كۋۆەيت پەن ومان 1 قاڭتاردان باستاپ وپەك+ ەلدەرىنىڭ ءبىر اي بۇرىن قابىلداعان مۇناي ءوندىرىسىن ازايتۋ تۋرالى كەلىسىمىن ورىنداۋعا كىرىسىپ كەتتى, دەپ جازادى investing باسىلىمى.
ناقتىراق ايتار بولساق, كۋۆەيت تاۋلىگىنە 130 مىڭ باررەل, ال ومان 45 مىڭ باررەل ازايتپاق. Kuwait Oil Co. كومپانياسىنىڭ باسشىسى جامال جاپپاردىڭ ايتۋىنشا, قازىر ەل ۇكىمەتى 80-90 ۇڭعىمانىڭ جۇمىسىن توقتاتقان.
سونىمەن قاتار بىلتىرعى جىل بويى جوعارىدا اتالعان كەلىسىمگە قارسى بولىپ كەلگەن يراك دا ءوز مىندەتتەمەسىن ورىنداۋعا كەلىسىپ وتىر. بۇل تۋرالى ەلدىڭ مۇناي ءمينيسترى جاپپار ءالي ءال-ليابي مالىمدەدى.
ايتا كەتەيىك, قازاقستان بيىلعى جىلدىڭ باسىنان باستاپ تاۋلىگىنە 20 مىڭ باررەل قىسقارتۋعا كەلىسكەن ەدى.