پاۆلوداردا بوكستان قازاقستان بىرىنشىلىگى مارەسىنە جەتتى. ەلىمىزدىڭ بارلىق ايماعىنان كەلگەن بىلعارى قولعاپ شەبەرلەرى ون سالماق بويىنشا ءوزارا مىقتىنى انىقتادى.
سەنبى كۇنى جارىستىڭ جارتىلاي فينالدىق كەزدەسۋلەرى ءوتتى. بۇل جەردە بارلىعىن تىزبەكتەمەي-اق, تەك 56 كيلوداعى باسەكەگە توقتالساق. وسى سالماقتا باق سىناعان قايرات ەراليەۆ پەن ءىلياس سۇلەيمەنوۆتىڭ ۇرىسى جانكۇيەرلەردىڭ ايىزىن قاندىردى. فينالعا تاتيتىن جەكپە-جەك دەرسىڭ... جاڭا سالماققا اۋىسقان ءى.سۇلەيمەنوۆتىڭ اسىعىستاۋ قيمىلداعانى بولماسا, جەڭىسكە دەگەن جىگەرى كوپشىلىكتىڭ كوڭىلىنەن شىقتى.
العاشقى راۋندتا ق.ەراليەۆ بەلسەندىلىك تانىتىپ, ءبىرىنشى نومىرمەن ونەر كورسەتتى. ال كەلەسى كەزەڭدە سۇلەيمەنوۆ جويقىن سوققىلارىمەن تارازى باسىن تەڭەستىرگەندەي ەدى. ايتكەنمەن, سوڭعى راۋندتا كوپتەن بەرى وسى سالماقتا ىسىلعان ەراليەۆ وزىنە سەنىمدى كورىندى. تورەشىلەر دە شىمكەنتتىك جىگىتتىڭ 29:28 ەسەبىمەن جەڭىسكە جەتكەنىن ايعاقتاپ بەردى.
سونىمەن, جارتىلاي فينالدا جيىرما بوكسشى ىرىكتەلىپ, اقتىق ايقاسقا بەتتەدى. ءتۋرنيردى اسا جەڭىل سالماقتاعى تەمىرتاس ءجۇسىپوۆ پەن جومارت ەرجان باستادى. شايقاس تارتىستى وتكەنىنە قاراماستان, بۇلاردىڭ ءبىرىنشىسى 3:0 ەسەبىمەن ۇتتى. 52 كيلودا ازامات يساقۇلوۆ توپ جارسا, وڭتۇستىكتەن كەلگەن قايرات ەراليەۆ (56 كگ) فينالدا قارسىلاسىن قينالماي جەڭدى. وسكەمەندىك ادىلەت قۇرمەتوۆ تە (60 كگ) وسىمەن ەكىنشى مارتە ەل چەمپيونى اتاندى. سونداي-اق, التىننان القا تاققان بەكداۋلەت يبراگيموۆ (64 كگ) پەن جاس پەرى ابىلايحان ءجۇسىپوۆتىڭ (69 كگ) شەبەرلىكتەرىن ەرەكشە اتاپ وتۋگە بولادى. 75 كيلودا سىنعا تۇسكەن ءابىلحان امانقۇل جويقىن سوققىلارىن قارسىلاستارىنا ءدوپ تيگىزىپ ءجۇرىپ, بيىك تۇعىردان كورىندى.
ريو وليمپياداسىندا جولى بولمادى دەمەسەڭىز, قالعان تۋرنيرلەردىڭ بارلىعىن جەڭگەن جانىبەك ءالىمحان ۇلى جاڭا سالماق – 81 كيلونى جاتسىنبادى. پاۆلودار تورىندە ول الدىمەن ¼ فينالدا وزىمەن اتتاس جانىبەك قارتباەۆتى مەرزىمىنەن بۇرىن جارىستان شىعاردى. ال جارتىلاي فينالدا جاستار اراسىندا الەم بىرىنشىلىگىنىڭ كۇمىس جۇلدەگەرى ۆاديم كازاكوۆتى ءتورت (!) رەت نوكداۋنعا جىبەردى. ءالىمحان ۇلىنىڭ جارقىن ءارى اشىق ۇرىسىن سىرتتاي باقىلاعان ونىڭ كەلەسى قارسىلاسى نۇرداۋلەت جارمانوۆ فينالدا تۇك بىتىرە المادى. ءتىپتى, جارمانوۆقا سوڭعى راۋندتا ەكى رەت ەسەپ اشىلدى. وسىلايشا, الماتى وبلىسىنىڭ ورەنى بۇل سالماقتىڭ يەسى كىم ەكەنىن كورسەتتى.
