وڭتۇستىك قازاقستان وبلىسىندا وندىرىلەتىن وتاندىق تاۋارلار قىتاي نارىعىنا شىعارىلادى, دەپ حابارلادى 24.kz.
وسى ماقساتتا جەرگىلىكتى اكىمدىك ءۇرىمشى قالاسىنان ساۋدا ءۇيىن اشۋدى جوسپارلاپ وتىر. قازىر ەكىجاقتى كەلىسىم جۇرگىزىلىپ جاتىر. ال وعان دەيىن كاسىپكەرلەر كوكتەمدە بەيجىڭدە وتەتىن ۇلكەن جارمەڭكەگە قاتىسادى. جەرگىلىكتى تاۋار وندىرۋشىلەر وعان 800 تونناعا جۋىق ۇن مەن ءتۇرلى بالىق ونىمدەرىن اپارادى.
سونىمەن قاتار, شىمكەنتتە توقىلعان كىلەمدەر دە شەتەل نارىعىنا جول تارتادى. سەبەبى, حيميالىق قوسپاعا قاراعاندا تابيعي تازا ونىمگە دەگەن سۇرانىس باسىم. قىتاي استاناسىندا وتەتىن ەڭ ءىرى ساۋدا جارمەڭكەسى 1 ايعا سوزىلادى.
«بۇل قازىر جوبا كۇيىندە ازىرلەنۋدە. ەكىجاقتى كەلىسسوزدەر ءجۇرىپ جاتىر. قىتايلىق كومپانيالارمەن كەلىسسوزدەر ءجۇرىپ جاتىر. مۇنداي ساۋدا ءۇيى اشىلاتىن بولسا, وندا ءبىزدىڭ تاۋار وندىرۋشىلەر تۇراقتى تۇردە ساۋدا جاساۋعا مۇمكىنشىلىك الادى», – دەدى وقو كاسىپكەرلەر پالاتاسى ديرەكتورىنىڭ ورىنباسارى تيمۋر ناقىپبەكوۆ.