تارازدا «حالىقارالىق «اۋليە اتا» اۋەجايى» اق-نىڭ ۇشۋ, وتىرعىزۋ, اۋە قاۋىپسىزدىگىن قامتاماسىز ەتۋ جۇمىستارىنىڭ تاريفتەرىن بەكىتۋ جونىندەگى وتىنىشىنە بايلانىستى قوعامدىق تىڭداۋ ءوتتى, دەپ حابارلايدى قر تابيعي مونوپوليالاردى رەتتەۋ اگەنتتىگىنىڭ جامبىل وبلىسى بويىنشا دەپارتامەنتى.
ايتا كەتەيىك, قر كولىك جانە كوممۋنيكاتسيا مينيسترلىگىنىڭ قارجىلاندىرۋىمەن ۇشۋ-قونۋ الاڭى قايتا جوندەۋدەن ءوتىپ, قۇرىلىس جۇمىستارى 2013 جىلى اياقتالدى. وسىدان كەيىن تاراز اۋەجايى زاماناۋي ۇشاقتار مەن تىكۇشاقتاردىڭ بارلىق تۇرلەرىن قابىلداي الاتىن بولدى. اۋا رايىنىڭ كۇردەلىلىگىنە قاراي جارىقتاندىرعىش قۇرىلعىلارى دا جاڭارتىلدى. ەندى «اۋليە اتا» حالىقارالىق اۋەجايى اەرودروم تەحنيكاسىنىڭ سانى, قىزمەتكەرلەردىڭ بىلىكتىلىگى جاعىنان زامانعا ساي اۋە بايلانىسىنا اينالدى. اۋەجايدا ەۋروپا, ورتالىق جانە وڭتۇستىك-شىعىس ازيامەن بايلانىس ورناتىلعان.
«حالىقارالىق «اۋليە اتا» اۋەجايى» اق قىزمەتىنىڭ تاريفتەرى 2011 جىلدان بەرى كوتەرىلمەگەن. جولاۋشىلاردى وتىرعىزۋ, ۇشۋدى قامتاماسىز ەتۋ شارالارى ققس-ىن ەسەپتەمەگەندە ۇشۋ ماسساسىنىڭ تونناسىنا 1 414 تەڭگەنى قۇراعان. جاڭا تاريف جوبا بويىنشا 6 372,24 تەڭگەنى قۇراۋى كەرەك. بۇرىنعى اۋە قاۋىپسىزدىگىنىڭ ورتاشا-بوساتۋ ءتاريفى ققس-سىز ۇشۋ ماسساسىنىڭ تونناسىنا 505 تەڭگە بولعان بولسا, ەندى ول 2 392 مىڭ تەڭگە بولماق. باعانى كوتەرۋگە ماجبۇرلەگەن شارتتاردىڭ ىشىندە ماتەريالدارعا, جانار-جاعار مايعا دەگەن باعانىڭ ءوسۋى, ايلىق جالاقىنىڭ ارتۋى, امورتيزاتسيا, جارىقەن بەلگى بەرۋ قۇرىلعى مەن ارنايى تەحنيكانىڭ جوندەۋ جۇمىستارى بار. قر تابيعي مونوپوليالاردى رەتتەۋ اگەنتتىگىنىڭ جامبىل وبلىسى بويىنشا وكىلدىگىنىڭ قىزمەتكەرلەرى جاڭا تاريفتەردىڭ 2017 جىلدان باستاپ ەنگىزىلۋى مۇمكىندىگىن اتاپ ءوتتى.