جارتىلاي فينالدىڭ الدىندا الماتى وبلىسىنىڭ اعا جاتتىقتىرۋشىسى تۇرسىنعالي ەدىلوۆتىڭ تامىرىن باسىپ كورگەنبىز. باپكەر بۇل تۋرنيردە ءالىمحان ۇلىنا تەڭ كەلەر ەشكىم جوق ەكەنىن, ونىڭ سول قولمەن ۇرعان سوققىسىنا ەكىنىڭ ءبىرى شىداس بەرە المايتىنىن ايتقان-دى. ايتقانى ايداي كەلدى.
91 كيلو سالماقتا جۇدىرىقتاسقان انتون پينچۋك تە ەشكىمگە ەسەسىن جىبەرمەدى. قوستانايلىق بوكسشى قولىنىڭ ۇزىندىعىن ءتيىمدى پايدالانىپ وتىردى. فينالداعى قارسىلاسى سەرىك مۇسادىلوۆكە قۇرمەت كورسەتۋگە بولادى. سپورت شەبەرلىگىنە كانديدات بولا تۇرا, ول سوڭعى راۋندتا پينچۋككە ءبىرشاما سوققى دارىتا الدى...
اسا اۋىر سالماقتا ولجاس بوقاەۆتىڭ باعى جاندى. پاۆلودارلىق بوكسشى جارتىلاي فينالدا ءوڭتۇستىكقازاقستاندىق شەبەر نۇرجان بەكزاتوۆتىڭ جولىن كەسكەننەن كەيىن, جەرگىلىكتى جانكۇيەرلەر وعان ۇلكەن ءۇمىت ارتا باستادى. ولجاس جەرلەستەرىنىڭ سەنىمىن اقتادى. ول اقتىق سىندا وزىنەن الدەقايدا ۇزىن, دەنەلى قامشىبەك قوڭقاباەۆپەن تەڭدەي ۇرىسىپ, باس جۇلدەنى ولىسپەي بەرىسپەيتىنىن اڭعارتتى. ءناتيجەسىندە, ءۇش تورەشىنىڭ ەكەۋى ۇپاي باسىمدىعىن بوقاەۆقا بەردى.
بىرىنشىلىككە قازاقستاننىڭ بارلىق ايماقتارىنان مىقتى دەگەن 186 بوكسشى قاتىستى. مۇندا تەك دانيار ەلەۋسىنوۆ, ءادىلبەك نيازىمبەتوۆ, ۆاسيلي لەۆيت جانە يۆان دىچكو ءتارىزدى وليمپيادا جۇلدەگەرلەرىنە دەمالىس بەرىلىپتى. سونداي-اق, قۇرامانىڭ بۇرىنعى مۇشەلەرى ءبىرجان جاقىپ, ولجاس ساتتىباەۆ جانە بەرىك ءابدىراحمانوۆ بۇل سىننان كورىنبەدى.
الماتى, جامبىل, وڭتۇستىك قازاقستان, قاراعاندى وبلىستارى مەن استانا قالاسى تۋرنيرگە 15 بوكسشىدان قوستى. ەڭ از بىلعارى قولعاپ شەبەرى قىزىلوردا, قوستاناي, سولتۇستىك قازاقستان جانە باتىس قازاقستان وبلىستارىنان كەلگەن. ولاردىڭ ءارقايسىسىنان – 9 بوكسشى. قالعان ايماقتان 10-12 بىلعارى قولعاپ شەبەرلەرى ونەر كورسەتتى.
باس باپكەر مىرزاعالي ايتجانوۆتىڭ ايتۋىنشا, جۇلدەگە ىلىككەندەر الداعى ۋاقىتتا ءتۇرلى دەڭگەيدەگى جارىستارعا قاتىسادى. ءوز مىقتىلىعىن ءدالەلدەگەندەر كەلەر جىلى ازيا جانە الەم ءبىرىنشىلىگىندە ۇرىسۋعا مۇمكىندىك الادى.
الماس ماناپ,
«ەگەمەن قازاقستان»
پاۆلودار
سۋرەتتى تۇسىرگەن
دانيار مايلىباەۆ
چەمپيوندار ءتىزىمى
49 كيلو. تەمىرتاس ءجۇسىپوۆ – اقمولا وبلىسى. 1988 جىلى تۋعان. بوكسپەن شۇعىلدانعانىنا – 8 جىل. قازاقستاننىڭ 3 دۇركىن (2013, 2014, 2016 ج.ج.) چەمپيونى, ازيا چەمپيونى (2013 ج.).
52 كيلو. ازامات يساقۇلوۆ – ماڭعىستاۋ وبلىسى. 1991 جىلى تۋعان. بوكستى 11 جىلدان بەرى سەرىك ەتەدى. قازاقستان چەمپيونى (2011, 2016 ج.ج.). قازاقستان سپارتاكياداسىنىڭ ءفيناليسى (2015 ج.).
56 كيلو. قايرات ەراليەۆ – وڭتۇستىك قازاقستان وبلىسى. 1990 جىلى تۋعان. بوكسپەن شۇعىلدانعانىنا – 10 جىل. الەم ءبىرىنشىلىگىنىڭ قولا جۇلدەگەرى (2013 ج.), ريو وليمپياداسىنا قاتىسۋشى.
