بۇگىن «ەگەمەن قازاقستان» رەداكتسياسىندا باسىلىم باسشىسى دارحان قىدىرالى سوڭعى التى ايدىڭ قورىتىندىسى بويىنشا ەسەپ بەرۋ جينالىسىن وتكىزدى. وعان گازەت ۇجىمىمەن قاتار دەپۋتاتتار, جازۋشىلار, عالىمدار جانە باسىلىمدا كوپ جىلدار قىزمەت اتقارىپ, ەڭبەك دەمالىسىنا شىققان بىرنەشە ارداگەر جۋرناليست قاتىستى.
باسقارما توراعاسى دارحان قىدىرالى گازەت پەن گازەت سايتىنىڭ سوڭعى ايلارداعى جەتىستىكتەرى, جاڭالىقتارى جايلى باياندادى. مىسالى, اقپارات جانە كوممۋنيكاتسيالار مينيسترلىگىنىڭ قولداۋىمەن جاڭا دامۋ ستراتەگياسى جاسالىپ, 1 قىركۇيەكتەن باستاپ گازەت جاڭا ديزاينمەن, جاڭا فورماتتا شىعا باستادى. گازەتتىڭ ىشكى مازمۇنىندا دا ايتارلىقتاي وزگەرىستەر بولدى. ساراپتامالىق ماتەريالدارعا باسىمدىق بەرىلە باستادى. جاڭا تۇجىرىمعا سايكەس جاڭا بولىمدەر مەن ايدارلار, جاڭا بەتتەر اشىلدى. سولاردىڭ ىشىندە ساراپشىلار باعانىن ەرەكشە اتاپ وتۋگە بولادى. باعاندا ساراپشىلار, گازەت شولۋشىلارى مەن ەلگە تانىمال مەملەكەت جانە قوعام قايراتكەرلەرى سالماقتى ماتەريالدارىن جاريالايدى.
جاقىندا جەكە جەلىلىك باسىلىم بولىپ تىركەلگەن Egemen.kz سايتى بىرنەشە ايدا اقپاراتتىق ينتەرنەت-باسىلىمدار ىشىندە العاشقى 25-ءتىڭ قاتارىنا قوسىلدى.
سونىمەن قاتار الداعى جوسپارلاردىڭ نەگىزگىلەرى رەتىندە گازەتتى وسى زامان تالاپتارىنا ساي ءارى قاراي جەتىلدىرۋ, سايتتى تولىققاندى اقپاراتتى پورتال رەتىندە جاڭارتۋ, اقپارات ماسەلەلەرىنە ارنالعان سەمينارلار وتكىزۋ, «ەگەمەن» جانىنان جۋرناليستيكا اكادەمياسىن اشۋ, ارداگەرلەر كەڭەسىن قۇرۋ جونىندە دە ايتىلدى.
جوسپارداعى تاعى ءبىر يگى شارا - «ەگەمەن قازاقستاننىڭ» 100 جىلدىعىنا قاراي باسىلىمنىڭ 1919 جىلدان بەرگى ماتەريالدارىنان تۇراتىن 10 تومدىق جيناقتىڭ شىعاتىنى. ول سوڭعى ءجۇز جىلدىق تاريحىمىزداعى ماڭىزدى كەزەڭدەر بويىنشا تومدارعا ءبولىنىپ, ءار كەزەڭنىڭ ايناسى بولا الاتىن ماتەريالداردى جيناقتاماق.
جيىن بارىسىندا قۇرمەتتى قوناقتار دا سويلەپ, ىزگى تىلەكتەرىن ايتتى. گازەتتى كوپ جىلدار باسقارعان دەپۋتات ساۋىتبەك ءابدىراحمانوۆ «ەگەمەن قازاقستان» باسىلىمى مەن ونىڭ ينتەرنەت-سايتىن جاڭا ساپاعا كوتەرۋ باعىتىنداعى جۇمىستارعا جوعارى باعا بەردى.