ءداستۇرلى كينو-دۋمان رەتىندە قۇلاشىن كەڭگە جايىپ كەلە جاتقان كەزەكتى VII حالىقارالىق «ەۋرازيا» كينوفەستيۆالى بيىل 19 قىركۇيەكتە الماتى قالاسىندا اشىلىپ, ءبىر اپتاعا ۇلاساتىن بولادى. قازىرگى كەزدە ونىڭ ىرىكتەۋ كوميسسياسى ءوز جۇمىسىن اياقتادى. بۇل تۋرالى دۇيسەنبى كۇنى وتكەن ارنايى ءباسپاسوز ءماسليحاتىندا كەڭىنەن باياندالدى.
ىرىكتەۋ كوميسسياسىنىڭ قۇرامىندا كينوتانۋشى يننا سمايلوۆا (كوميسسيا ءتورايىمى), كينورەجيسسەرلەر ساتىبالدى نارىمبەتوۆ, احات ىبىراەۆ, ءامىر بايعازين مەن فەستيۆالدىڭ ارت-ديرەكتورى گۇلنار ابىكەەۆا جۇمىس ىستەدى.
بيىلعى جىلى فەستيۆالدىڭ كونكۋرستىق باعدارلاماسىنا ماڭىزدى وزگەرىستەر ەنگىزىلدى. سوڭعى جىلدارى وعان ورتالىق ازيا ەلدەرىنىڭ فيلمدەرى قاتىسىپ كەلگەن بولاتىن. ەندى «ەۋرازيا» فەستيۆالى اياسىن كەڭەيتىپ, قايتادان ۇلكەن حالىقارالىق بايقاۋعا اينالماق. وندا ەۋروپا, ازيا, تمد ەلدەرى مەن قازاقستاندىق جاڭا كارتينالار باق سىنايتىن بولادى.
حالىقارالىق بايقاۋدا ىرىكتەپ الىنعان 12 كارتينانىڭ ىشىندە: «كوڭىلدەس» (رۋمىنيا), «ءوتىنەم, مازالاما» (يران), «شۋاقتى كۇندەر» (قازاقستان), «جانارتاۋ» (يسلانديا), «ماحابباتتى مويىنداۋ» (قىرعىزستان), «بادەۋي» (رەسەي), «ريەلتور» (قازاقستان), «الىس كورشى» (فرانتسيا), «ءوزگە اسپان» (رەسەي), «قورعاسىن» (وزبەكستان), «نايزاعايدان بۇرىن» (جاپونيا-قازاقستان), «بۋسونگ» (فيليپپين) فيلمدەرى بار.
حالىقارالىق كينودوداعا جولداما العان كارتينالاردىڭ قىسقا مازمۇنى تومەندەگىدەي. يسلانديالىق رەجيسسەر رۋنار رۋنارسسوننىڭ «جانارتاۋ» ءفيلمى ەۋروپانىڭ كينو الەمىنە ۇلكەن جاڭالىق اكەلمەك. ويتكەنى, بۇل شىعارمادا تالايدان ايتىلىپ جۇرگەن تاقىرىپتى وزگە قىرىنان كورسەتۋگە دەگەن ۇمتىلىس بار. رەجيسسەر «كەلمەستىڭ كەمەسىنە ءمىنىپ» جاعادا تۇرعان قارتتىڭ ىشكى جان-دۇنيەسىنە ءۇڭىلىپ قانا قويماي, قازىرگى زامان ادامىنىڭ ساناسىنا وي سالادى. ونىڭ ءومىرىن ءوزگەرتىپ, باسقاشا تىرشىلىك ەتۋگە مۇمكىندىگى بار ەكەنىن بايقاتادى.
يراندىق رەجيسسەر موحسەن ابدولۆاحابتىڭ «وتىنەم, مازالاما» ءفيلمىنىڭ سيۋجەتى قاراپايىم ءومىر قاعيدالارىنا قۇرىلسا, رەسەيلىك دميتري مامۋليانىڭ «وزگە اسپان» اتتى كارتيناسىنىڭ باستى كەيىپكەرى اقشا تابام دەپ كەتكەن ايەلىن ىزدەپ, ۇلىمەن بىرگە ورتالىق ازيادان رەسەيگە اتتانعان جاننىڭ ماشاقاتىن باياندايدى. ال كاتالين ميتۋلەسكۋدىڭ «كوڭىلدەس» (رۋمىنيا) فيلمىندە ومىردەگى الەۋمەتتىك شىندىقتار كورسەتىلسە, فيلليپيندىك «بۋسونگ» كينولەنتاسىندا رەجيسسەر اۋرەۋس سوليتو ادام مەن قورشاعان ورتانى ءبىر-بىرىمەن تاماشا ۇيلەستىرە بىلگەن.
قىرعىزدىڭ «ماحاباتتى مويىنداۋ» دەپ اتالاتىن كارتيناسىنىڭ دا وزىندىك ەرەكشەلىكتەرى بار. ءۇش رەجيسسەر, ءۇش فيلم, ءۇش دراما. وتانداسىمىز ناريمان تورەباەۆتىڭ «شۋاقتى كۇندەر» دەپ اتالاتىن كارتيناسى كەيىپكەرىنىڭ ۇستانىمى مۇلدەم بولەك. باسقا شىعارمالاردان ول وسى شەشىمىمەن ەرەكشەلەنەدى.
مۇنداي ەرەكشەلىكتەر وسى فەستيۆالدا كورسەتىلەتىن «بادەۋي», «قورعاسىن» فيلمدەرىنە دە ءتان.
وسى ارادا VII حالىقارالىق «ەۋرازيا» كينوفەستيۆالىمەن قاتار تومەندەگىدەي باعدارلامالاردىڭ دا جۇزەگە اسىرىلاتىنىن ايتا كەتەلىك. «قارقىندى دامىپ كەلە جاتقان قازاق كينوسى» اياسىندا 2010 جىلدىڭ سوڭى مەن 2011 جىلدىڭ باسىندا تۇسىرىلگەن كارتينالار كورەرمەنگە جول تارتادى. سونداي-اق, «حالىقارالىق كينوفەستيۆالدەردەن جۇلدە العان فيلمدەر», «ۆيرتۋالدى باتىس», «وزگەرمەلى شىعىس», «ۆەنەتسيا كينوفەستيۆالىنىڭ جاڭعىرىعى», «امەريكانىڭ دەرەكتى كينوسى» اتتى باعدارلامالار كينوسۇيەر قاۋىمعا كوپ جاڭالىق سىيلايتىن بولادى.
ايناش ەسالي, الماتى.