60 كيلو. ادىلەت قۇرمەتوۆ – شىعىس قازاقستان وبلىسى. 1994 جىلى تۋعان. 11 جىلدان بەرى بوكسپەن اينالىسىپ كەلەدى. قازاقستان چەمپيونى (2013, 2016 ج.ج.).
64 كيلو. بەكداۋلەت يبراگيموۆ – وڭتۇستىك قازاقستان وبلىسى. 1995 جىلى تۋعان. بوكسپەن شۇعىلدانعانىنا – 5 جىل. قازاقستان سپارتاكياداسىنىڭ جۇلدەگەرى (2015 ج.). سپورت شەبەرى.
69 كيلو. ابىلايحان ءجۇسىپوۆ – قاراعاندى وبلىسى. 1997 جىلى تۋعان. جاسوسپىرىمدەر اراسىندا الەم چەمپيونى. بوكستى 12 جىلدان بەرى سەرىك ەتەدى. ريو-دە-جانەيرودا وتكەن ءحححى جازعى وليمپياداسىنا قاتىسۋشى.
75 كيلو. ءابىلحان امانقۇل – جامبىل وبلىسى. 1997 جىلى تۋعان. 8 جىلدان بەرى بوكسپەن شۇعىلدانىپ كەلەدى. «استانا-ارلاندارى» كاسىبي بوكس كلۋبىنىڭ مۇشەسى. جاستار اراسىندا ازيا چەمپيونى.
81 كيلو. جانىبەك ءالىمحان ۇلى – الماتى وبلىسى. 1993 جىلى تۋعان. ازيا (2013 ج.) جانە الەم چەمپيونى (2013 ج.). ازيا ويىندارىنىڭ چەمپيونى (2014 ج.). ريو وليمپياداسىنا قاتىسۋشى.
91 كيلو. انتون پينچۋك – قوستاناي وبلىسى. 1988 جىلى تۋعان. قازاقستاننىڭ ءۇش دۇركىن چەمپيونى (2012, 2013, 2016 ج.), ازيا (2013 ج.) ءجانە ازيا ويىندارىنىڭ چەمپيونى (2014 ج.).
+91 كيلو. ولجاس بۋكاەۆ – پاۆلودار وبلىسى. 1992 جىلى تۋعان. قازاقستان سپارتاكياداسىنىڭ فيناليسى (2015 ج.). بىرنەشە حالىقارالىق ءتۋرنيردىڭ جەڭىمپازى.
ماماندار پىكىرى
ەرماحان ىبىرايىموۆ,
سيدنەي وليمپياداسىنىڭ چەمپيونى:
– تۋرنير جوعارى دەڭگەيدە ۇيىمداستىرىلدى. بارلىق سالماقتا باسەكەلەستىك بار دەپ ايتۋعا بولادى. تەك 60, 64 كيلودا سىنعا تۇسكەن بالالارعا ءالى دە بولسا شىڭدالۋ كەرەك. جانىبەك ءالىمحان ۇلى مەن ابىلايحان ءجۇسىپوۆتىڭ رينگتەگى ونەرلەرى جاقسى اسەر قالدىردى.
مارات مازىمباەۆ,
كاسىپقوي بوكستان IBA چەمپيونى:
– حالىقارالىق ارەنادا 56, 69, 81 جانە 91 كيلو سالماقتا ناتيجە بولاتىنىنا سەنىمدىمىن. 69 كيلوعا اۋىسقان ابىلايحان ءجۇسىپوۆ بۇل تۋرنيردە جاقسى ايقاستى. بىراق ازداپ قاتەلىكتەرى دە بار. ەگەر دە باپكەرلەر ونىمەن دۇرىس جۇمىس جاساپ, كەمشىلىكتەرىن تۇزەيتىن بولسا, وندا بۇل بالا سەرىك ساپيەۆ اعاسى سەكىلدى ۇلكەن جەتىستىككە جەتەدى.
سەرىك ساپيەۆ,
«استانا-ارلاندارى» كاسىبي بوكس كلۋبىنىڭ ديرەكتورى:
– ءاربىر جەكپە-جەكتى تاپجىلماي قاراپ وتىردىم. جىگىتتەردىڭ قارىمى جاقسى. جۇلدەگەرلەردىڭ اراسىنان «استانا ارلاندارى» ساپىنا جارايتىندار جەتەرلىك. الداعى ۋاقىتتا قۇراما جاتتىقتىرۋشىلارىمەن اقىلداسىپ, بىرنەشە بوكسشىنى قاتارىمىزعا قوساتىن بولامىز. جالپى, تۋرنير جاڭا تالانتتاردى تابۋ جونىندەگى ماقساتىن جاقسى ورىندادى.