ارقا وڭىرىندەگى كەندى اتىراپ قاراعاندى قالاسىنداعى «Tau-Ken-Temir» جشس-ءنىڭ جۇمىسى 2014 جىلدان باستاپ قايتا جانداندى. ەستەرىڭىزگە سالساق, بۇنىڭ الدىندا زاۋىت «Silicium Kazakhstan» اتاۋىمەن بەلگىلى ەدى. الايدا, ءوندىرىس توڭىرەگىندەگى داۋ-دامايلارعا بايلانىستى وعان جۇمىسىن توقتاتۋعا تۋرا كەلگەن. كاسىپورىننىڭ قايتا ىسكە قوسىلۋى ءۇشىن مەملەكەت تاراپىنان كومەك كورسەتىلىپ, «تاۋ-كەن سامۇرىق» ۇلتتىق تاۋ-كەن كومپانياسى 1,4 ملرد تەڭگە بولگەن بولاتىن. بۇگىندە زاۋىت جۇمىسىنىڭ ناتيجەسى جىلدان جىلعا ارتىپ كەلەدى. تولىققاندى ءوندىرىستىك قۋاتقا كەلەر جىلدان قول جەتكىزبەك. بيىلدىڭ وزىندە ءوندىرىس وشاعى 19,5 مىڭ توننا تەحنيكالىق كرەمني شىعاراتىن بولادى. بۇل بىلتىرعىمەن سالىستىرعاندا ەكى ەسە كوپ. قولدانىلاتىن ءوندىرىس قۇرالدارى نەمىس كومپانياسى ۇسىنعان سوڭعى تەحنولوگيالارمەن جاسالعان. ال قاجەتتى شيكىزات «اقتاس» كۆارتس شىعارۋ كەن ورنىنان تاسىمالدانادى. جەزقازعاننان 130 شاقىرىمدا ورنالاسقان بۇل جەردىڭ قورىندا 4 ملن توننا كۆارتس بار.
كاسىپورىننىڭ قايتا تۇلەۋى ءوڭىر تۇرعىندارىن جۇمىسپەن قامتۋدا ۇلكەن سەپتىگىن تيگىزدى. قازىرگى ۋاقىتتا زاۋىتتا 364 ادام ەڭبەك ەتەدى. ءارقايسىسى جوعارى بىلىكتى ماماندار ءارى ولاردىڭ ءبىلىمىن شىڭداۋ ماقساتىندا بىرقاتار جۇمىستار ىسكە اسىرىلىپ جاتىر. ايتا كەتۋ كەرەك, بۇرىنعى كاسىپورىننىڭ قىزمەتكەرلەرى دە جۇمىسسىز قالعان جوق. ماسەلەن, تس بويىنشا جەتەكشى ينجەنەر سەرگەي كوروبكو ءوندىرىس ورنىنىڭ نەگىزى قالانعالى جۇمىس جاسايدى.
– زاۋىت ىسكە قوسىلعالى بەرى جۇمىس جاساعاندىقتان, سالىستىرا الامىن, قازىر بۇرىنعىمەن سالىستىرعاندا جۇمىس جاساۋ ءۇشىن الدەقايدا قولايلى جاعداي جاسالادى, الەۋمەتتىك تۇرعىدان العاندا دا ءىسىمىز وڭعا باسۋدا. جۇمىسكەرلەر ءۇشىن ءتيىمدى بولعاندىقتان شىعار, 70 پايىزعا جۋىق مامان بۇرىنعى كاسىپورىننان ورنالاستى. ولاردىڭ ءبىلىمىن جەتىلدىرۋگە باسشىلىق تاراپىنان ءاردايىم قولداۋ كورسەتىلەدى. ءبارىمىز دە ءبىر ماقساتتى ۇستانامىز, ول – ءناتيجەلى ەڭبەك ەتۋ. قازىرگى ۋاقىتتا باستى جوسپارىمىز – وزىندىك قۇنى بارىنشا تومەن ءونىم ءوندىرۋ. بۇل, ارينە ءبىزدىڭ دە ماتەريالدىق تۇرعىدان العاندا وسۋىمىزگە تىكەلەي سەپتىگىن تيگىزەدى, – دەيدى ول.
بۇگىندە كاسىپورىن ءىسو-9001 حالىقارالىق مەندجمەنت ساپاسى جۇيەسىنىڭ تالاپتارىنا جاۋاپ بەرە الادى. شىعارىلاتىن ونىمگە بەرىلگەن جوعارى باعا الداعى ۋاقىتتا شەتەلدىك نارىققا شىعۋعا جول اشتى. ءوندىرىس ورداسىنىڭ باسقارما باسشىسى مۇرات جۇكەنوۆ «قازىرگى ۋاقىتتا دايىن ءونىمنىڭ 50 پايىزعا جۋىعى سولتۇستىك امەريكاعا, 40 پايىزى ەۋروپاعا, قالعانى رەسەي مەن بەلارۋس مەملەكەتتەرىنە تاسىمالدانادى», دەيدى. سونىمەن قاتار, ول الداعى جىلى زاۋىتتى 21-23 مىڭ توننا ءونىم شىعاراتىن وندىرىستىك قۋاتقا شىعارۋدى جوسپارلايتىندارىن جەتكىزدى.
الەمدىك نارىقتا ەلىمىزدە وندىرىلەتىن كرەمنيگە دەگەن سۇرانىس جوعارى. بۇعان ءبىردەن-ءبىر سەبەپ, ونىڭ جوعارى تەحنولوگيالار ءۇشىن قاجەتتىگى. قۇرىلىستان باستاپ زاماناۋي تەحنيكالىق قۇرىلعىلار ءوندىرىسىنە دەيىن قولدانىلادى.
بۇدان بولەك, زاۋىت باسشىلىعى كەزەكتى ينۆەستيتسيالىق جوبانى ىسكە اسىرۋعا بىلەك سىبانا كىرىسۋدە. ەندىگى كەزەكتە ولار ءوز ءوندىرىستىك قالدىقتارىنان ءونىم شىعارۋ ماقساتىن العا قويعان. بۇل كاسىپورىننىڭ قورشاعان ورتاعا زياندى زاتتاردى شىعارۋىن تەجەپ, ەكولوگياعا بارىنشا از زالال كەلتىرۋگە سەپتىگىن تيگىزەرىنە سەنىمدى.
قايرات جۇنىس ۇلى
قاراعاندى