قازاقستان رەسپۋبليكاسى باس پروكۋرورىنىڭ بۇيرىعىمەن تيمۋر تاشىمباەۆ سولتۇستىك قازاقستان وبلىسىنىڭ پروكۋرورى مىندەتىن ۋاقىتشا اتقارۋشى بولىپ تاعايىندالدى, دەپ حابارلادى سقو اكىمدىگىنىڭ ءباسپاسوز قىزمەتى.
تيمۋر تاشىمباەۆ س.م.كيروۆ اتىنداعى قازاق مەملەكەتتىك ۋنيۆەرسيتەتىن «قۇقىقتانۋ» ماماندىعى بويىنشا بىتىرگەن. ەڭبەك جولىن الماتى ق. فرۋنزە اۋداندىق پروكۋراتۋراسىنىڭ تەرگەۋشى قىزمەتىنىڭ ستاجەرى بولىپ باستاعان. پروكۋراتۋرا تەرگەۋشىسى, الماتى ق. فرۋنزە اۋداندىق پروكۋرورىنىڭ كومەكشىسى جانە الماتى وبلىسى ىلە اۋدانى پروكۋرورىنىڭ كومەكشىسى, اعا كومەكشى جانە ورىنباسارى بولىپ جۇمىس ىستەگەن.
ءار جىلدارى قازاقستان رەسپۋبليكاسىنىڭ باس پروكۋراتۋراسىندا ءتۇرلى جاۋاپتى قىزمەتتەردى اتقاردى, الماتى ق. تۇركسىب جانە بوستاندىق اۋداندارىنىڭ پروكۋرورى, الماتى ق. پروكۋرورىنىڭ ورىنباسارى بولدى.
2007-2012 جىلدارى قر پرەزيدەنتى اكىمشىلىگىنىڭ قۇقىق قورعاۋ جانە سوت جۇيەسى ماسەلەلەرى جونىندەگى ءبولىم مەڭگەرۋشىسى بولدى. 2012 جىلدان وسى ۋاقىتقا دەيىن قر باس پروكۋراتۋراسى جەدەل-ىزدەستىرۋ قىزمەتىنىڭ زاڭدىلىعىن قاداعالاۋ دەپارتامەنتىنىڭ باسشىسى بولىپ ەڭبەك ەتتى.