشىندە «100 ناقتى قادام» ۇلت جوسپارى اياسىندا قابىلدانعان زاڭدى ءتۇسىندىرۋ جۇمىستارى بويىنشا 463 كەزدەسۋ وتكىزىلىپتى. سونىمەن قاتار, «نۇر وتان» پارتياسىنىڭ قالالىق فيليالى «نۇرلى جول» ينفراقۇرىلىمدى دامىتۋ باعدارلاماسىن جۇزەگە اسىرۋدى تۇراقتى باقىلاۋ جۇمىستارىن دا شەبەر ۇيلەستىرىپ كەلەدى. وسى ماقساتتا ماسليحاتتاعى پارتيا فراكتسياسى جانىنان ارنايى ءتورت ينسپەكتسيالىق كوميسسيا قۇرىلىپ, ولار استاناداعى قۇرىلىس نىساندارىن ارالاپ, 22 رەيد جۇرگىزگەن. ال پارتيانىڭ قالالىق قابىلداۋ بولمەسىنە سوڭعى ەكى جىلدىڭ ىشىندە 26 مىڭنان استام ازامات كومەك سۇراپ كەلگەن بولسا, ولاردىڭ 38 پايىزىنىڭ ماسەلەسى سول جەردە وڭ شەشىمىن تاپقان. قالعاندارى ءتيىستى مەملەكەتتىك ورگاندارعا جولدانىپ, پارتيالىق باقىلاۋعا الىنعان.
ەسەپتىك-سايلاۋ كونفەرەنتسياسىندا قىزۋ تالقىلانعان تاعى ءبىر تاقىرىپتىڭ ءبىرى – تاياۋدا قازاقستان پارلامەنتى قابىلداعان تاۋەلسىزدىكتىڭ 25 جىلدىعى دەكلاراتسياسى بولدى. وعان ەرەكشە كوڭىل ءبولۋ قاجەتتىگىنە توقتالعان پارتيا ءتوراعاسىنىڭ ءبىرىنشى ورىنباسارى, ەلباسىمىز شيرەك عاسىردا قازاقستاندى قۋاتتى, ءبىرتۇتاس, قارقىندى دامىعان مەملەكەتكە اينالدىرعانىن تىلگە تيەك ەتتى.
«قازىرگى تاڭدا ەلباسىمىز الدىمىزعا بەس ينستيتۋتتىق رەفورما, «100 ناقتى قادام» ۇلت جوسپارى, «نۇرلى جول», يندۋستريالىق-يننوۆاتسيالىق دامۋ باعدارلاماسى, الەمنىڭ ەڭ دامىعان 30 مەملەكەتىنىڭ قاتارىنا قوسىلۋ سياقتى جاڭا اۋقىمدى ءمىندەتتەر مەن ماقساتتار قويىپ وتىر. ءبىزدىڭ پارتيامىزدىڭ باستى مىندەتى – مەملەكەت باسشىسى تاپسىرمالارىنىڭ ورىندالۋ ساپاسىنا قاتاڭ ءارى تۇراقتى باقىلاۋ ورناتۋ بولىپ تابىلادى», – دەدى مۇحتار قۇل-مۇحاممەد.
نۇرلىبەك دوسىباي,
«ەگەمەن قازاقستان»