وتكەن عاسىردىڭ باسىندا ەركىن ەل بولۋعا تالپىنعان, سول جولدا باسىن بەرگەن قازاق زيالىلارى قۇرعان ۇكىمەتتىڭ عاسىرلىق تويى ءار-ءار جەردە ءتۇرلى دەڭگەيدە, ءتۇرلى فورماتتا اتالىپ جاتىر.
تالدىقورعان ورتالىق يپپودرومىندا بايگە ءوتتى. الاشوردانىڭ 100 جىلدىعىنا ارنالعان ءدۇبىر. الدىمەن قۇنان بايگە. 15 شىقىرىمدىق قاشىقتىقتى شالدىقپاي العان بولاشاق تۇلپارلاردىڭ كوشىن باۋىرجان ءالىمجانوۆ ۇكىلەپ قوسقان زىمىران اتتى قۇنان باستاپ كەلدى. ەكىنشى ورىن – دياس سەيسەباەۆتىڭ بونۋسىنا, ءۇشىنشى جۇلدە – باقتورى لاقاپ اتىن يەمدەنگەن (يەسى باياحمەتوۆ قۇنارعالي) جۇيرىككە بۇيىردى.
بايگەنىڭ باستى ءباسى دە, نەگىزگى كوركى دە – الامان. 30 شاقتى ات جۇگىرتكەن الاماندا ەربول سادۋاقاسوۆتىڭ سۇلتان اتتى تۇلپارى جەكە دارا كەلدى. ايدار تەمىرعاليەۆتىڭ شي قاسقاسى – 2 ورىن, ءادىل كەڭەستىڭ ەركەمايى – ءۇشىنشى جۇلدەنى يەمدەندى.
بايگەنىڭ ەكى تۇرىنەن ون جۇلدە باسكە ءتۇستى. سونىمەن قاتار, الاشوردانىڭ 100 جىلدىعى كۋبوگى. تويعا جاقسىلىق ۇشكەمپىروۆ, ەرماحان يبرايموۆ باستاعان سپورت ساڭلاقتارى ات سالىسىپ, بىرقاتار قازاق ەستراداسىنىڭ وكىلدەرى ونەر كورسەتتى. ات جارىستان سوڭ الاش ارىستارىنىڭ رۋحىنا ارنالعان اس بەرىلدى. بايگەنى ۇيىمداستىرۋشى تالدىقورعاندىق كاسىپكەر, ۇلتتىق ات سپورتى تۇرلەرىنە كوڭىل ءبولىپ جۇرگەن كاسىپكەر, اۋعان سوعىسىنىڭ ارداگەرى باۋىرجان بارلىباەۆ ايتۋىنشا «ۇلتىنا جاناشىر جانداردىڭ دەمەۋشى بولۋىمەن» ءوتىپ جاتقان اس پەن بايگە يدەياسى جىل باسىنان بەرى ويلاستىرىلعان. ات قوسۋشىلار ەشقانداي جارنا تولەمەيدى.
الماس ءنۇسىپ,
«ەگەمەن قازاقستان»
الماتى وبلىسى