وڭتۇستىك قازاقستان وبلىسىندا وسى جىلى وبلىس اكىمدىگىنىڭ قولداۋىمەن «كيەلى قازىعۇرت», «كۇش اتاسى – قاجىمۇقان», «وتىراردى قورعاۋ» اتتى 3 انيماتسيالىق فيلم تۇسىرىلەدى, دەپ حابارلادى وقو اكىمىنىڭ ءباسپاسوز قىزمەتى.
بۇل تۋرالى وبلىس اكىمى ج.تۇيمەباەۆ ناۋرىز مەرەكەسىنە ارنالعان ىس-شارالار اپتالىعىنىڭ «ۇلتتىق ونەر» كۇنىنە وراي, كينو ستۋديالاردىڭ جۇمىسىمەن تانىسۋ بارىسىندا ءمالىم ەتتى.
وسى كۇنى ايماق باسشىسى «وڭتۇستىكفيلم» مەكەمەسىندە بولىپ, شىعارماشىلىق ۇجىمعا شاعىن اۆتوبۋس تابىس ەتىپ, الداعى ۋاقىتتا وڭىردەگى بارلىق ونەر ۇجىمدارىنا وسى سىندى كولىك سىيعا تارتۋ جوسپارلانىپ وتىرعانىن جەتكىزدى.
وڭىردە كينو سالاسىن دامىتۋعا اتسالىسىپ جۇرگەن 9 جەكە ستۋديا بار. ولاردىڭ ىشىندە 4 كينوستۋديا - «ساق», «جايدارمان», «مەيرام», «كوز تيمەسىن» production» ورتالىقتارىنىڭ كينو تۇسىرۋگە مۇمكىندىگى مول.
مۇنان سوڭ, اكىم تۋىندىلارىمەن الەمدىك دەڭگەيدەگى مامانداردى مويىنداتىپ ۇلگەرگەن ونەر ورتالىعى - «ساق» كينوستۋدياسىنىڭ جۇمىسىمەن تانىسىپ, ستۋديا ديرەكتورى, رەجيسسەر نۋريددين پاتتەەۆكە شىعارماشىلىق شىڭدالۋ جولىنداعى جەتىستىكتەرىمەن قۇتتىقتاپ, وبلىس اكىمىنىڭ العىس حاتىمەن ماراپاتتادى.
ايتا كەتەيىك, جوعارىدا اتالعان 3 ءفيلمدى انيماتسيالىق جانردا ەڭبەك ەتەتىن جالعىز ستۋديا – «ساق» كينوستۋدياسى تۇسىرەتىن بولادى. سونىمەن قاتار, ستۋديا جەتەكشىلىگى اكىم ساپارى كەزىندە وبلىس ءتۋريزمىن ناسيحاتتايتىن «كونە جەتىگەننىڭ سىرى» اتتى تەلەحيكايا ستسەناريىن ۇسىندى. تاريحي تاعىلىمى مول, تابيعاتى تاماشا وڭتۇستىك قازاقستان وبلىسى تۋرالى جان-جاقتى دارىپتەۋگە ارنالعان سەريالدى ءوڭىر باسشىسى وڭ باعالاپ, قولداۋ ءبىلدىردى.
بۇگىندە «ساق» كينوستۋدياسىنىڭ قورىندا 51 انيماتسيالىق فيلم بار. قۇرىلعانىنا بيىل 15 جىل تولعان شىعارماشىلىق ۇجىمدا 40 انيماتسيا مامانى جۇمىس ىستەيدى.
جاقىندا عانا كينوستۋديا ازىرلەگەن تۋىندىلاردىڭ ىشىندەگى «قازاق ەلى» تولىقمەتراجدى انيماتسيالىق ءفيلمى ەگيپەتتەگى كاير قالاسىندا وتكەن «XX حالىقارالىق انيماتسيالىق فيلمدەردىڭ فورۋمىنا» قاتىسىپ, «ەڭ ۇزدىك تولىقمەتراجدى فيلم» جۇلدەسىنە جانە «ۇزدىك رەجيسسۋرا», «ۇزدىك مۋزىكا» نوميناتسيالارىنا يە بولىپ, وبلىسىمىزدى حالىقارالىق دەڭگەيدە بۇكىل ءدۇيىم جۇرتشىلىققا تانىتتى.