ەل تاۋەلسىزدىگى ەكونوميكالىق تابىستاردىڭ مۇرىندىعىنا اينالدى. كورسەتكىشتەر كوڭىلدى شالقىتادى. وسى مەرزىم ىشىندە قوستاناي وبلىسىنىڭ وڭىرلىك جالپى ءونىمى 363 ەسە ءوستى, ال ونى جان باسىنا شاققانداعى كورسەتكىش بۇرىنعىدان 504 ەسە كوپ! نەگىزگى قارجىعا قوسىلعان ينۆەستيتسيالار كولەمى بۇگىندە 1,6 تريلليون تەڭگەنى قۇرايدى ەكەن. 25 جىل ىشىندە قوستاناي وبلىسى اگرارلى-يندۋستريالى وڭىرگە اينالدى. اۋىلشارۋاشىلىق ونىمدەرىن وڭدەۋ سالاسىن قوسقاندا ونەركاسىپ ءوندىرىسىنىڭ كولەمى 1991 جىلى 10 ميلليون تەڭگە شاماسىندا بولسا, 2015 جىلى 443 ميلليارد تەڭگەگە جەتتى.
سوڭعى جىلدارى كەن, ياعني شيكىزات ءوندىرىسىن وڭدەۋ سالاسى قارقىن الدى. ونەركاسىپ قۇرىلىمىندا وڭدەۋ سەكتورى 54 پايىزدى قۇرايدى, ول وسىدان 10 جىل بۇرىن ءوندىرىستىڭ تورتتەن ءبىرى عانا بولاتىن. بۇل قازاقستاندى يندۋستريالاندىرۋ باعدارلاماسىنىڭ تاماشا ناتيجەسى ەكەنى انىق. سوڭعى التى جىلدا وبلىستا 125 ميلليارد تەڭگەنى قۇرايتىن 84 ينۆەستيتسيالىق جوبا جۇزەگە استى. سونىڭ ارقاسىندا 5 مىڭ قوستانايلىققا جاڭا جۇمىس ورىندارى ۇسىنىلدى.
وبلىستا كاسىپورىنداردىڭ سىرتقى ەكونوميكالىق-ساۋدا بايلانىستارىنىڭ ءورىسى كەڭەيىپ كەلەدى. وڭىردە وندىرىلگەن ونىمدەر بۇگىندە الەمنىڭ 80 مەملەكەتىنە ەكسپورتتالادى. 2000 جىلدان بەرى مۇندا اۋىلشارۋاشىلىق تەحنيكالارى, جەڭىل, جۇك ماشينالارى, سەندۆيچ-پانەل, كارتون, وسىمدىك مايى سەكىلدى ءونىمنىڭ كوپتەگەن جاڭا تۇرلەرى وندىرىلەدى. قوستاناي وبلىسى ەلىمىزدە ماشينا جاساۋ ورتالىعىنا اينالىپ كەلەدى. بۇگىنگە دەيىن ماشينا جاساۋ زاۋىتتارىندا 30 مىڭ جەڭىل اۆتوموبيل ساپقا قويىلدى.
الداعى ۋاقىتتا دا تابىس تاسقىنى تولاستامايدى. قوستانايدا قازاقستانداعى العاشقى ەلەكتروموبيل قۇراستىرىلدى. قوستانايدا قۇراستىرىلعان JAC ەلەكتروموبيلىنىڭ 12 داناسى الدىمىزداعى جىلى ەكسپو-2017 كورمەسىندە وبلىستىڭ برەندى رەتىندە كورسەتىلەدى. قوستاناي قالاسىنان ورىن تەبەتىن يندۋستريالىق ايماق تا تابىستىڭ كەپىلى بولارىنا سەنىم مول.
ءنازيرا جارىمبەتوۆا,
«ەگەمەن قازاقستان»
قوستاناي