7 قاڭتارداعى پراۆوسلاۆيەلىك روجدەستۆو جانە قۇربان ايتتىڭ العاشقى كۇنى جۇمىس كۇندەرى مەن اۋىسۋ كەستەسىنە (ۆاحتا كەستەسى) تۇسكەنىمەن, دەمالىس كۇنى بولىپ ەسەپتەلەدى, الايدا, بۇل كۇندەر مەرەكە كۇندەرى بولىپ ەسەپتەلمەيدى, - دەپ حابارلايدى Tengrinews.kz.
"قازاقستان رەسپۋبليكاسىنداعى مەرەكەلەر تۋرالى" زاڭىنا سايكەس دەمالىس جانە مەرەكە كۇندەرى ءبىر كۇنگە كەلسە, مەرەكە كۇندەرىنەن كەيىنگى كۇندەر دەمالىس بولىپ ەسەپتەلەدى. ال 7 قاڭتارداعى پراۆوسلاۆيەلىك روجدەستۆو جانە قۇربان ايتتىڭ العاشقى كۇنى بۇل زاڭدا كورسەتىلگەن ۇلتتىق جانە مەملەكەتتىك مەرەكە كۇندەرىنىڭ تىزىمىنە كىرمەيدى.
قازاقستان رەسپۋبليكاسىنىڭ ۇلتتىق مەرەكەسى - تاۋەلسىزدىك كۇنى. ال قازاقستان رەسپۋبليكاسىنىڭ مەملەكەتتىك مەرەكەلەرىنە كەلەسى كۇندەر كىرەدى:
جاڭا جىل - 1-2 قاڭتار;
حالىقارالىق ايەلدەر كۇنى - 8 ناۋرىز;
ناۋرىز مەيرامى - 21-23 ناۋرىز;
قازاقستان حالىقتارىنىڭ بىرلىگى كۇنى - 1 مامىر;
وتان قورعاۋشىلار كۇنى - 7 مامىر;
جەڭىس كۇنى - 9 مامىر;
استانا كۇنى - 6 شىلدە;
قازاقستان رەسپۋبليكاسىنىڭ كونستيتۋتسياسى كۇنى - 30 تامىز;
قازاقستان رەسپۋبليكاسىنىڭ تۇڭعىش پرەزيدەنتى كۇنى - 1 جەلتوقسان.