سونىمەن ەكسپو-2017 حالىقارالىق مامانداندىرىلعان كورمەسى اياسىندا ۇيىمداستىرىلاتىن ديۋ سولەي تسيركىنىڭ قويىلىمىنا بيلەتتەر 2017 جىلعى 10 مامىردان باستاپ ساتىلىمعا ءتۇستى.
شتاب-پاتەرى مونرەال قالاسىندا ورنالاسقان ديۋ سولەي تسيركى قازىرگى تاڭدا ويىن-ساۋىق يندۋسترياسىنداعى الىپ كومپانيالاردىڭ بىرىنە اينالعان. تسيرك ۇجىمىندا الەمنىڭ 50 ەلىنەن جينالعان 4000 جۋىق ادام ەڭبەك ەتەدى, ونىڭ 1300-ءى − ارتىستەر. الەمگە ايگىلى ديۋ سولەي تسيركى وسى ۋاقىتقا دەيىن الەمنىڭ 400-دەن استام شاھارىندا ونەر كورسەتىپ ۇلگەردى. ەندى ولار ەكسپو-2017 اياسىندا العاش رەت استاناعا ات باسىن تىرەمەك.
قازاقستاننىڭ باي مادەنيەتى مەن تاريحىنان جانە «بولاشاق ەنەرگياسى» اتتى كورمە تاقىرىبىنان شابىتتانعان تسيرك ارتىستەرى استانا تۇرعىندارى مەن قوناقتارى ءۇشىن ارنايى ەكسكليۋزيۆتى «REFLEKT» شوۋ-باعدارلاماسىن دايىندادى. تاڭعاجايىپ قويىلىمدا قازاق حالقىنىڭ باي مادەني مۇراسى مەن ادامزاتتىڭ بولاشاققا دەگەن اسىل ارماندارى ءوزارا ءورىلىپ جاتادى. جالپى, تسيرك تاراپىنان 2017 جىلدىڭ 10 ماۋسىمىنان 10 قىركۇيەگىنە دەيىن 71 قويىلىم جوسپارلانىپ وتىر. تسيرك قوناقتارى بىرەگەي شوۋدى ارنايى جابدىقتالعان ءۇشبۇرىش تارىزدەس پاۆيلوندا تاماشالاي الادى. ونىڭ سىيىمدىلىعى 2000 كورەرمەنگە ارنالعان. قويىلىم تۇساۋكەسەرى كورمە الاڭىندا 16 ماۋسىم كۇنى وتەدى.
ديۋ سولەي تسيركىنىڭ تاڭداي قاقتىرارلىق قويىلىمىنىڭ كۋاگەرى بولۋ ءۇشىن ەكسپو-2017 كورمە قالاشىعىنا كەلىڭىز. تسيرك قويىلىمدارىنىڭ بيلەت قۇنى 4000 تەڭگەدەن باستالادى.
جىلقىباي جاعىپار ۇلى, «ەگەمەن قازاقستان»