وتكەن جىلدىڭ ماۋسىم ايىنان باستاپ كوكشەتاۋ قالاسىندا "انا ءۇيى" اتالاتىن بالالاردى اسىراپ الۋ ورتالىعى جۇمىس ىستەي باستاعان بولاتىن. سودان بەرگى ۋاقىتتا اتالعان ورتالىق بالالار ۇيىندە تاربيەلەنىپ جۇرگەن 14 جەتكىنشەككە اسىراپ الۋشى وتباسىن تاۋىپ بەرگەن.
نەگىزىنەن «بالالاردى اسىراپ الۋ ورتالىعى» جوباسى اقپارات جانە كوممۋنيكاتسيالار مينيسترلىگىنىڭ, جەرگىلىكتى اتقارۋشى ورگانداردىڭ جانە باق-تىڭ قولداۋىمەن قازاقستاندىق كاسىپكەرلەر تاراپىنان قولعا الىنعان-دى. «بالانىڭ تولىققاندى جانە الەۋمەتتىك جاقسى جاعدايدا دامۋىنىڭ باستى شارتى – وتباسىلىق بەرەكە. بىزدەر ءۇشىن بالانىڭ وتباسىندا تاربيەلەنۋى وتە ماڭىزدى», دەيدى «انا ءۇيى» قىزمەتكەرى قۇرالاي جۇمابەكوۆا. جوبا شەڭبەرىندە وبلىس بويىنشا تۇراقتى نەگىزدە قابىلداپ الاتىن اتا-انالار مەكتەبى جۇمىس ىستەۋدە. وندا اسىراپ الۋشىلار ءۇشىن قازاقستان جاعدايىنا ىڭعايلانىپ الىنعان حالىقارالىق تاجىريبەگە نەگىزدەلگەن ترەنينگتىك باعدارلامالار وتكىزىلىپ, پسيحولوگ-ترەنەرلەر ءدارىس بەرەدى. نەگىزىنەن 12 مودۋلدەن (ارقايسىسى 3 ساعاتتان) تۇراتىن باعدارلاما اسىراپ الۋشى اتا-انالارعا ءبۇلدىرشىندەردى بالالار ۇيىنەن الۋ كەزىندە سالماقتى دا سانالى شەشىم قابىلداۋعا مۇمكىندىك تۋعىزادى. بولاشاق اسىراپ الۋشى اتا-انالار مەديتسينا, قۇقىق, پەداگوگيكا جانە پسيحولوگيا سالاسىنىڭ بازالىق بىلىگىن يگەرەدى, ياعني, بالانىڭ وتباسىلىق جاعدايدى قابىلداۋ ەرەكشەلىگىن, ءتيىمدى تاربيەلەۋدى جانە بالا كۇتۋدى ۇيرەنەدى. مەكتەپتىڭ قىسقا ۋاقىت جۇمىس ىستەۋى كەزەڭىندە 18 وتباسى وقىتۋدان ءوتىپ, ونىڭ 11-ءى بالالاردى ءوز وتباسىلارىنا قابىلداپ الدى. رەتى كەلگەندە ايتا كەتۋ كەرەك, ۇستىمىزدەگى جىلدىڭ قاڭتارىنان باستاپ «پاتروناتتىق ءۇي» وتباسىلىق قۇرىلىم ءتۇرى جۇمىس ىستەي باستادى.
اسقار تۇراپباي ۇلى,
«ەگەمەن قازاقستان»
اقمولا وبلىسى