ۇلتتىق تاعامدار بويىنشا ساراپقا سالىناتىن «ۋنيۆەرسيادا ۇسىنعان» اتتى ارناۋلى سەرتيفيكاتتى ۇتىپ الدى
قازاقتىڭ قازىسى مەن قارتاسى, جال-جاياسى الەمدىك مەيرامحانالاردىڭ اس ءمازىرىنىڭ قاتارىنان ورىن الا باستاعانىنا ونشا كوپ بولا قويعان جوق. ءارىسى امەريكادا, بەرىسى فرانتسيا مەن اۆستريادا قازاقتىڭ سۇيىكتى تاماعى – ەت اسۋدى ۇيرەنىپ العان شەتەلدىكتەر سانىنىڭ كوبەيىپ كەلە جاتقانىن بايقاپ تا, كورىپ تە ءجۇرمىز.
الماتىدا وتەتىن ءححVىىى قىسقى ۋنيۆەرسيادا مەن استانادا وتاۋ تىككەن ەكسپو-2017 حالىقارالىق كورمەسىنە تورتكۇل دۇنيەنىڭ ءتورت بۇرىشىنان اعىلىپ كەلۋشىلەر اراسىندا مىندەتتى تۇردە قازاق تاعامىنىڭ ءدامىن كورگىسى كەلەتىندەردىڭ كوپ بولارى داۋسىز. وسىعان وراي ءبىزدىڭ قازاق اس ءمازىرىن دايىنداۋشى ماماندار مەن تەحنولوگتارىمىز دا قول قۋسىرىپ, قاراپ وتىرعان جوق. ونىڭ ايقىن كۋاسى كۇنى كەشە الماتىنىڭ تاۋ بوكتەرىندە جاڭادان عانا اشىلعان «Qazaq Restaurant» مەيرامحاناسى «ۋنيۆەرسيادا ۇسىنعان» اتتى ارناۋلى سەرتيفيكاتتى ۇتىپ الدى.
مەيرامحانادا تەك قانا قازاق اس ءمازىرى دايىندالادى. ءبىر مەزەتتە 90 ادامعا قىزمەت كورسەتەدى. «Qazaq Restaurant» – قازاقستاندا وتەتىن حالىقارالىق شارالارعا قاتىستى الماتىدا ەسىگىن اشقان «گاككۋ» مەن «Koktem Ballrom»-نان كەيىنگى سانى جاعىنان ءۇشىنشى مەيرامحانا. مۇنىڭ سىرتىندا الىس-جاقىننان كەلگەن مەيماندارعا قالاداعى وزگە دە 150 قازاق اس ءمازىرى ارالاسقان مەيرامحانالار مەن ءدامحانالار لايىقتى قىزمەت كورسەتەدى. الماتىنىڭ كاسىپكەرلىك پەن يندۋستريالىق-يننوۆاتسيالىق دامۋ باسقارماسى «ۋنيۆەرسيادا ويىندارى اياسىندا قالاداعى سالا بويىنشا شاعىن جانە ورتا بيزنەستى دامىتۋ ءىسى ودان ءارى جالعاسىن تابادى. سوڭعى اشىلعان ەكى قازاق مەيرامحاناسى الماتىلىق 170 ادامعا جۇمىس تاۋىپ بەردى», دەيدى.
جىل جابار تۇستا جاڭالىق بولعان قازاق مەيرامحانالارى العاشقى كەلۋشىلەرىن, اسىرەسە, شەتەلدىكتەردى قابىلداپ تا ۇلگەردى. «قازاق ءدامىنىڭ تابەتىڭدى تارتار ءيىسىن-اي» دەۋشىلەردىڭ قاتارى كوبەيىپ كەلەدى. ءويتكەنى, مۇنداي اس ءمازىرى استا-توك, ءدامى دە, قىزمەت كورسەتۋ ساپاسى دا جانعا جاعىمدى مەيرامحانالاردىڭ الدىنان ءوتىپ بارا جاتىپ وعان مويىن بۇرماۋ, باس سۇقپاۋ مۇمكىن ەمەس.
تالعات ءسۇيىنباي,
«ەگەمەن قازاقستان»
الماتى