كەشە استاناداعى تاۋەلسىزدىك سارايىندا ءوتىپ جاتقان Digital Communications Kazakhstan-2011 شاراسى اياسىندا پرەمەر-مينيستردىڭ ورىنباسارى – يندۋستريا جانە جاڭا تەحنولوگيالار ءمينيسترى اسەت يسەكەشەۆ پەن بايلانىس جانە اقپارات ءمينيسترى اسقار جۇماعاليەۆ ءىرى شەتەلدىك IT كومپانيالار وكىلدەرىمەن كەزدەستى.
كەزدەسۋگە Huawei Technologies كومپانياسىنىڭ ورتالىق ازيا ايماعى بويىنشا پرەزيدەنتى تانگ كيبينگ, IBM ۆيتسە-پرەزيدەنتى دجەفري رودا, Ericsson كومپانياسىنىڭ ۆيتسە-پرەزيدەنتى ەريك ولدمارك, TIMWE كومپانياسىنىڭ نەگىزىن سالۋشىلاردىڭ ءبىرى ريكاردو كارۆالو, J’son & Partners كومپانياسىنىڭ اتقارۋشى ارىپتەسى كارل يوحاننەسسون جانە باسقا دا كومپانيا وكىلدەرى كەلىپ, ءوزارا پىكىر الماستى.
اسەت يسەكەشەۆ كەزدەسۋگە كەلگەن شەتەلدىك ينۆەستورلارعا ەلىمىزدە جۇزەگە اسىرىلىپ جاتقان ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى جايىن دا باياندادى. «وندا جەتەكشى ءرولدى ەكونوميكانىڭ نەگىزگى سەكتورلارى – مەتاللۋرگيا, حيميا, ماشينە جاساۋ, مۇناي وڭدەۋ وندىرىستەرى الادى. دەسەك تە اقپاراتتىق-كوممۋنيكاتسيالىق تەحنولوگيا سەكتورىنا دا ەرەكشە ءمان بەرىلەدى. ەلباسى ەلىمىزدەگى يننوۆاتسيا دامۋىن ءجىتى قاداعالاپ وتىرادى», دەپ اتاپ ءوتتى ول.
ءا.يسەكەشەۆ بارلىق الەۋەتتى ينۆەستورلاردى قازاقستاندا بايلانىس جانە اقپارات مينيسترلىگى مەن «سامۇرىق-قازىنا» ۇاق جۇرگىزىپ جاتقان بىرلەسكەن جوبالارعا قاتىسۋعا شاقىردى.
ۆەنەرا تۇگەلباي.